മനുഷ്യരെ കടിച്ചുകീറി കൊന്നത് ഉള്പ്പെടെയുള്ള റിപ്പോര്ട്ടുകള് പുറത്തു വന്നതിന് പിന്നാലെ കേരളത്തില് ഉള്പ്പെടെ ഇന്ത്യയിലെ വിവിധ നഗരങ്ങളാണ് തെരുവ് നായ്ക്കളുടെ ശല്യം കൊണ്ടു പൊറുതിമുട്ടുന്നത്. തെരുവ് നായ്ക്കളെ മുഴുവന് വില്ലന്മാരായി ചിത്രീകരിക്കുന്നതിനിടയില് മനുഷ്യന് കാട്ടാത്തതും നായ്ക്കള് കാട്ടിയതുമായ ഒരു കാരുണ്യത്തിന്റെ കഥ ഇന്ത്യയിലെയും വിദേശത്തെയും മാധ്യമങ്ങള് ചര്ച്ച ചെയ്യുന്നു.
ഏഴ് ദിവസം മാത്രം പ്രായമുള്ള മാലിന്യത്തില് ഉപേക്ഷിക്കപ്പെട്ട നവജാത ശിശുവിനെ നാലു നായ്ക്കള് ചേര്ന്ന് സംരക്ഷിച്ച വര്ത്തമാനമാണ് മാധ്യമങ്ങള് പുറത്തുവിട്ടത്. ബംഗാളിലെ പുരുലിയയിലാണ് വിസ്മയിപ്പിക്കുന്നതും ഈറനണിയിക്കുന്നതുമായ ഈ സംഭവം. കുറ്റിക്കാടിന് നടുവില് മാലിന്യകൂമ്പാരത്തില് തുണിയില് പൊതിഞ്ഞ നിലയില് കണ്ടെത്തിയ കുഞ്ഞിനെ കാക്കയുടേയും മറ്റും ഉപദ്രവത്തില് നിന്നും സംരക്ഷിച്ച് സഹായത്തിനായി ആളുകള് എത്തും വരെ സംരക്ഷിച്ചു.
കൊത്താനെത്തിയ കാക്കയെ പിന്നാലെ ഓടിച്ചും മറ്റു ജീവികള് സമീപത്തെത്തി ഉപദ്രവിക്കാതിരിക്കാന് കുഞ്ഞിനടുത്തു കാവല് നിന്നും നാലു തെരുവ് നായ്ക്കള് കുഞ്ഞിനെ സംരക്ഷിച്ചു. നവംബര് 5 ന് നടന്ന സംഭവത്തില് നാട്ടുകാരനും സ്കൂള് അധ്യാപകനുമായ ഉല്ലാസ് ചൗധരി എന്നയാളാണ് കുട്ടിയെ കണ്ടെത്തിയത്. സ്കൂളിലേക്ക് പോകും വഴി ഒരു കുഞ്ഞിന്റെ കരച്ചില് ചൗധരി കേള്ക്കുകയായിരുന്നു. തുടര്ന്ന് തെരച്ചില് നടത്തിയ ചൗധരി ഒരു കുറ്റിക്കാടിന്റെ മറവില് നിന്നുമാണ് കരച്ചില് കേള്ക്കുന്നതെന്ന് തിരിച്ചറിയുകയും പിങ്ക് നിറത്തിലുള്ള തുണിയില് പൊതിഞ്ഞ കുഞ്ഞിനെയും അതിന് കാവല് നില്ക്കുന്ന നിലയില് നാലു നായകളെയും കണ്ടെത്തുകയും ആയിരുന്നു.
