സൂപ്പര്താരം ക്രിസ്ത്യാനോ റൊണാള്ഡോയുടെ സൗദി അറേബ്യന് കുടിയേറ്റമാണ് ലോകഫുട്ബോളിലെ ഇപ്പോഴത്തെ ഏറ്റവും വലിയ വിശേഷം. സൗദി അറേബ്യന് ക്ലബ്ബ് അല് നാസര് വന് തുകയ്ക്ക് കരാറിട്ട താരം പക്ഷേ ടീമിനൊപ്പം ആദ്യ മത്സരത്തിന് ഇതുവരെ ഇറങ്ങിയിട്ടുമില്ല. എന്നാല് താരവും ജോര്ജ്ജീനയും നിയമവിരുദ്ധമായിട്ടാണ് സൗദിയില് കഴിയുന്നത്.
ദീര്ഘനാളായി ലിവിംഗ് റിലേഷനില് ആയ ക്രിസ്ത്യാനോയ്ക്കും പങ്കാളി ജോര്ജ്ജീനയ്ക്കും കുട്ടികളുമുണ്ട്. പക്ഷേ നിയമപരമായി ഇതുവരെ വിവാഹം കഴിച്ചിട്ടില്ല. സൗദിയിലെ നിയമം അനുസരിച്ച് വിവാഹം കഴിക്കാതെ സ്ത്രീയ്ക്കും പുരുഷനും ഒരു വീട്ടില് താമസിക്കാന് കഴിയില്ല. എന്നിരുന്നാലും ഇവരെ അധികാരികള് ശിക്ഷിക്കാന് സാധ്യതയില്ല. ലോകത്തെ ഏറ്റവും അറിയപ്പെടുന്ന കായികതാരം എന്ന നിലയില് പോര്ച്ചുഗീസ് താരത്തിന് നേരെ കണ്ണടയ്ക്കുകയേയുള്ളൂ.
വിദേശിയാണെന്ന പരിഗണനയും താരത്തിന് കിട്ടും. നിയമം വിവാഹിതര്ക്ക് മാത്രമാണ് ഒരു വീട്ടില് താമസിക്കാനാകൂ എന്നാണെങ്കിലും വിദേശികളുടെ കാര്യത്തില് സൗദി അത്ര വാശി കാണിക്കുന്നില്ലെന്നാണ് നിയമവിദഗദ്ധര് പറയുന്നത്. വര്ഷം 175 ദശലക്ഷം പൗണ്ടിനാണ് ക്രിസ്ത്യാനോയെ ഇംഗ്ളീഷ് ക്ലബ്ബ് മാഞ്ചസ്റ്റര് യൂണൈറ്റഡില് നിന്നും കഴിഞ്ഞ വര്ഷം അവസാനത്തോടെ അല് നാസര് സ്വന്തമാക്കിയത്.
താരത്തിന് രണ്ടു മത്സരത്തില് സസ്പെന്ഷന് നില നില്ക്കുന്നതിനാല് ഇതുവരെ ടീമിനൊപ്പം ഇറങ്ങാന് കഴിഞ്ഞിട്ടില്ല. 2016 ല് റയല്മാഡ്രിഡില് കളിക്കുമ്പോഴായിരുന്നു ജോര്ജ്ജീനയും റൊണാള്ഡോയും കണ്ടുമുട്ടിയത്. അതിന് ശേഷം ഇരുവരും ഒരുമിച്ചാണ് ഇൗ ബന്ധത്തില് ഇവര്ക്ക് ബെല്ലാ അലാനാ എന്നീ രണ്ടു കുട്ടികളുമുണ്ട്. ക്രിസ്ത്യാനോ ജൂനിയര്, ഇവാ, മാറ്റിയോ എന്നീ മൂന്ന് കുട്ടികള് കൂടി ദമ്പതികള്ക്കുണ്ട്.
