ന്യൂഡല്ഹി: ശൈത്യം കടുത്തതോടെ വടക്കേ ഇന്ത്യ മൂടല്മഞ്ഞിന്റെ പിടിയില്. അതിശൈത്യത്തെ തുടര്ന്ന് ട്രെയിന് വ്യോമ ഗതാഗതം തടസ്സപ്പെട്ടു. 29 ട്രെയിനുകളും 150 വിമാനസര്വീസുകളും തടസ്സപ്പെട്ടു. തുടര്ച്ചയായി അഞ്ചാം ദിവസമാണ് തലസ്ഥാനം മൂടല്മഞ്ഞിന്റെ പിടിയിലായിരിക്കുന്നത്.
നഗരപരിധിയില് കാഴ്ചപരിധി 200 മീറ്ററില് താഴെയായിരിക്കുകയാണ്. മൂടല്മഞ്ഞില് വാഹനങ്ങള് വേഗം കുറച്ചാണ് സഞ്ചരിക്കുന്നത്. സഫ്ദര് ജംഗില് 3.8 ഡിഗ്രി സെല്ഷ്യസാണ് രേഖപ്പെടുത്തിയ താപനില. കാലാവസ്ഥാ നിരീക്ഷണകേന്ദ്രം സ്ഥിതി ചെയ്യുന്ന ലോധിയില് 3.6, 3.2, 3.3 എന്നിങ്ങനെയാണ് കഴിഞ്ഞ ദിവസങ്ങളില് പുലര്ച്ചെ രേഖപ്പെടുത്തിയ താപനില. ഉത്തരേന്ത്യയില് ഉടനീളം കനത്ത ശൈത്യവും മൂടല് മഞ്ഞുമാണ്.
കാലാവസ്ഥാ നിരീക്ഷണ വിഭാഗം പറയുന്നത് പഞ്ചാബിലെ ബട്ടീന്ദയില് കഴിഞ്ഞ രാത്രി കാഴ്ചപരിധി പൂജ്യമായിരുന്നു എന്നാണ്. പഞ്ചാബ്, രാജസ്ഥാന്, ഉത്തര്പ്രദേശ്, ഹരിയാന, ഡല്ഹി എന്നിവിടങ്ങളെ മൂടല് മഞ്ഞ് വിഴുങ്ങിയിരിക്കുന്ന ഉപഗ്രഹചിത്രം ദേശീയ കാലാവസ്ഥാ നിരീക്ഷണ കേന്ദ്രം പുറത്തുവിട്ടിരുന്നു. ഡല്ഹിയില് കഴിഞ്ഞ ദിവസം 1.9 ഡിഗ്രി താപനില രേഖപ്പെടുത്തിയിരുന്നു.
