ന്യുയോര്ക്ക്: ഇന്ത്യന് നിര്മ്മിത രണ്ട് കഫ് സിറപ്പുകള് ഉപയോഗിക്കരുതെന്ന് ലോകാരോഗ്യ സംഘടന (ഡബ്ലൂഎച്ച്ഒ)യുടെ മുന്നറിയിപ്പ്. മാരിയോണ് ബയോടെക് നിര്മ്മിക്കുന്ന അംബ്രോനോള്, കോഡ്-1 മാക്സ് എന്നിവ കുട്ടികള്ക്ക് നല്കരുതെന്നാണ് നിര്ദേശം. ഇവയില് എത്തിലീന് ഗ്ലൈക്കോള് സാന്നിധ്യമുണ്ടെന്ന് ഉസ്ബക്കിസ്ഥാന് ആരോഗ്യ മന്ത്രാലയത്തിന്റെ മുന്നറിയിപ്പിന്റെ പശ്ചാത്തലത്തിലാണ് നടപടി. ഈ മരുന്നുകള് കഴിച്ച് ഉസ്ബക്കിസ്ഥാനില് 19 കുട്ടികള് മരിച്ചുവെന്ന് ആരോപണം ഉയര്ന്നിരുന്നു.
ഈ മരുന്നുകളുടെ പേരില് ഉയര്ന്ന ആരോപണങ്ങളില് ഡബ്ല്യൂഎച്ച്ഒ വിശദീകരണം തേടിയിരുന്നു. എന്നാല് കമ്പനിയുടെ ഭാഗത്തുനിന്ന് മറുപടി ലഭിക്കാത്തതിനെ തുടര്ന്നാണ് നടപടി. ഈ മരുന്നുകളില് കുട്ടികള്ക്ക് നല്കാന് അനുവദിച്ചതിലും കൂടുതല് എത്തിലീന് ഗ്ലൈക്കോള് സാന്നിധ്യമുണ്ടെന്നാണ് കണ്ടെത്തല്. ഈ മരുന്നുകള് പല രാജ്യങ്ങളിലും കരിഞ്ചന്തകളില് ലഭ്യമാണെന്നും ഡബ്ല്യൂഎച്ച്ഒ മുന്നറിയിപ്പില് പറയുന്നു.
ഉസ്ബക്കിസ്ഥാനില് കുട്ടികളുടെ മരണം റിപ്പോര്ട്ട് ചെയ്തതിനു പിന്നാലെ മാരിയോണ് കമ്പനിയുടെ പ്രവര്ത്തനം കേന്ദ്രസര്ക്കാര് നിര്ത്തിച്ചിരുന്നു. കമ്പനിയുടെ ലൈസന്സ് ഉത്തര്പ്രദേശ് സര്ക്കാരും റദ്ദാക്കിയിരുന്നു.
