കോട്ടയം : പാലാ നഗരസഭാധ്യക്ഷസ്ഥാനത്തേച്ചൊല്ലി കേരളാ കോണ്ഗ്രസു(എം)മായി ഇടഞ്ഞ സി.പി.എം. കടുത്ത നിലപാടിലേക്ക്. മുന്നണിധാരണയുടെ ഭാഗമായി, നഗരസഭാധ്യക്ഷനായി സി.പി.എം. ജില്ലാ കമ്മറ്റി നിര്ദേശിച്ച ബിനു പുളിക്കക്കണ്ടത്തെ അംഗീകരിക്കില്ലെന്നു കേരളാ കോണ്ഗ്രസ് (എം) ചെയര്മാന് ജോസ് കെ. മാണി നിലപാടെടുത്തതോടെയാണ് ഇരുകക്ഷികളും തമ്മിലുള്ള ബന്ധം വഷളായത്.
പ്രശ്നം ഒത്തുതീര്ക്കാന് കഴിഞ്ഞ 15-നു സി.പി.എം. ജില്ലാ കമ്മിറ്റി ഓഫീസില് മന്ത്രി വി.എന്. വാസവന്, ജില്ലാ സെക്രട്ടറി എ.വി. റസല്, പാലാ ഏരിയാ സെക്രട്ടറി ലാലിച്ചന് ജോര്ജ് തുടങ്ങിയവര് കേരളാ കോണ്ഗ്രസ് നേതൃത്വവുമായി ചര്ച്ച നടത്തിയിരുന്നു. യോഗത്തില് ജോസ് കെ. മാണി പങ്കെടുക്കുമെന്ന് അറിയിച്ചിരുന്നെങ്കിലും പകരമെത്തിയതു ജില്ലാ പ്രസിഡന്റ് ലോപ്പസ് മാത്യുവാണ്. മുന്നണി ധാരണപ്രകാരം ഒരുവര്ഷത്തേക്കു സി.പി.എമ്മിനു ലഭിക്കുന്ന ഊഴത്തില് ബിനുവിനെ നഗരസഭാധ്യക്ഷനാക്കാനുള്ള ജില്ലാ കമ്മറ്റി തീരുമാനം യോഗത്തില് അറിയിച്ചു.
എന്നാല്, ബിനുവിനെ അംഗീകരിക്കില്ലെന്നും മറ്റൊരാളെ നിര്ദേശിക്കാനും ലോപ്പസ് ആവശ്യപ്പെട്ടു. മുന്നണിബന്ധം നിലനിര്ത്താനായി ഈ വിട്ടുവീഴ്ച വേണ്ടിവന്നാല് ഭാവിതെരഞ്ഞെടുപ്പുകളില് കേരളാ കോണ്ഗ്രസ് ഭവിഷ്യത്ത് നേരിടേണ്ടിവരുമെന്നായിരുന്നു സി.പി.എം. നേതാക്കളുടെ താക്കീത്.
75 വര്ഷത്തിനിടെ പാലാ നഗരസഭയില് സി.പി.എമ്മിന് ആദ്യമായി ലഭിക്കുന്ന അധ്യക്ഷപദവി നഷ്ടപ്പെടുന്ന സാഹചര്യം പ്രവര്ത്തകരെ ബോധ്യപ്പെടുത്താനാവില്ലെന്നും നേതാക്കള് പറഞ്ഞു. എന്നിട്ടും കേരളാ കോണ്ഗ്രസ് (എം) വഴങ്ങാതിരുന്നതോടെ ചര്ച്ച അലസിപ്പിരിഞ്ഞു. തുടര്ന്ന്, ഇന്നലെ സി.പി.എം. ജില്ലാ സെക്രട്ടറി എ.വി. റസലിന്റെ നേതൃത്വത്തില് പാലായില് ഏരിയാ, ലോക്കല് കമ്മറ്റി ഭാരവാഹികളുടെ യോഗം ചേര്ന്ന് ബിനുവിനെ വീണ്ടും ഏകകണ്ഠമായി നാമനിര്ദേശം ചെയ്തു.
