പ്രേക്ഷകപ്രശംസ നേടി മുന്നേറുന്ന ഉണ്ണി മുകുന്ദന് സിനിമയാണ് ‘മാളികപ്പുറം’. വേൾഡ് വൈഡ് കളക്ഷനിൽ കോടി കടന്ന സിനിമയ്ക്ക് മിക്ക സ്ഥലങ്ങളിലും ഹൗസ്ഫുൾ ഷോകളും, ചില സ്ഥലങ്ങളില് എക്സ്ട്രാ ഷോകളും നടത്തുന്നുണ്ട്. കേരളത്തിനകത്തും പുറത്തും സിനിമയ്ക്ക് മികച്ച അഭിപ്രായം ലഭിക്കുന്നുണ്ട്. മാളികപ്പുറത്തിന്റെ സംവിധായകൻ നവാഗതനായ വിഷ്ണു ശശി ശങ്കറാണ്. പ്രേക്ഷകശ്രദ്ധ നേടിയ പത്താം വളവ്, നൈറ്റ് ഡ്രൈവ്, കടാവർ എന്നീ ചിത്രങ്ങൾക്കു ശേഷം അഭിലാഷ് പിള്ള തിരക്കഥ എഴുതുന്ന ചിത്രമാണിത്. സിനിമ വിജയിച്ച സന്തോഷം അണിയറപ്രവര്ത്തകരെല്ലാം സോഷ്യല് മീഡിയയിലൂടെ പങ്കുവയ്ക്കുന്നുണ്ട്.
ഇപ്പോഴിതാ അഭിലാഷ് പിള്ള ഫെയ്സ് ബുക്ക് പേജിലൂടെ പങ്കുവച്ചിരിക്കുന്ന വീഡിയോയും അത്തരമൊരു നിഷ്കളങ്കമായ സന്തോഷമാണ്. വീഡിയോയില് ടൈറ്റില് റോളിലെത്തിയ ദേവനന്ദയെയും ഒരു മുത്തച്ഛനെയും കാണാം. അവര് തമ്മിലുള്ള സംഭാഷണമാണ് പോസ്റ്റിലുള്ളത്. ‘‘90 വയസ്സുള്ള ഒരു മുത്തശ്ശനും 9 വയസ്സുള്ള കല്ലുവും തമ്മിലുള്ള ഈ സംസാരത്തിലുണ്ട് മാളികപ്പുറം സിനിമയുടെ വിജയം. സിനിമ കണ്ടു കരഞ്ഞു കൊണ്ടു വന്ന് നന്ദി പറയുന്ന പ്രേക്ഷകരെ കാണുമ്പോൾ ശെരിക്കും കരയുന്നത് ഞങ്ങൾ മാളികപ്പുറം ടീമാണ്.
തൃപ്പൂണിത്തുറ സെൻട്രൽ തിയേറ്ററിൽ നിന്നുള്ള കാഴ്ച ..’’ എന്ന ക്യാപ്ഷനും നല്കിയാണ് അഭിലാഷ് പിള്ളയുടെ വീഡിയോ.
ഫാന്റസി ഫാമിലി ഡ്രാമ വിഭാഗത്തിൽ പെടുന്ന ഈ സിനിമയില് അയ്യപ്പ ഭക്തയായ മാളികപ്പുറത്തമ്മയുടെ കഥയാണ് പറയുന്നത്. ബാലതാരങ്ങളായ ശ്രീപഥും ദേവനന്ദയുമാണ് ചിത്രത്തിലെ സുപ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ടൈറ്റിൽ റോളാണ് ദേവനന്ദ കൈകാര്യം ചെയ്തിരിക്കുന്നത്. സിനിമയുടെ ചിത്രീകരണ ലൊക്കേഷനിൽ പന്തളം രാജകുടുംബം സന്ദർശനം നടത്തിയിരുന്നു.
