പാലക്കാട് : ദിവസങ്ങള്ക്ക് മുന്നേ പാലക്കാട് ധോണിയില് ഭീതി വിതച്ച കാട്ടാനയെ വനംവകുപ്പ് മയക്ക് വെടിവച്ച് പിടിച്ചിരുന്നു. എന്നാല് ആനയുടെ ശരീരത്തില് നിന്നും 15-ാളം പെല്ലറ്റുകള് കണ്ടെത്തി . വനം വകുപ്പ് നടത്തിയ ശരീര പരിശോധനയിലാണ് നാടന് തോക്കുകളില് സാധാരണ ഉപയോഗിക്കുന്ന പെല്ലറ്റുകള് കണ്ടെത്തിയത്.
ഭീതിജനകമായ സാഹചര്യത്തില് ആനയെ തുരത്താന് നാടന് തോക്ക് ഉപയോഗിച്ച് വെടിയുതിര്ത്തതാകാം എന്ന് കരുതുന്നു. ഇത്തരത്തില് ശരീരത്തില് പെല്ലറ്റുകള് കൊണ്ടതാകാം ആന കൂടുതല് പ്രകോപിതനാകാന് കാരണമായത്. വനംവകുപ്പ് അധികൃതര് ഇടപെട്ട് പെല്ലറ്റുകളില് ചിലത് ആനയുടെ ശരീരത്തില് നിന്നും നീക്കം ചെയ്തിട്ടുണ്ട്.
കൂട്ടില് ആണെങ്കിലും പിടി-7 ഇപ്പോഴും പൂര്ണ്ണമായി ശാന്തനായിട്ടില്ല. ധോണിയിലെ വനം ഡിവിഷന് ഓഫീസിന് സമീപത്തെ കൂട്ടിലാണ് നിലവില് പിടി-7 . രാത്രി സമയങ്ങളില് ആന ശാന്തനാണെന്ന് പാപ്പാന്മാര് പറയുന്നു . ഇടയ്ക്ക് ചെറിയ ദേഷ്യമൊക്കെ കാണിക്കാറുണ്ട് . കൊമ്പ് കൊണ്ടും കാലുപയോഗിച്ചും കൂടിന്റെ അഴകള് തകര്ക്കാന് നോക്കാറുണ്ട്.
