കേരളത്തില് യുവാക്കളുടെ എണ്ണം കുറയുകയും 60 വയസ്സ് കഴിഞ്ഞവരുടെ എണ്ണം വര്ധിക്കുകയുമാണെന്ന് ധനമന്ത്രി കെ.എന് ബാലഗോപാല്. ഇന്നലെ നടന്ന ബജറ്റ് പ്രസംഗത്തിലാണ് മന്ത്രി ഇത് ചൂണ്ടിക്കാട്ടിയത്. തൊഴിലെടുക്കാന് ശേഷിയുളള യുവജനങ്ങള് ഇന്ത്യയില് കുറവാണെന്നും വിദ്യാഭ്യാസത്തിനും മറ്റും വിദേശത്തേക്ക് പോകുന്നവര് പിന്നീട് അവിടെ സ്ഥിരതാമസമാക്കുകയാണെന്നും അദ്ദേഹം പറഞ്ഞു.
'ഇന്ത്യന് യുവത 2022' എന്ന സ്റ്റാറ്റിസ്റ്റിക്സ് ആന്റ് പോഗ്രാം ഇംപ്ലിമെന്റിങ് മന്ത്രാലയം പുറത്തുവിട്ട റിപ്പോര്ട്ടിലെ വിവരങ്ങള് മന്ത്രി തന്റെ ബജറ്റില് ഉള്പ്പെടുത്തി സംസാരിക്കുകയായിരുന്നു. 2021 ലെ കണക്കനുസരിച്ച് ജനസംഖ്യയുടെ 16.5% പേരും 60 വയസ്സ് പിന്നിട്ടവരാണ്. 2031 ആകുമ്പോള് ഇത് 20% ആകുമെന്നും ജനന നിരക്ക് ഗണ്യമായി കുറയുകയാണെന്നും മന്ത്രി പറഞ്ഞു.
എണ്പതുകളില് 6.5 ലക്ഷവും, തൊണ്ണൂറുകളില് 5.3 ലക്ഷവും കുട്ടികള് ജനിച്ചിരുന്ന സ്ഥാനത്ത് ഈ അനുപാതം 2021 ആയപ്പോഴേക്കും 4.6 ആയി കുറയുകയാണുണ്ടായത്. 2031 ആകുമ്പോള് ജനന നിരക്ക് 3.6 ലക്ഷമായി വീണ്ടും താഴുമെന്നാണ് റിപ്പോര്ട്ട്.
2021 ല് കേരളത്തില് 16.5% വയോജനങ്ങളും, 22.1 % യുവജനങ്ങളുമായിരുന്നു. എന്നാല് 2036 ആകുമ്പോഴേക്കും വയോജനങ്ങളുടെ എണ്ണം യുവജനങ്ങളുടെ എണ്ണത്തെക്കാള് കൂടുതലാകും. ഒരു പക്ഷേ ആശ്രിത ജനസംഖ്യ ഏറ്റവും കൂടുതലുളള സംസ്ഥാനമായി കേരളം മാറിയേക്കാമെന്നും ഇത് സംബന്ധിച്ച് പഠനം നടത്തുമെന്നും മന്ത്രി പറഞ്ഞു.
ഒരു സ്കൂള് വിദ്യാര്തഥിക്കു വേണ്ടി സര്ക്കാര് പ്രതിവര്ഷം ചിലവിടുന്നത് 50,000 രൂപയാണ്. ഉന്നത വിദ്യാഭ്യാസ രംഗത്തും ഈ തുകയുടെ പതിര്മടങ്ങ് ചിലവഴിവഴിക്കപ്പെടുന്നു. അതിനാല് തന്നെ യുവാക്കളെ സ്വന്തം നാട്ടില് തന്നെ നിലനിര്ത്താനും, തൊഴില് നല്കാനും കഴിയണമെന്നും ഇതിനായി വേണ്ട നടപടികള് സ്വീകരിക്കുമെന്നും അദ്ദേഹം കൂട്ടിച്ചേര്ത്തു.
