ന്യൂഡല്ഹി: അടുത്ത ലോക്സഭാ തെരഞ്ഞെടുപ്പില് വിജയം നേടി ഭരണം നിലനിര്ത്താന് ഒരുങ്ങുന്ന ബിജെപിയ്ക്ക് 2024 ലെ പൊതു തെരഞ്ഞെടുപ്പിലേക്ക് വിജയതന്ത്രം പകര്ന്നുകൊടുത്ത് പ്രധാനമന്ത്രി നരേന്ദ്രമോഡി. പാര്ലമെന്റില് ബിജെപിയ്ക്ക് സീറ്റ് ഇനിയും കൂട്ടാനാണ് ശ്രമം.
പാര്ട്ടിയുടെ സാമാജികര് വോട്ടര്മാര്ക്കിടയിലേക്ക് പോകാനും അവിടെ ഭരണവിരുദ്ധ വികാരം ഇല്ലെന്ന് ഉറപ്പാക്കാനും ആഹ്വാനം ചെയ്തു. പാര്ട്ടിയുടെ പാര്ലമെന്റംഗങ്ങള് തങ്ങളുടെ മണ്ഡലത്തിലേക്ക് തിരിച്ചുപോകാനും പൊതുജനങ്ങളുമായി ബന്ധപ്പെട്ടുകൊണ്ടിരിക്കാനും പറഞ്ഞു.
ബിജെപിയുടെ പാര്ലമെന്ററി പാര്ട്ടി യോഗത്തിലാണ് മോഡി പറഞ്ഞത്. ഫെബ്രുവരി 1 ന് നടന്ന ബജറ്റ് അവതരണത്തിന് ശേഷം ആദ്യമായിട്ടാണ് മോഡി ഒരു പൊതുസഭയെ അഭിമുഖീകരിക്കുന്നത്. ലോക്സഭാ തെരഞ്ഞെടുപ്പിന് തൊട്ടുമുമ്പുള്ള പൂര്ണ്ണബജറ്റ് എന്നാണ് പ്രധാനമന്ത്രി പറഞ്ഞത്. ഈ ബജറ്റിനെ തെരഞ്ഞെടുപ്പ് മുന്നില് കണ്ടുള്ളത് എന്ന് ആര്ക്കും പറയാനാകില്ലെന്നും പറഞ്ഞു.
ബജറ്റില് ദരിദ്രരെയും പാര്ശ്വവല്ക്കരിക്കപ്പെട്ടവരേയും ഉള്ക്കൊണ്ടിട്ടുണ്ട്. അതുകൊണ്ടു തന്നെ തങ്ങളുടെ മണ്ഡലങ്ങളിലേക്ക് ഓരോ എംപിമാരും പോകാനും ബജറ്റില് പ്രഖ്യാപിച്ച കാര്യങ്ങള് കിട്ടുന്നുണ്ടോയെന്ന് ജനങ്ങളോട് ചോദിക്കാനും പറഞ്ഞു. കഴിഞ്ഞമാസം നടന്ന ബിജെപി ദേശീയ എക്സിക്യൂട്ടീവ് ്യോഗത്തില് പാര്ട്ടി നേതാക്കളോട് ലോക്സഭാ തെരഞ്ഞെടുപ്പിന് സജ്ജമാകാന് പ്രധാനമന്ത്രി ആവശ്യപ്പെട്ടിരുന്നു. ഇനിയും 400 ദിവസങ്ങളാണ് അവശേഷിക്കുന്നത്. ജനങ്ങളെ സേവിക്കാന് വേണ്ടതെല്ലാം ചെയ്തിട്ടുണ്ട്. നമ്മള്ക്ക് ചരിത്രമെഴുതണമെന്നും പറഞ്ഞു.
രാഷ്ട്രീയം നോക്കാതെ സമൂഹത്തിലെ എല്ലാത്തട്ടിലുമുള്ള മനുഷ്യരിലേക്ക് കടന്നുചെല്ലാന് മോഡി ബിജെപി പ്രവര്ത്തകരോട് പറഞ്ഞിരുന്നു. ബിജെപി ഒരു രാഷ്ട്രീയപാര്ട്ടി മാത്രമല്ലെന്നും സാമൂഹ്യ സാമ്പത്തീക സാഹചര്യങ്ങളില് മാറ്റം കൊണ്ടുവരാന് വേണ്ടി പ്രവര്ത്തിക്കുന്ന സാമൂഹ്യനീക്കമാണെന്നും പറഞ്ഞു. അടുത്ത വര്ഷത്തെ തെരഞ്ഞെടുപ്പില് തുടര്ച്ചയായി മൂന്നാം വട്ട ഭരണത്തിലേക്ക് എത്താന് ഭരണവിരുദ്ധ വികാരത്തിന് മേല് വളരാനും ആവശ്യപ്പെട്ടു.
ജയിക്കാന് ഏറെ ദുഷ്ക്കരമായ സീറ്റുകള് പിടിച്ചെടുക്കാനാണ് ബിജെപി 2024 തെരഞ്ഞെടുപ്പില് ലക്ഷ്യം വെയ്ക്കുന്നത്. അത് 144 ല് നിന്നും 160 ആക്കി ഉയര്ത്താമെന്നാണ് കരുതുന്നത്. അതേസമയം ജെഡിയു ഭരിക്കുന്ന ബീഹാര് പോലെയുള്ള സംസ്ഥാനത്തില് നിതീഷുമായി സഖ്യം വേര്പെടുത്തിയ ബിജെപി തനിച്ച് എന്തുമാത്രം മുമ്പോട്ട് പോകുമെന്നാണ് ഇനിയറിയേണ്ടത്. 2019 ല് മത്സരിച്ചപ്പോള് 303 സീറ്റുകളാണ് ബിജെപിയ്ക്ക് കിട്ടിയത്. 2014 ല് ഇത് 282 ആയിരുന്നു.
