ന്യൂഡല്ഹി: തൊടുന്നതിനും പിടിക്കുന്നതിനുമെല്ലാം കേന്ദ്രസര്ക്കാരിനെയും അവരുടെ നയങ്ങളെയും കുറ്റം പറയുമെങ്കിലും പ്രധാനമന്ത്രിയുടെ ജന് ആരോഗ്യ യോജന ഏറ്റവും പ്രയോജനപ്പെടുത്തുന്നത് കേരളം ഉള്പ്പെടെ ബിജെപി ഭരണമല്ലാത്ത സംസ്ഥാനങ്ങള്. കേന്ദ്ര ആരോഗ്യമന്ത്രാലയമാണ് ഇതുമായി ബന്ധപ്പെട്ട രേഖകള് പുറത്തുവിട്ടത്. രാജസ്ഥാന്, ഛത്തീസ്ഗഡ്, കേരളം എന്നിവയാണ് അവ.
2022-23 കാലയളവില് ഇന്ത്യയില് ഉടനീളമുള്ള സംസ്ഥാനങ്ങളും കേന്ദ്രഭരണപ്രദേശങ്ങളില് നിന്നുമായി 1.08 കോടി ജനങ്ങളാണ് പദ്ധതിയുടെ ഗുണം നേടിയത്. ഇതില് പശ്ചിമബംഗാള് പദ്ധതിയില് നിന്നും ഒഴിവാകുകയും ഒഡീഷയും ഡല്ഹിയും പദ്ധതിയുടെ ഭാഗമായി മാറിയിട്ടുമില്ല.
ബിജെപി ഭരണത്തില് ഇല്ലാത്ത രാജസ്ഥാനില് 13.66 ലക്ഷം പേരാണ് വിവിധ ആശുപത്രികളില് ഗുണഭോക്താക്കളായത്. ഛത്തീസ്ഗഡില് 10.73 ലക്ഷവും നിയമസഭയിലോ പാര്ലമെന്റിലോ തെരഞ്ഞെടുപ്പിലൂടെ ജയിച്ച ഒരു ബിജെപി ജനപ്രതിനി പോലുമില്ലാത്ത കേരളമാണ് പട്ടികയില് മൂന്നാമത്. 10.44 ലക്ഷം പേരും കേരളത്തില് ഗുണഭോക്താക്കളായി. നാലാം സ്ഥാനത്ത് 10.11 ലക്ഷവുമായി മദ്ധ്യപ്രദേശ് മൂന്നാം സ്ഥാനത്തും വന്നു. അതേസമയം ഇന്ത്യയിലെ ഏറ്റവും ജനസംഖ്യയുള്ള സംസ്ഥാനങ്ങളുടെ പട്ടികയിലുള്ള ഉത്തര്പ്രദേശും മഹാരാഷ്ട്രയും ഏറെ പിന്നിലാണ്.
ഉത്തര്പ്രദേശില് 6.65 ലക്ഷം പദ്ധതിയുടെ ഗുണം നേടിയപ്പോള് 97,301 പേരാണ് മഹാരാഷ്ട്രയില് പദ്ധതിയുടെ ഗുണം നേടിയത്. രാജ്യത്തെ രണ്ടാംതരത്തിലും മൂന്നാം തരത്തിലും വരുന്ന ആശുപത്രികളില് കുടുംബത്തിന് പരമാവധി അഞ്ച് ലക്ഷം രൂപ വരെ ഉറപ്പ് നല്കുന്ന ആരോഗ്യപദ്ധതിയണ് ആയുഷ്മാന് കീഴിലുള്ള ഭാരത് - പ്രധാനമന്ത്രി ജന് ആരോഗ്യ യോജന. 2018 സെപ്തംബറില് ആണ് പദ്ധതിയ്ക്ക് തുടക്കമിട്ടത്.
ഇതുവരെ 4.34 കോടി ആശുപത്രി പ്രവേശനങ്ങളാണ് നടന്നത്. ഇത് ഏകദേശം 51,749.40 കോടി രൂപ മൂല്യം വരുന്ന പ്രവര്ത്തനമായിരുന്നു. ഇത് ശരാശരി 11,924 രൂപയോളം വരും. പദ്ധതി പശ്ചിമബംഗാളിലാണ് തുടക്കമിട്ടത്. എന്നാല് 2019 ജനുവരി 19 ന് പശ്ചിമബംഗാള് സര്ക്കാര് പദ്ധതിയില് നിന്നും പിന്വാങ്ങി. പദ്ധതിയ്ക്ക് കീഴില് നാലു വര്ഷം കൊണ്ട് 28,000 ആശുപത്രികള് ഭാഗഭാക്കായി.
