ജീവിതത്തില് കഴിഞ്ഞ 50 വര്ഷമായി ലോട്ടറി എടുത്തുകൊണ്ടിരുന്ന ജോണ് ഹാരിസിനെ ഒടുവില് ഭാഗ്യം തുണച്ചു. കനേഡിയന് സ്വദേശിയായ ഇദ്ദേഹത്തിന് തന്റെ 80-ാം പിറന്നാള് ദിനമാണ് ഭാഗ്യം കനിഞ്ഞത്.
ഭാഗ്യം ലഭിച്ച ദിവസത്തെക്കുറിച്ച് ഓന്റാരിയോ ലോട്ടറി ഏജന്സിയോട് ജോണ് ഹാരിസ് പറഞ്ഞത് എനിക്കാ രാത്രി ഉറങ്ങാന് കഴിഞ്ഞില്ലെന്നാണ് . 1980 മുതലാണ് ജോണ് ഹാരിസ് ലോട്ടറിയില് ഭാഗ്യം പരീക്ഷിച്ചു തുടങ്ങിയത്.എന്നാല് ഇതിലൂടെ അദ്ദേഹത്തിന് മെച്ചമൊന്നും ഉണ്ടായിരുന്നില്ല. മധ്യവയസിലേക്ക് കടന്ന കാലത്ത് കുറച്ചധികം പണം ഒന്നിച്ച് ലഭിച്ചാല് അദ്ദേഹത്തിന് പല പദ്ധതികളും തുടങ്ങണമെന്ന് ആഗ്രഹമുണ്ടായിരുന്നു. എന്നാല്, ഓരോ തവണയും തന്നെ തേടി ഭാഗ്യം എത്താതായപ്പോഴും അടുത്ത തവണ ലഭിക്കുമെന്ന വിശ്വാസമായിരുന്നു ജോണിന്. അങ്ങനെ 50 വര്ഷത്തോളമായി അദ്ദേഹം സ്വന്തം ഭാഗ്യം പരീക്ഷിക്കുന്നു. ഒടുവില് 80 ാം വയസില് പിറന്നാള് ദിനം ഭാഗ്യം അദ്ദേഹത്തെ തേടിയെത്തി. ഒന്നും രണ്ടുമല്ല, ഒരു ലക്ഷം കനേഡിയന് ഡോളര് അതായത് 60 ലക്ഷത്തിനു മുകളില് ഇന്ത്യന് രൂപ.
ലോട്ടറി ഏജന്സിയായ മിനി മാര്ട്ടിന്റെ മുന്നിലെത്തിയപ്പോള് എന്നത്തെയും പോലെ തനിക്ക് ലോട്ടറി വാങ്ങാതിരിക്കാന് കഴിഞ്ഞില്ലെന്നാണ് അദ്ദേഹം പറയുന്നത്. 50 വര്ഷം ലോട്ടറിയെടുത്തിട്ട് ഒന്നും അടിച്ചില്ലല്ലോയെന്നൊന്നും അദ്ദേഹം ഓര്ത്തില്ല. പകരം 5 കനേഡിയന് ഡോളര് നല്കി ഒരു ലോട്ടറി എടുത്തു. പിറ്റേന്ന് അദ്ദേഹത്തിന്റെ പിറന്നാളായിരുന്നു. രാവിലെ ലോട്ടറി റിസള്ട്ട് വന്നപ്പോള്, പതിവ് പോലെ തന്നെ അദ്ദേഹം ടിക്കറ്റ് നമ്പര് ചുരണ്ടി നോക്കി ഒന്നാം സമ്മാനം അടിച്ച അതേ നമ്പര്, 32! അതെ തിരിച്ചും മറിച്ചും നോക്കിയിട്ടും 32. ഇന്സ്റ്റന്റ് ബിങ്കോ ലോട്ടറിയുടെ ഏറ്റവും ഉയര്ന്ന തുകയ്ക്കാണ് ജോണ് ഹാരിസ് അര്ഹനായത്. ലോട്ടറി തുക തന്റെ ജന്മദിന സമ്മാനമാണെന്നാണ് അദ്ദേഹം പറയുന്നത്. ഈ പണം ഉപയോഗിച്ച് വീട് നന്നാക്കും, ഒരു ഐ ഫോണ് വാങ്ങും. ബാക്കിയുള്ള പണം മകളുടെ വിവാഹത്തിനായി മാറ്റിവയ്ക്കുമെന്നും അദ്ദേഹം കൂട്ടിച്ചേര്ത്തു.
