കോഴിക്കോട്: ആദ്യം ജറുസലേമിലേക്കും പിറ്റേന്ന് ബത്ലഹേമിലേക്കും പോയെന്നും ഇസ്രായേലില് നിന്നും തിരികെ പോരുന്നതിന് മുമ്പായി പുണ്യസ്ഥലങ്ങള് സന്ദര്ശിക്കണമെന്ന് നേരത്തേ തന്നെ തീരുമാനിച്ചിരുന്നതായും ഇസ്രായേലില് നിന്നും കാണാതായ മലയാളി കര്ഷകന് ബിജു. ഇന്ന് പുലര്ച്ചെ നാലു മണിക്ക് ബിജു കോഴിക്കോട് വിമാനത്താവളത്തില് തിരിച്ചിറങ്ങിയിരുന്നു.
പുണ്യസ്ഥലങ്ങള് സന്ദര്ശിക്കുന്ന കാര്യം സംഘാംഗങ്ങളോട് പറയാതിരുന്നത് സമ്മതം ലഭിക്കുമോ എന്ന ആശങ്കയെ തുടര്ന്നായിരുന്നു. ഞായറാഴ്ചയായിരുന്നു ഇസ്രായേലില് നിന്നും മടങ്ങേണ്ടിയിരുന്ന ദിവസം. പുണ്യസ്ഥലങ്ങള് സന്ദര്ശിച്ച് ശനിയാഴ്ച തിരിച്ചുവരാന് ശ്രമിച്ചതാണ് വാട്സാപ്പ് വഴിയും മറ്റു മാധ്യമങ്ങള് വഴിയും ബന്ധപ്പെടാന് പ്രശ്നങ്ങള് നേരിടേണ്ടി വന്നു.
ഇന്റര്നെറ്റ് സൗകര്യം ലഭിക്കാത്തതും ഐഎസ്ഡി കോളുകള് വിളിക്കാന് കഴിയാതിരുന്നതിനാലുമാണ് വിവരം വേണ്ടവിധത്തില് അറിയിക്കാന് കഴിയാതെ പോയത്. ഇതോടെ അവിടെ തന്നെ തുടരേണ്ടി വരികയായിരുന്നു. താന് മുങ്ങിയെന്ന തരത്തില് സാമൂഹ്യമാധ്യമങ്ങളിലുണ്ടായ പ്രചരണം മനോവിഷമം ഉണ്ടാക്കി. നാട്ടില് നിന്നും സഹോദരന് അയച്ചുതന്ന ടിക്കറ്റിലാണ് തിരിച്ചെത്തിയത്. ഏതെങ്കില് ഏജന്സികള് പിടിക്കുകയോ തന്നെ ആരെങ്കിലും കണ്ടെത്തുകയോ ആയിരുന്നില്ല.
എന്താണ് ചെയ്യേണ്ടത് എന്നറിയാത്ത അവസ്ഥയായിരുന്നു. മോശമായ രീതിയിലായിരുന്നു ഓരോ കാര്യങ്ങള് വന്നത്. വിഷമമായതുകൊണ്ട് മറ്റ് കാര്യങ്ങളിലേക്ക് ശ്രദ്ധിക്കാനും പറ്റിയില്ല. ബഹ്റൈന് വഴിയുള്ള എയര് ഗള്ഫ് വിമാനത്തിലായിരുന്നു കരിപ്പൂര് വിമാനത്താവളത്തില് ബിജു എത്തിയത്. സഹോദരന് വിമാനത്താവളത്തില് ബിജുവിനെ സ്വീകരിച്ചു. ആധുനിക കൃഷിരീതി പഠിക്കാന് സംസ്ഥാന സര്ക്കാരിന്റെ സംഘത്തിനൊപ്പം പോയ ബിജുവിനെ ഇസ്രായേലില് ചെന്ന ശേഷം കാണാതായത് സംസ്ഥാനത്ത് വന് ചര്ച്ചയായി മാറിയിരുന്നു.
