കൊച്ചി: ബ്രഹ്മപുരം മാലിന്യപ്ലാന്റുമായി ബന്ധപ്പെട്ട വിഷയത്തില് കോടതിയില് നേരിട്ട് ഹാജരായി എറണാകുളം ജില്ലാ കളക്ടര് ഡോ. രേണുരാജ്. ബ്രഹ്മപുരത്തെ തീപിടിത്തം വന് വിവാദമായതിന് പിന്നാലെ രേണുരാജിനെ സര്ക്കാര് വയനാട്ടിലേക്കു സ്ഥലം മാറ്റിയിരുന്നു. പിന്നാലെയാണ് രേണുരാജ് നേരിട്ടു ഹാജരായത്. വിഷയത്തില് സ്വമേധയാ കേസെടുത്ത ഹൈക്കോടതി രേണുരാജിനോട് നേരിട്ട് ഹാജരാകാന് നിര്ദേശിച്ചിരുന്നു.
വിഷയത്തില് ഇന്നലെ ഉച്ചയ്ക്ക് ഹാജരാകണമെന്ന ഹൈക്കോടതി നിര്ദ്ദേശം പാലിക്കാതിരുന്നതില് കളക്ടറോട് കോടതി അതൃപ്തി രേഖപ്പെടുത്തിയിരുന്നു. ഇതോടെയാണ് രേണുരാജ് ഇന്ന് നേരിട്ട് കോടതിയിലെത്തിയത്. ഇന്ന് ഉച്ചയ്ക്ക് 1.45നു തന്നെ കലക്ടര് ഹൈക്കോടതിയിലെത്തി.
ബ്രഹ്മപുരം മാലിന്യപ്രശ്നം രൂക്ഷമായി തുടരുന്നതിനിടെ എറണാകുളം കളക്ടറായ രേണുരാജ് ഉള്പ്പെടെ ഏതാനും ഉദ്യോഗസ്ഥരെ സര്ക്കാര് സ്ഥലം മാറ്റിയിരുന്നു. എറണാകുളം കലക്ടര് രേണുരാജിനെ വയനാട്ടിലേക്കാണ് മാറ്റി നിയമിച്ചത്. ചീഫ് സെക്രട്ടറിയുടെ സ്റ്റാഫ് ഓഫീസറായ എന്.എസ്.കെ ഉമേഷ് ആണ് പുതിയ എറണാകുളം കളക്ടര്. രേണുരാജിനൊപ്പം കോര്പ്പറേഷന് സെക്രട്ടറിയും കോടതിയിലെത്തി.
പ്രഥമ പരിഗണന പൊതുജന താല്പര്യത്തിനാണെന്നും കേരളത്തെ മുഴുവന് ഒരു നഗരമായാണ് കാണുന്നത്. ഈ നഗരത്തില് മാലിന്യം കുമിഞ്ഞു കൂടാന് അനുവദിക്കില്ലെന്നും ഹൈക്കോടതി പറഞ്ഞു. വിഷയത്തില് അഡീഷനല് ചീഫ് സെക്രട്ടറി ശാരദ മുരളീധരന് ഓണ്ലൈനിലും ഹാജരായി.
