ദശലക്ഷക്കണക്കിന് ഡോളറിന്റെ വജ്ര ബിസിനസ് ചെയ്യുന്ന കുടുംബത്തിലെ എട്ടു വയസ്സുകാരി തല മുണ്ഡനം ചെയ്ത്, വിലകുറഞ്ഞ വെള്ളവസ്ത്രമണിഞ്ഞ് ദിവസം ഒരു തവണ മാത്രം ഭക്ഷണം കഴിച്ച് നഗ്നപാദയായി വീടുകള് തോറും കയറിയിറങ്ങി ഭിക്ഷ യാചിക്കും.
സൂററ്റിലെ വന്കിട വജ്രവ്യവസായി കുടുംബത്തിലെ മൂത്ത പുത്രി ദേവാംശിയാണ് ജൈനമതത്തിലെ ബാലദിക്ഷ സ്വീകരിച്ച് സന്യാസിനി ജീവിതം നയിക്കുന്നത്. സൂററ്റിലെ മറ്റ് ജൈന കുട്ടികള് പഠിക്കാന് പോകുകയും കെ. പോപ്പിനെ സ്നേഹിക്കുകയും കളിക്കോപ്പുകളുടെ പിന്നാലെ പോകുകയും ചെയ്യുമ്പോള് കഴിഞ്ഞ ജനുവരി മുതല് എട്ടു വയസ്സുകാരി ദേവാംശി സാംഘവി സന്യാസ ജീവിതത്തിന്റെ കഠിനവ്രതത്തിലാണ്.
ഈ ജനുവരിയിലായിരുന്നു ദേവാംശിയുടെ സന്യാസജീവിതത്തിലേക്കുള്ള പ്രവേശനം. സ്കൂളും ഏറ്റവും പ്രിയപ്പെട്ട കളിക്കോപ്പായ റൂബിക്സ് ക്യുബുമെല്ലാം ഇപ്പോള് ദേവാംശിയ്ക്ക് പഴങ്കഥയാണ്. വിലകൂടിയ ആഡംബര ബംഗ്ളാവ് വിട്ട് ജൈന സന്യാസികള് താമസിക്കുന്ന ഉപാശ്രയയില് മറ്റ് 80 സന്യാസിനിമാര്ക്കൊപ്പമാണ് ദേവാംശിയുടെ ഇപ്പോഴത്തെ താമസം. ലൈകീക ജീവിതത്തിന്റെ സുഖസൗകര്യങ്ങള് വെടിഞ്ഞ് നഗ്നപാദയായി വീടുകള് തോറും കയറിയിറങ്ങി ഭിക്ഷ യാചിക്കുന്നു.
സൂററ്റിലെ പ്രമുഖ വജ്രവ്യാപാരികളുടെ കുടുംബം വലിയ ചടങ്ങായിട്ടാണ് ദേവാംശിയുടെ സന്യാസദീക്ഷ സ്വീകരിക്കല് ചടങ്ങ് നടത്തിയത്. ആയിരത്തിലധികം അതിഥികള് എത്തിയിരുന്നു. അഞ്ചു ദിവസം നീണ്ട ചടങ്ങ് ഇന്ത്യയിലെ ചെലവേറിയ വിവാഹചടങ്ങിനേക്കാള് മോടിയിലായിരുന്നു.
രണ്ടു സഹോദരങ്ങളുടെ മൂത്തവളായ ദേവാംശി വില കൂടിയ വജ്രങ്ങളും ഒന്നാന്തരം പട്ടു വസ്ത്രങ്ങളും അണിഞ്ഞായിരുന്നു ചടങ്ങിന് എത്തിയത്. മുതിര്ന്ന ജൈന സന്യാസിമാരില് നിന്നും ദിക്ഷ സ്വീകരിച്ച് ചടങ്ങ് അവസാനിച്ചതോടെ ആഭരണങ്ങളും വിലകൂടിയ മുന്തിയ വസ്ത്രങ്ങളും അഴിച്ചുമാറ്റി. തലമുണ്ഡനം ചെയ്ത് ഉടുത്തിരുന്ന വെള്ളവസ്ത്രം തലയിലേക്ക് കൂടി മൂടിയിട്ടു. നടക്കുമ്പോള് ചെറു ജീവികള്ക്ക് പോലും ഉപദ്രവം ഉണ്ടാകാതിരിക്കാന് ബ്രഷ്കൊണ്ട് വഴി തൂത്തു തുടച്ചാണ് നടത്തം.
കടുത്ത ജൈനമത വിശ്വാസികളുടേതാണ് ദേവാംശിയുടെ സിംഗ്വി കുടുംബം. സൂര്യാസ്തമനത്തിന് ശേഷം ഭക്ഷണം കഴിക്കുന്ന പുലര്ച്ചെ മുതല് ധ്യാനം തുടങ്ങുന്ന സമായിക ഉള്പ്പെടെയുള്ള ജൈനമത തത്വങ്ങളില് അടിയുറച്ച് നില്ക്കുന്ന കടുത്ത വിശ്വാസികളാണ് സംഘ്വി കുടുംബം. സ്കൂള് വിദ്യാഭ്യാസത്തേക്കാള് ജൈന തത്വങ്ങളും ഉപദേശങ്ങളുമാണ് പ്രധാനമെന്ന് വിശ്വസിക്കുന്നവരാണ്.
സ്കൂളില് പഠന പാഠ്യേതര വിഷയങ്ങളില് ആവഗാഹമുള്ള മികച്ച വിദ്യാര്ത്ഥിനിയായിരുന്നു ദേവാംശി. റൂബിക് ക്യൂബ് മത്സരത്തില് സ്കൂളിലെ സ്വര്ണ്ണമെഡല് ജേതാവായ ദേവാംശി ഗണിതത്തില് മിടുമിടുക്കിയായിരുന്നു. ക്ലാസ് ടീച്ചര്ക്ക് ഏറ്റവും പ്രിയപ്പെട്ട വിദ്യാര്ത്ഥിനിയായ ദേവാംശിയ്ക്ക് അന്താരാഷ്ട്ര ടൂര്ണമെന്റുകള്ക്കായി അദ്ധ്യാപകര് പരിശീലനം നല്കിയിരുന്നു. കഴിഞ്ഞ വര്ഷം അന്താരാഷ്ട്ര സ്കൂളില് പ്രവേശനം കിട്ടിയ ദേവാംശി അവിടെ പഠിച്ചത് മൂന്നാംക്ലാസ്സ് വരെ മാത്രമാണ്.
അതേസമയം ബാല ദിക്ഷ എന്നത് ഇന്ത്യയില് വലിയ ചര്ച്ചകള്ക്ക് ഇരയായിട്ടുള്ള കാര്യമാണ്. സന്യാസ നിര്ദേശം അനുസരിച്ചുള്ള ചിട്ടകള് സാധാരണഗതിയില് കുട്ടികള്ക്ക് ഏറെ ബുദ്ധിമുട്ടുള്ള കാര്യമാണ്. ദിവസം ഒരു നേരഭക്ഷണം, കുളിക്കാതിരിക്കല്, നഗ്നപാദരായുള്ള സഞ്ചാരം സാങ്കേതിക വിദ്യയും സൗകര്യങ്ങളും വൈദ്യൂതിയും ഉള്പ്പെടെ എല്ലാ ആധുനികതയില് നിന്നും അകന്നുള്ള ജീവിതവും അത് നിര്ദേശിക്കുന്നു.
ദേവാംശിയുടെ ജീവിതം പെട്ടെന്നാണ് മാറിമറിഞ്ഞത്. വജ്രവ്യാപാരികളുടെ മകളായി രാജകുമാരിയെ പോലെയുള്ള സ്വന്തം ജീവിതമാണ് ദേവാംശി സന്യാസിനിയായി മാറിയത്. ദേവാംശിയുടെ കുടുംബത്തിന്റെ ഇപ്പോഴത്തെ മൂല്യം 60 ദശലക്ഷം ഡോളറാണ്. ഏകദേശം 500 കോടി രൂപയോളം വരും.
ഇന്ത്യയിലെ മതങ്ങളെ എടുത്തുനോക്കിയാല് ജൈന സമൂഹം വളരെ ചെറുതാണ്. 2014 ല് ഇവര്ക്ക് നരേന്ദ്രമോഡി സര്ക്കാര് ന്യൂനപക്ഷ പദവി നല്കിയിരുന്നു. 80 പേര് വരുന്ന സന്യാസിനി മഠത്തിലെ ഏറ്റവും പ്രായം കുറഞ്ഞയാളാണ് ദേവാംശി. ഉപാശ്രയയില് ദേവാംശിയെ 52 കാരിയായ പ്രായമുള്ള സന്യാസിനി സാധ്വി ജിന്പ്രഗ്യാംശ്രീ എന്ന എംബിഎക്കാരി പഠിപ്പിക്കും. കുടുംബത്തിന്റെ അതിവേഗം വളരുന്ന കണ്സ്യൂമര് ഗുഡ്സ് ബിസിനസ് 21 വര്ഷം മുമ്പ് വിട്ട് സന്യാസം സ്വീകരിച്ചയാളാണ് സാധ്വി.
