ബ്രഹ്മപുരം വിഷയത്തില് സംസ്ഥാന സര്ക്കാരിനെ വിമര്ശിച്ച് ദേശീയ ഹരിത ട്രൈബ്യൂണല്. ഭരണ നിര്വഹണത്തില് ഉണ്ടായ വീഴ്ചയാണ് ഇത്തരത്തിലൊരു സാഹചര്യത്തിനു വഴി തെളിയിച്ചത്. തീപിടിത്തത്തിനും അത് അണയ്ക്കുന്നതിലുണ്ടായ കാലതാമസത്തിനും ജനങ്ങളുടെ ആരോഗ്യത്തിനുണ്ടായ ഭീഷണിക്കുമുള്ള മുഴുവന് ഉത്തരവാദിത്തവും സര്ക്കാരിനു മാത്രമാണ്.
ഇത്രയും ആളുകള് ശാരീരികമായ പ്രയാസങ്ങള് ഏറെ അനുഭവിച്ചിട്ടും തീ അണയ്ക്കാന് വേണ്ട നടപടികള് വൈകിയതിനു സര്ക്കാള് ഉത്തരം നല്കണം. വിശദമായി പരിശോധിച്ച് വേണ്ട നടപടിയെടുക്കുമെന്നും ദേശീയ ഹരിത ട്രൈബ്യൂണല്. ആവശ്യം വന്നാല് 500 കോടി പിഴ ഈടാക്കുമെന്നും ഹരിത ട്രൈബ്യൂണല് സര്ക്കാരിന് മുന്നറിയിപ്പ് നല്കി.
സ്വമേധയാ എടുത്ത കേസില് ജസ്റ്റിസ് എകെ ഗോയല് അധ്യക്ഷനായ ബെഞ്ചിന്റേതാണ് വിമര്ശനം. മാധ്യമങ്ങളില് വന്ന വാര്ത്തകളുടെ അടിസ്ഥാനത്തിലാണ് ട്രൈബ്യൂണല് സ്വമേധയാ കേസെടുത്തത്. അഡീഷണല് ചീഫ് സെക്രട്ടറി വി.വേണുവും നടപടി ക്രമങ്ങളുടെ ഭാഗമായിരുന്നു. അദ്ദേഹത്തിന്റെ കൂടി സാന്നിധ്യത്തിലായിരുന്നു സംസ്ഥാന സര്ക്കാരിനെ നിശിതമായി വിമര്ശിച്ചത്.
അതേസമയം, ബ്രഹ്മപുരത്തെ തീ പൂര്ണമായും അണച്ചതായി സര്ക്കാര് ട്രൈബ്യൂണലിനെ അറിയിച്ചു. തീപിടിത്തത്തെ തുടര്ന്ന് സ്വീകരിച്ച നടപടികളും സര്ക്കാര് ട്രൈബ്യൂണലിനെ അറിയിച്ചിട്ടുണ്ട്. കേരള ഹൈക്കോടതി തീപ്പിടിത്തവുമായി ബന്ധപ്പെട്ട് സ്വമേധയാല് സര്ക്കാരിനെതിരെ കേസെടുത്തിട്ടുണ്ടെന്നും കേസിന്റെ നടപടിക്രമങ്ങള് നടക്കുന്നതിനാല് സമാന്തരമായ മറ്റൊരു കേസ് ട്രിബ്യൂണലിന്റെ ഭാഗത്തു നിന്നുമുണ്ടാകരുതെന്നുമാണ് സംസ്ഥാന സര്ക്കാരിനു വേണ്ടി ഹാജരായ അഭിഭാഷകര് ട്രിബ്യൂണല് മുമ്പാകെ അറിയിച്ചു. എന്നാല് ഈ ആവശ്യം പൂര്ണമായും അംഗീകരിക്കാന് പ്രിന്സിപ്പല് ബെഞ്ച് തയ്യാറായില്ല.
