ലോകകപ്പിലെ ദുരവസ്ഥ വീണ്ടും ഫുട്ബോളിലെ വമ്പന്മാരായ ജര്മ്മനിയെയും സ്പെയിനേയും വേട്ടയാടുന്നു. യൂറോ 2024 യോഗ്യതയ്ക്കുള്ള മത്സരത്തില് സ്പെയിന് സ്കോട്ട്ലന്റില് നിന്നും തോല്വി ഏറ്റുവാങ്ങിയപ്പോള് സൗഹൃദ മത്സരത്തില് ജര്മ്മനിയ്ക്ക് ബെല്ജിയത്തോട് പരാജയം നേരിട്ടു.
ഏകപക്ഷീയമായ രണ്ടു ഗോളുകള്ക്കാണ് സ്പെയിനെ സ്കോട്ട്ലന്റ് അട്ടിമറിച്ചത്. 7,51 മിനിറ്റുകളില് സ്കോട്ട് മക് ടോമിനേ നേടിയ ഗോളുകളിലായിരുന്നു സ്കോട്ലന്റിന്റെ ജയം. 39 വര്ഷത്തിന് ശേഷമാണ് സ്കോട്ലന്റ് സ്പെയിനെ ഒരു മത്സരത്തില് തോല്പ്പിക്കുന്നത്. ഗ്രൂപ്പ് എ യില് ആദ്യ രണ്ടു മത്സരങ്ങളും ജയിച്ച് സ്കോട്ലന്റ് ഒന്നാം സ്ഥാനത്ത് എത്തിയപ്പോള് സ്പെയിന് മൂന്ന് പോയിന്റുമായി രണ്ടാമതായി.
രണ്ടിനെതിരേ മൂന്ന്ഗോളുകള് അടിച്ചാണ് ബല്ജിയം ജര്മ്മനിയെ തോല്പ്പിച്ചത്. 2024 യൂറോയുടെ വേദിയാകുന്ന ജര്മ്മനിയ്ക്ക് എതിരേ പുതിയ പരിശീലകന് ഡൊമെനിക്കോ ടെഡെസ്കോയ്ക്ക് കീഴിലാണ് ബല്ജിയം കളിക്കാനെത്തിയത്. ഒരു ഗോളടിക്കുകയും രണ്ടുഗോളിന് വഴി വെയ്ക്കുകയും ചെയ്ത മാഞ്ചസ്റ്റര് സിറ്റി താരം കെവിന് ഡിബ്രൂയ്നെയുടെ പ്രകടനമായിരുന്നു ടീമിന് മുതല്ക്കൂട്ടായത്.
കരാസ്കോയ്ക്കു കളിയുടെ ആറാം മിനിറ്റിലും ലൂക്കാക്കുവിന് ഒമ്പതാം മിനിറ്റിലും അവസരം ഒരുക്കിക്കൊടുത്ത ഡിബ്രൂയ്നെ 78 ാം മിനിറ്റില് ടീമിനെ വിജയത്തിലേക്ക് നയിച്ച ഗോളും നേടി. 44 ാംമിനിറ്റില് ഫുള്ക്രഗും 87 ാം മിനിറ്റില് നാര്ബിയും ജര്മ്മനിയ്ക്കായി ഗോളുകള് നേടി. നാലു ദിവസത്തിനിടയില് ബെല്ജിയം നേടുന്ന രണ്ടാം വിജയമാണ് ഇത്. ലൂക്കാക്കുവിന്റെ ഹാട്രിക്കിന്റെ പിന്ബലത്തില് കഴിഞ്ഞ ദിവസം യൂറോപ്യന് യോഗ്യതാമത്സരത്തില് ബെല്ജിയം ജയിച്ചു കയറിയിരുന്നു.
