കൊച്ചി : പുത്തന്വേലിക്കര കൊലപാതകക്കേസില് പ്രതി റിപ്പര് ജയാനന്ദന്റെ വധശിക്ഷ ഹൈക്കോടതി റദ്ദാക്കി. ശിക്ഷയില് ഇളവ് വരുത്തിയ ഹൈക്കോടതി പ്രതി ജീവിതാവസാനം വരെ ജയിലില് കിടക്കട്ടെ എന്നും ഉത്തരവിട്ടു.
2006 ഒക്ടോബര് ഒന്നിന് പറവൂരിന് സമീപം പുത്തന്വേലിക്കരയില് ബേബി (ദേവകി)യെന്ന വീട്ടമ്മയെ കൊലപ്പെടുത്തിയെന്നും ഭര്ത്താവ് രാമകൃഷ്ണനെ വധിക്കാന് ശ്രമിച്ചുവെന്നുമാണ് കേസ്. കുറ്റകൃത്യത്തിന് ദൃക്സാക്ഷികള് ആരുമില്ലാതിരുന്നതിനാല് സാഹചര്യത്തെളിവുകളെ മാത്രമാണ് പ്രോസിക്യൂട്ടര് ആശ്രയിച്ചത്. പ്രതി തെളിവുകള് നശിപ്പിക്കാന് ശ്രമിച്ചതും പ്രോസിക്യൂട്ടര് കോടതിയുടെ ശ്രദ്ധയില്പ്പെടുത്തിയിരുന്നു.
മാള ഇരട്ടക്കൊലക്കേസില് ജയാനന്ദന് പ്രതിയായിരുന്നുവെങ്കിലും തെളിവുകളുടെ അഭാവത്തില് ഒന്നര വര്ഷം മുമ്പ് കോടതി വെറുതെ വിട്ടിരുന്നു. ആളുകളെ തലയ്ക്കടിച്ച് പരിക്കേല്പ്പിക്കുന്നതിനാല് പ്രതിയെ റിപ്പര് ജയാനന്ദന് എന്നാണ് നാട്ടുകാര് വിളിച്ചിരുന്നത്.
