കൊച്ചി: എലത്തൂര് ട്രെയിന് തീവയ്പ്പ് സംഭവത്തിന്റെ പശ്ചാത്തലത്തില് പോപ്പുലര് ഫ്രണ്ട് സ്വാധീന മേഖലകളിലെ ചെറുഗ്രൂപ്പുകളെ നിരീക്ഷിക്കാന് കേന്ദ്ര ഇന്റലിജന്സ് നിര്ദേശം. നിരോധിച്ചശേഷം പി.എഫ്.ഐ. പ്രവര്ത്തകര് ചെറുഗ്രൂപ്പുകളായി തിരിഞ്ഞു നിലനില്ക്കുന്നതായി വിവരമുണ്ട്. ഇത്തരം ഗ്രൂപ്പുകളെ നിരീക്ഷിക്കണമെന്നാണു നിര്ദേശം.
പൊതുസമൂഹത്തില് ഭീതിപരത്തുന്ന ഒറ്റപ്പെട്ട ആക്രമങ്ങള് ഉണ്ടാക്കുകയാണു ചെറുഗൂപ്പുകള്ക്കുള്ള നിര്ദേശം. ഇലത്തൂരിലെ തീവണ്ടി ആക്രമണത്തിനും പിന്നിലും ഇത്തരം ചെറുഗ്രൂപ്പാണെന്നാണു നിഗമനം. രണ്ടോ നാലോ പേരടങ്ങിയതായിരിക്കും ഇത്തരം ചെറുഗ്രൂപ്പുകള്. ഇലത്തൂര് തീവയ്പ് സംഭവത്തിലെ പ്രതി ഷാരൂഖ് സെയ്ഫി ഇത്തരം സംഘത്തിലെ അംഗമാണെന്നു സംശയിക്കുന്നു. ചെറുഗ്രൂപ്പുകള്ക്കു സ്വന്തം നിലയില് പദ്ധതി ആസൂത്രണം ചെയ്തു നടപ്പാക്കാന് അനുമതി നല്കിയിട്ടുണ്ട്. പിടിക്കപ്പെട്ടാല്, ഗ്രൂപ്പ് അംഗങ്ങളില് മാത്രമായി അന്വേഷണം ഒതുങ്ങുമെന്നതാണു ചെറുഗ്രൂപ്പുകളുടെ പ്രത്യേകത. ഒരിക്കലും നേതൃത്വത്തിലേക്ക് അന്വേഷണം എത്തില്ല.
മാത്രമല്ല, മുതിര്ന്ന നേതാക്കളുമായും ഗ്രൂപ്പിലെ അംഗങ്ങള്ക്ക് യാതൊരു ബന്ധവുമുണ്ടാകില്ല. പെട്ടെന്ന് ആക്രമണം നടത്തി ജനങ്ങളില് ''സൈക്കോളജിക്കല് ട്രോമ'' സൃഷ്ടിക്കുകയാണു ഇവരുടെ പ്രവര്ത്തനരീതി. ട്രെയിനില് സഞ്ചരിക്കുന്നതില് പൊതുജനത്തിനു ഭീതിയുണ്ടാക്കി സമൂഹത്തില് എപ്പോഴും ഭീതിയും അരക്ഷിതാവസ്ഥയും നിലനിര്ത്തി ആളുകളെ കൊല്ലാതെ കൊല്ലുകയാണ് ഇവരുടെ ലക്ഷ്യം. ഇടയ്ക്കിടയ്ക്കു ഇത്തരത്തിലുള്ള ഒറ്റയാള് സ്ഫാടനങ്ങളും ആക്രമണങ്ങളും നടത്തുന്നതും ഇവരുടെ പ്രവര്ത്തനരീതിയാണ്.
പി.എഫ്.ഐ. നിരോധനത്തിനുശേഷം കോയമ്പത്തൂരിലും ബംഗളുരുവിലുമുണ്ടായ സ്ഫോടനങ്ങള് ഇത്തരത്തിലുള്ള ചെറുഗ്രൂപ്പുകള് നടത്തിയതാണെന്നാണു കേന്ദ്ര ഇന്റലിജന്സ് വിലയിരുത്തല്. വേണ്ടത്ര പരിചയവും തയാറെടുപ്പുമില്ലാത്തതിനാലായിരുന്നു ഉദ്ദേശിച്ച രീതിയില് ആക്രമണം നടക്കാതെ പോയത്. ഇത്തരം കൃത്യം നടത്തിയ കണ്ണികളെ കണ്ടെത്തുകയാണു പ്രയാസം. ഒരാഴ്ചത്തെ ആസൂത്രണം മാത്രമേ ഇത്തരം ആക്രമങ്ങള്ക്കുള്ളൂ. ഒന്നോ രണ്ടോപേര് മാത്രമേ ഇതറിയൂ. കൃത്യം നടത്തികഴിഞ്ഞാല്, വിവരം മറ്റു ഗ്രൂപ്പുകള് തിരിച്ചറിയുന്നു.
പി.എഫ്.ഐയുടെ രഹസ്യ അജന്ഡ നടപ്പാക്കാനുള്ള ഉപകരണങ്ങളായാണു ചെറുഗ്രൂപ്പുകളെ കാണുന്നത്. ഇവയുടെ പ്രവര്ത്തനങ്ങള് നിയന്ത്രിക്കുന്നതു പോപ്പുലര് ഫ്രണ്ട് അംഗങ്ങള് തന്നെയാണ്. യുവാക്കള്, വിദ്യാര്ഥികള്, സ്ത്രീകള്, ഇമാമുമാര്, അഭിഭാഷകര്, സമൂഹത്തിലെ ദുര്ബലര് തുടങ്ങിയവരില് തങ്ങളുടെ സ്വാധീനവും പ്രവര്ത്തനവും വ്യാപിപ്പിക്കാന് പോഷക സംഘടനകളും പ്രവര്ത്തിക്കുന്നുണ്ട്. ഫണ്ട് സമാഹരിക്കാനും ഇവയെ ഉപയോഗപ്പെടുത്തുന്നു. ഈ ഫണ്ട് ഉപയോഗിച്ചാണു നിയമവിരുദ്ധ പ്രവര്ത്തനങ്ങള് നടത്തുന്നതെന്നാണു ഐ.ബി. നിഗമനം.
