കോഴിക്കോട്: ഇന്ത്യയുടെ ശത്രുക്കള് ക്രിസ്ത്യാനികളെന്ന് പറഞ്ഞ വിചാരധാര തള്ളിക്കളയാന് ബിജെപി തയ്യാറുണ്ടോയെന്ന് മന്ത്രി പിഎ മുഹമ്മദ് റിയാസ്. ഈസ്റ്റര്ദിനത്തിലെ സന്ദര്ശന പരിപാടിയ്ക്ക് പിന്നാലെ വിഷു ദിനത്തില് തങ്ങളുടെ വീട്ടിലേക്ക് ക്രിസ്ത്യാനികളെ ക്ഷണിക്കാന് ബിജെപി ആലോചിക്കുമ്പോഴാണ് വിമര്ശനവുമായി മന്ത്രി രംഗത്ത് വന്നിരിക്കുന്നത്.
ഇന്ത്യയില് ക്രിസ്ത്യാനികള് നിരന്തരം ആക്രമിക്കപ്പെടുന്നത് സൂചിപ്പിച്ച മുഹമ്മദ് റിയാസ് വിചാരധാരയുടെ ആശയത്തില് പ്രചോദനം കൊണ്ടാണ് രാജ്യത്ത് ക്രിസ്ത്യാനികള്ക്ക് എതിരെ ആക്രമണങ്ങള് നടക്കുന്നത് എന്നും പറഞ്ഞു. അത്തരം ആക്രമണ സംഭവങ്ങളില് അക്രമികള്ക്കെതിരെ കേസെടുക്കാന് പോലും പലയിടത്തും പൊലീസ് തയാറാവുന്നില്ലെന്നും സര്ക്കാര് സ്പോണ്സേര്ഡ് പ്രോഗ്രാമാണ് ഇവിടെയെല്ലാം നടന്നതെന്നും മുഹമ്മദ് റിയാസ് പറഞ്ഞു.
സംഘപരിവാറിന്റെ മുഖഗ്രന്ഥമായ വിചാരധാരയില് മുന്ന് ശത്രുക്കളെക്കുറിച്ചാണ് പറയുന്നത്. ഇതില് ഏറ്റവും പ്രധാനമായി കാണുന്നത് ക്രിസ്ത്യാനികളെയാണ്. വിചാരധാരയെ ആസ്പദമാക്കി രാജ്യത്ത് ഇതുവരെ 598 ആക്രമണമാണ് ക്രിസ്ത്യാനികള്ക്ക് നേരെ നടന്നത്. ഈസ്റ്ററിന് വീടുകള് സന്ദര്ശിക്കുന്ന ബിജെപി നേതാക്കള്ക്ക് വിചാരധാര വായിച്ചാണ് ക്രിസ്ത്യാനികള് മറുപടി നല്കുന്നതെന്നും പറഞ്ഞു.
ക്രിസ്ത്യന് സമൂഹത്തിലുള്ളവര്ക്ക് ചോദ്യം ചോദിക്കാനുള്ള അവസരമാണിതെന്നു വിമര്ശിച്ച റിയാസ് ഗ്രഹാം സ്റ്റെയ്നെ ആക്രമിച്ചവരെ ബിജെപി തള്ളിപ്പറഞ്ഞിട്ടില്ലെന്നും ചൂണ്ടിക്കാട്ടി. അതേസമയം ആദ്യ പരിപാടി വന്വിജയമെന്ന് കണക്കുകൂട്ടുന്ന ബിജെപി ക്രൈസ്തവ വിശ്വാസികളുടെ ഭവന സന്ദര്ശനം പോലുള്ള പരിപാടികള് തുടര്ന്നും സംഘടിപ്പിക്കാന് ആലോചിക്കുകയാണ്. കേരളത്തിലും വടക്ക് കിഴക്കന് സംസ്ഥാനങ്ങളിലും ക്രൈസ്തവ വിഭാഗങ്ങളെ തങ്ങളുമായി അടുപ്പിക്കാനാണ് ബിജെപി ആലോചിക്കുന്നത്.
