ബെറേയ്ലി: ശുദ്ധീകരിക്കപ്പെടാത്ത ചൂടന് ഗോമൂത്രത്തില് അനാരോഗ്യപരമായ ബാക്ടീരിയകള് അടങ്ങിയിരിക്കുന്നതിനാല് അത് മനുഷ്യരുടെ ആരോഗ്യത്തിന് അനുയോജ്യമല്ലെന്ന് ഗവേഷകര്. ഇന്ത്യയിലെ മൃഗഗവേഷണ കേന്ദ്രമായ ബെറെയ്ലിയിലെ ഐകാര് ഇന്ത്യന് വെറ്റിനറി റിസര്ച്ച് ഇന്സ്റ്റിറ്റ്യൂട്ട് (ഐവിആര്ഐ)ആണ് ഈ വിവരം പുറത്തുവിട്ടിരിക്കുന്നത്. ഗോമൂത്രത്തില് മനുഷ്യരുടെ ആരോഗ്യത്തിന് ഹാനികരമായ ബാക്ടീരിയകളുടെ സാന്നിദ്ധ്യം വളരെ കൂടുതല് ആണെന്നാണ് ഇന്സ്റ്റിറ്റിയുട്ട് പറയുന്നത്.
അതേസമയം ചില ബാക്ടീരിയകളുടെ സാന്നിദ്ധ്യം ഉണ്ടെങ്കിലും പശുവിന്റെ മൂത്രത്തേക്കാള് കാളയുടെ മൂത്രം കൂടുതല് ഫലപ്രദമാണെന്നും പറയുന്നു. ഇന്സ്റ്റിറ്റ്യൂട്ടിലെ പ്രധാന ഗവേഷകന് ഭോജ്രാജ് സിംഗ് നയിച്ച ഗവേഷണത്തില് മൂന്ന് പിഎച്ച്ഡി വിദ്യാര്ത്ഥികളും പങ്കാളികളായിരുന്നു. ആരോഗ്യത്തോടെയുള്ള പശുക്കളുടെയും കാളകളുടേയും മൂത്രമാണ് ഗവേഷണത്തിനായി ശേഖരിച്ചത്. ഇതില് മനുഷ്യരുടെ ആരോഗ്യം മോശമാക്കുന്ന 14 തരം ബാക്ടീരിയകളെയാണ് കണ്ടെത്തിയത്. മനുഷ്യരുടെ വയറ്റില് അണുബാധയ്ക്ക് കാരണമാകുന്ന ഇ കോളി ബാക്ടീരിയകളുടെ സാന്നിദ്ധ്യവും കണ്ടെത്തി.
റിസര്ച്ച്ഗേറ്റ് എന്ന തങ്ങളുടെ വെബ്സൈറ്റില് കണ്ടെത്തലുകളും വിലയിരുത്തലുകളും പ്രസിദ്ധീകരിച്ചിട്ടുണ്ട്. ഇന്സ്റ്റിറ്റ്യൂട്ടിലെ എപ്പിഡെമിയോളജി വകുപ്പിന്റെ തലവനാണ് ഭോജ്രാജ് സിംഗ്. മനുഷ്യരില് ബാക്ടീരിയയെ പ്രതിരോധിക്കാനുള്ള ശേഷി പരിശോധിക്കാന് പശുവിന്റെയും കാളയുടേയും 73 മൂത്രസാമ്പിളുകളാണ് എടുത്തത്. ഇതില് നടത്തിയ പരിശോധനയില് ഇക്കാര്യത്തില് പശുവിനേക്കാള് ശക്തി കാളയുടെ മൂത്രത്തിനാണെന്ന് കണ്ടെത്തി. സമീപത്തെ പ്രാദേശിക ഡെയറി ഫാമില് നിന്നുമാണ് സാംപിളുകള് ശേഖരിച്ചത്.
2022 ജൂണിനും നവംബറിനും ഇടയില് മനുഷ്യന്റെയും കാളയുടേയും മൂത്ര സാമ്പിളുകള്ക്ക് ഒപ്പം സഹിവാള്, താര്പാര്ക്കര്, വിന്ദാവനി (സങ്കരയിനം) എന്നിങ്ങനെ മൂന്ന് തരത്തിലുള്ള പശുക്കളുടെ മൂത്ര സാമ്പിളുകളാണ് ശേഖരിച്ചത്. സാധാരണഗതിയില് പശുക്കളുടെ മൂത്രം അണുവിമുക്തമാണെന്നാണ് പൊതുവായി കരുതപ്പെടുന്നത്. സംസ്ക്കരിക്കാത്ത ഗോമൂത്രം ഇന്ത്യന് വിപണിയില് വലിയ രീതിയില് വിറ്റഴിക്കപ്പെടുന്നുണ്ട്. ഭക്ഷ്യസുരക്ഷാ വിഭാഗത്തിന്റെയോ ഇന്ത്യയുടെ നിലവാര അതോറിറ്റിയുടേയോ അനുമതി കൂടാതെയാണ് പല വിതരണക്കാരും ഇവ വിപണിയില് എത്തിക്കുന്നത്.
അതേസമയം ശുദ്ധീകരിച്ച ഗോമൂത്രം മനുഷ്യരുടെ പ്രതിരോധശേഷി കൂട്ടുമെന്നും കാന്സറിനെയും കോവിഡിനെയും വരെ പ്രതിരോധിക്കുമെന്നുമാണ് തന്റെ 25 വര്ഷത്തെ ഗവേഷണത്തില് നിന്നും മനസ്സിലാക്കാന് കഴിഞ്ഞതെന്ന് ഐവിആര്ഐ ആര്.എസ്. ചൗഹാനെ ഉദ്ധരിച്ച് ടൈംസ് ഓഫ് ഇന്ത്യ പുറത്തുവിട്ടിരിക്കുന്ന റിപ്പോര്ട്ടില് പറഞ്ഞിരിക്കുന്നത്. അതേസമയം ശുദ്ധീകരിച്ച ഗോമൂത്രം മനുഷ്യര്ക്ക് കുടിക്കാമോ എന്ന കാര്യത്തിലുളള ഗവേഷണം കൂടി നടക്കേണ്ടതുണ്ടെന്നും ഇദ്ദേഹം പറഞ്ഞിട്ടുണ്ട്.
