ലക്നൗ: വര്ഷങ്ങള്ക്ക് മുമ്പ് സ്വന്തം നാവുകൊണ്ടു പറഞ്ഞത് അറം പറ്റുമെന്ന് ക്രിമിനല് രാഷ്ട്രീയക്കാരന് എന്നറിയപ്പെടുന്ന ആതീഖ് അഹമ്മദ് ഒരിക്കലും ചിന്തിച്ചിട്ടുണ്ടാകില്ല. 2004 ല് ഒരു തെരഞ്ഞെടുപ്പ് റാലിയില് ആതീഖ് സ്വന്തം മരണത്തെക്കുറിച്ച് പ്രവചിച്ചത് ശനിയാഴ്ച രാത്രി അക്ഷരംപ്രതി ശരിയായി. സമാജ്വാദി പാര്ട്ടിയുടെ സ്ഥാനാര്ത്ഥിയായി മുലയാംസിംഗ് യാദവിന് കീഴില് ജയിച്ച ഫുല്പ്പൂരിലെ തെരഞ്ഞെടുപ്പ് റാലിയിലായിരുന്നു തന്റെ മരണം ആതീഖ് മൂന്കൂട്ടി കണ്ടത്.
ശനിയാഴ്ച കൈവിലങ്ങിട്ട ആതീഖിനെയും സഹോദരനെയും വെടിയേറ്റ് രക്തത്തില് കുളിച്ച നിലയില് പ്രാദേശിക ആശുപത്രിയുടെ മുന്നില് കണ്ടെത്തുകയായിരുന്നു. തന്റെ ഭീതിയിലും ചെയ്തു വന്നിരുന്ന ക്രിമിനല് പ്രവര്ത്തികളുടെ പശ്ചാത്തലത്തില് നിന്നുള്ള ഉള്ക്കാഴ്ചയില് നിന്നുമായിരിക്കാം ആതീഖ് 2004 ല് ഇങ്ങിനെ പറഞ്ഞിട്ടുണ്ടാകുക. ഒരു തവണ സമാജ്വാദി പാര്ട്ടി എംപിയും അഞ്ചു തവണ എംഎല്എയുമായ ആതീഖ് ജനപ്രതിനിധി ആകുന്നതും ജയിലില് കിടക്കുന്നതും ഒരു പോലെ ഇഷ്ടപ്പെട്ടിരുന്നതായിട്ടാണ് അദ്ദേഹത്തിന്റെ വാക്കുകള് സൂചിപ്പിക്കുന്നത്.
തന്നെ ജവഹര്ലാല് നെഹ്രുവിനോടായിരുന്നു സ്വയം ഉപമിച്ചിരുന്നത്. ''നെഹ്രുവിനെ പോലെ ഞാനും നെയ്നി ജയിലില് കിടന്നിട്ടുണ്ട്. അവിടെയിരുന്ന് അദ്ദേഹം പുസ്തകം എഴുതിയിട്ടുണ്ട്. ഞാന് ജയിലിലേക്ക് പോയതും എന്റെ ചരിത്രം കൊണ്ടാണ്.'' ആതീഖ് പതിവായി ഈ തമാശ പറയുമായിരുന്നു. മാധ്യമങ്ങള്ക്ക് മുന്നില് എല്ലായ്പ്പോഴും തന്റെ ഭീതി ആതീഖ് പങ്കുവെച്ചിരുന്നു.
''ഞങ്ങള് ക്രിമിനലുകള്ക്ക് ഞങ്ങളുടെ വിധി എന്താണെന്ന് കൃത്യമായിട്ട് അറിയാം. അനിവാര്യമായ ആ കാര്യം വൈകിപ്പിക്കാനും മാറ്റി വെയ്ക്കാനുമുള്ള കഠിനമായ പോരാട്ടമാണ് ഓരോ ദിവസവും. '' ആതീഖ് ഒരിക്കല് പറഞ്ഞു. സമാജ്വാദി പാര്ട്ടിയ്ക്കൊപ്പമായിരുന്നു ആതീഖ് ഒരു തവണ എംപിയായത്. പിന്നീട് ഒരു തവണ എസ്പിയുടേയും മറ്റൊരിക്കല് അപ്നാദളിന്റെയും മറ്റ് മൂന്ന് തവണ സ്വതന്ത്രനായും അലഹബാദ് സീറ്റില് നിന്നും ജയിച്ചു. ജവഹര്ലാല് നെഹ്രു പ്രതിനിധീകരിച്ച മണ്ഡലം ആയതിനാല് ഫുല്പ്പൂരിനെ പ്രതിനിധീകരിക്കാനായിരുന്നു ആതിഖിന് ഏറെയിഷ്ടം. സ്വാതന്ത്ര്യപോരാട്ട കാലഘട്ടത്തില് നെഹ്രു കിടന്ന നെയ്നി ജയിലില് കിടക്കേണ്ടി വരുന്നതിനെയും ആതീഖ് അഭിമാനത്തോടെ കണ്ടിരുന്നു.
