കൊല്ക്കത്ത: രാജ്യത്തെ വെട്ടിമുറിക്കാന് താന് സമ്മതിക്കില്ലെന്നും അതിന് വേണ്ടി ജീവന് പോലും നല്കാന് തയ്യാറാണെന്നും പശ്ചിമബംഗാള് മുഖ്യമന്ത്രി മമതാബാനര്ജി. ജീവന് ബലി നല്കേണ്ടി വന്നാല് പോലും താന് രാജ്യത്തെ വിഭജിക്കാന് അനുവദിക്കില്ലെന്നും പറഞ്ഞു. കൊല്ക്കത്തയില് നടന്ന ഈദ് ഉല് ഫിത്തര് ആഘോഷവുമായി ബന്ധപ്പെട്ട പരിപാടിയിലാണ് മമതയുടെ പ്രഖ്യാപനം.
ബിജെപിയെ അധികാരത്തില് എത്തിച്ചാല് അടുത്ത രാംനവമിയില് യാതൊരു കുഴപ്പവും കൂടാതെ റാലിനടത്താന് സാഹചര്യം ഉണ്ടാകുമെന്ന് കഴിഞ്ഞയാഴ്ചയാണ് മമതാ ബാനര്ജി പറഞ്ഞത്.
ബംഗാളില് സമാധാനമാണ് വേണ്ടതെന്നും കലാപമല്ലെന്നും രാജ്യത്തെ വിഭജിക്കാന് ആഗ്രഹിക്കുന്നില്ലെന്നും പറഞ്ഞു. രാജ്യത്ത് വിഭജനം സൃഷ്ടിക്കാനാണ് അവര്ക്ക് താല്പ്പര്യമെന്ന് ബിജെപിയെ പേരെടുത്ത് വിമര്ശിക്കാതെ മമത പറഞ്ഞു. എന്നാല് രാജ്യത്തെ വെട്ടിമുറിക്കാതിരിക്കാന് താന് ജീവന് പോലും നല്കാന് തയ്യാറാണെന്നും ഈദില് താന് വാഗ്ദാനം ചെയ്യുന്നതായും പറഞ്ഞു.
ഈ മാസം ആദ്യം നടന്ന രാംനവമി ആഘോഷങ്ങളുമായി ബന്ധപ്പെട്ട് പല സ്ഥലങ്ങളിലും കലാപം റിപ്പോര്ട്ട് ചെയ്യപ്പെടുന്നുണ്ട്. സമാധാനപരമായി ഇരിക്കാന് ആരും പറയുന്നത് നിങ്ങള് കേള്ക്കാതിരുന്നാല് മതി. ഒറ്റുകാരുടെ പാര്ട്ടിയുമായിട്ടാണ് താന് ഏറ്റുമുട്ടുന്നത്. ഏജന്സികളുമായും ഏറ്റുമുട്ടേണ്ടി വരുന്നു. എന്നാല് പോരാടാന് എനിക്ക് ധൈര്യമുണ്ട്. താന് തളരില്ലെന്നും പറഞ്ഞു.
മുസ്ളീം വോട്ടുകള് ഭിന്നിപ്പിക്കാമെന്ന് പറഞ്ഞ് ബിജെപിയില് നിന്നും ആളുകള് പണം വാങ്ങുന്നുണ്ട്. എന്നാല് ബിജെപിയ്ക്ക് വേണ്ടി മുസ്ളീംവോട്ടുകള് ഭിന്നിപ്പിക്കാന് അവര്ക്ക് ധൈര്യമില്ല. തെരഞ്ഞെടുപ്പിന് ഒരു വര്ഷം കൂടി മാത്രമുള്ളപ്പോള് ആര് തെരഞ്ഞെടുക്കപ്പെടുമെന്ന് നിങ്ങള് കണ്ടുകൊള്ളാനും മമത ജനക്കൂട്ടത്തോട് പറഞ്ഞു. എന്തെല്ലാം കടന്നുപോയാലും ജനാധിപത്യം നിലനില്ക്കും. ഇപ്പോള് ഭരണഘടന മാറ്റിക്കൊണ്ടിരിക്കുകയാണ്. ചരിത്രം മാറ്റിക്കൊണ്ടിരിക്കുകയാണ്. അവര് എന്ആര്സി കൊണ്ടുവന്നു. എന്നാല് ഞാന് ഇതിനൊന്നും അനുവദിക്കില്ലെന്നും മമത പറഞ്ഞു.
2024 ല് ബിജെപി ജയിച്ചുകഴിഞ്ഞാല് ബംഗാളില് ആരും ആക്രമിക്കാതെ രാംനവമി റാലികള് നടത്താനാകുമെന്ന് കഴിഞ്ഞയാഴ്ച ആഭ്യന്തരമന്ത്രി അമിത്ഷാ പറഞ്ഞിരുന്നു. ബിര്ഭൂമില് ജനസമ്പര്ക്ക സാമവേശ് റാലിയെ അഭിസംബോധന ചെയ്യുമ്പോഴായിരുന്നു അമിത്ഷാ ഇക്കാര്യം പറഞ്ഞത്. തന്റെ മരുമകനെ അടുത്ത മുഖ്യമന്ത്രിയാക്കാനാണ് മമത ശ്രമിക്കുന്നതെന്നും കുറ്റപ്പെടുത്തിയിരുന്നു.
ബംഗാളിനെ ഭീകരമുക്തമാക്കാനുള്ള ഏകവഴി ബിജെപി മാത്രമാണെന്നും 2024 തെരഞ്ഞെടുപ്പില് അതുകൊണ്ട് എല്ലാവരും ബിജെപിയ്ക്ക് വോട്ടു ചെയ്യണമെന്നും അമിത്ഷാ പറഞ്ഞു. 2024 ല് തങ്ങള്ക്ക് 35 സീറ്റുകള് നല്കിയാല് ബംഗാളിനെ തീവ്രവാദ വിരുദ്ധമാക്കും. അങ്ങിനെ വന്നാല് മമതാദീതിയുടെ സര്ക്കാരിനെ 2025 ന് മുമ്പ് തന്നെ തകര്ത്തുകാണിക്കാമെന്നും ഷാ പറഞ്ഞു.
