ബോളിവുഡ് സിനിമാപ്രേക്ഷകരുടെ ഇഷ്ടദമ്പതിമാരാണ് ആലിയഭട്ടും രണ്ബീര് കപൂറും. ദീര്ഘകാലത്തെ പ്രണയത്തിനും ഡേറ്റിംഗിനും ശേഷമാണ് ഇവര് ഒരു സ്വകാര്യ ചടങ്ങിലൂടെ വിവാഹിതരായത്. കഴിഞ്ഞ നവംബറില് ആലിയയ്ക്കും രണ്ബീറിനും രാഹ കപൂര് എന്നൊരു മകളും ജനിച്ചു. മകളുടെ വിശേഷങ്ങളും മറ്റും സോഷ്യല് മീഡിയയിലൂടെ പങ്കിടാറുളള ആലിയ ഇതുവരെ കുഞ്ഞിന്റെ മുഖം വെളിപ്പെടുത്തിയിട്ടില്ല. ഇപ്പോഴിതാ അച്ഛന് രണ്ബീറിന്റെയും മകള് രാഹയുടെയും ക്യൂട്ടായ ഒരു ചിത്രം പങ്കിട്ടിരിക്കുകയാണ് ആലിയ. മകൾ രാഹയ്ക്കൊപ്പം ഹൃദയസ്പർശിയായ നിമിഷം പങ്കിടുന്ന രൺബീറിന്റെ ചിത്രമാണത്. ബേബി സ്ട്രോളറിൽ തന്റെ അരികിൽ ഇരിക്കുന്ന രാഹയെ രൺബീർ നോക്കുകയാണ് ചിത്രത്തില്. രാഹയുടെ മുഖം കാണാനില്ലെങ്കിലും രൺബീറിന്റെ ഭാവങ്ങൾ വ്യക്തമാണ്. തന്റെ പിന്നില് നില്ക്കുന്ന രഹസ്യ ഫോട്ടോഗ്രാഫറെക്കുറിച്ച് രൺബീർ അറിയാതെ നിന്ന നിമിഷമാണ് ആലിയ പകര്ത്തിയിരിക്കുന്നത്. ‘‘നവംബർ 6 മുതൽ ഞാൻ മികച്ച ഫോട്ടോഗ്രാഫറായി മാറിയെന്ന് ഞാൻ കരുതുന്നു...’’ എന്നാണ് ആലിയ ചിത്രത്തിനൊപ്പം കുറിച്ചത്. മകളുടെ ജനനത്തീയതി പരാമർശിക്കുന്ന മോണോക്രോം ചിത്രങ്ങളാണ് ആലിയ പങ്കുവച്ചിരിക്കുന്നത്.
