ബെംഗളൂരു: കേരളത്തിലേക്ക് വരാന് ജാമ്യവവസ്ഥയില് അനുമതി ലഭിച്ച പിഡിപി ചെയര്മാന് അബ്ദുള് നാസര് മദനിയുടെ യാത്ര അനിശ്ചിതമായി തന്നെ തുടരുന്നു. യാത്രയ്ക്ക് 60 ലക്ഷം രൂപ അടയ്ക്കണമെന്ന് കര്ണാടക പോലീസ് ആവശ്യപ്പെട്ടിരിക്കുകയാണ്. ഇത് വിചിത്രമായ വാദമെന്നാണ് മദനിയുടെ പ്രതികരണം.കര്ണാടക പോലീസ് ആവശ്യപ്പെട്ട അകമ്പടിച്ചെലവായ 60 ലക്ഷം ഉള്പ്പെടെ താമസവും ഭക്ഷണവും ഉള്പ്പെടെ ഒരു കോടിയോളം രൂപ വരും.
താമസിക്കുന്ന സ്ഥലം, സന്ദര്ശിക്കാനെത്തുന്നവരുടെ ആധാര് കാര്ഡ്, അന്വാര്ശേരിയില് താമസിക്കുന്ന കെട്ടിടത്തിന്റെയും വീടിന്റെയും ലൊക്കേഷന്, ഗൂഗിള് മാപ്പ് തുടങ്ങി നിരവധി രേഖകളും പോലീസ്ആവശ്യപ്പെട്ടു. റോഡ് മാര്ഗത്തിലൂടെ മാത്രമേ കേരളത്തിലേക്ക് പോവാന് പറ്റൂ, ആശുപത്രിയില് പോവാന് പറ്റില്ല എന്നീ നിബന്ധനങ്ങളും പോലീസ് പറഞ്ഞതായി മദനി ശബ്ദ സന്ദേശത്തിലൂടെ അറിയിച്ചു.
കേരളത്തിലേക്ക് വരുന്നതിന് കര്ണാടക പോലീസിന്റെ അകമ്പടി ആവശ്യപ്പെട്ടുള്ള മദനിയുടെ അപേക്ഷയില് ഒരാഴ്ചയ്ക്ക് ശേഷമാണ് മറുപടി ലഭിക്കുന്നത്. എന്നാല് ഇത്രയും തുക അടച്ച് കേരളത്തിലേക്ക് വരേണ്ടെന്ന നിലപാടിലാണ് മദനിയക്ക്. സുപ്രീംകോടതി അഭിഭാഷകരുമായി ആലോചിച്ച ശേഷം തുടര്നടപടികള് തീരുമാനിക്കുമെന്നും മദനി വ്യക്തമാക്കി.
അതിനിടെ കേരളത്തിലെ സുരക്ഷ വിലയിരുത്തിയ ശേഷമാകും യാത്രയെന്ന് ബെംഗളൂരു പോലീസ് അറിയിച്ചതായി വാര്ത്തകളുണ്ടായിരുന്നു. യാത്ര മനഃപൂര്വം വൈകിപ്പിക്കുകയാണെന്ന് ആരോപിച്ച് മദനിയുടെ കുടുംബം രംഗത്തെത്തുകയും ചെയ്തു.സുപ്രീംകോടതി ജാമ്യ വ്യവസ്ഥയില് ഇളവ് നല്കിയതോടെയാണ് ബെംഗളൂരുവില് കഴിയുന്ന മദനി കേരളത്തിലേക്ക് എത്തുന്നത്. ആരോഗ്യ നില മോശമായ പിതാവിനെ സന്ദര്ശിക്കാനും, വൃക്ക തകരാറിലായതിനാല് വിദഗ്ധ ചികിത്സ തേടാനുമാണ് മദനി കേരളത്തിലെത്തുന്നത്. കര്ണാടക പോലീസിന് പുറമെ കേരളാ പോലീസും മദനിക്ക് സുരക്ഷ ഒരുക്കുമെന്നും റിപ്പോര്ട്ടുകള് ഉണ്ടായിരുന്നു
