ബ്ലോക്ക് പഞ്ചായത്ത് സെക്രട്ടറി തന്റെ ഡിജിറ്റല് ഒപ്പ് ദുരുപയോഗപ്പെടുത്തി ബില് മാറിയെന്ന പരാതിയുമായി ബ്ലോക്ക് പഞ്ചായത്ത് പ്രസിഡന്റ് രംഗത്ത്. ഇടുക്കിയിലെ നെടുങ്കണ്ടം ബ്ലോക്ക് പഞ്ചായത്തിലാണ് ഇത്തരത്തിലൊരു സംഭവം അരങ്ങേറിയത് . ഇതേ സംബന്ധിച്ച് അന്വേക്ഷണം നടത്താന് തദ്ദേശ സ്വയം ഭരണ വകുപ്പ് പ്രിന്സിപ്പല് ഡയറക്ടര് ഉത്തരവിട്ടു.
പത്ത് വര്ഷമായി യുഡിഎഫ് ഭരിച്ച ബ്ലോക്ക് പഞ്ചായത്തില് ഇത്തവണയാണ് എല്ഡിഎഫ് അധികാരത്തിലെത്തുന്നത്. സിപിഎമ്മിലെ കെ ടി കുഞ്ഞാണ് ബ്ലോക്ക് പഞ്ചായത്ത് പ്രസിഡന്റ്. സെക്രട്ടറി എം കെ ദിലീപ്. ചില ഭരണകക്ഷി അംഗങ്ങളും സെക്രട്ടറിയും ഉദ്യോഗസ്ഥരും എകപക്ഷീയമായി തീരുമാനങ്ങള് എടുക്കുകയാണെന്നാണ് പ്രസിഡന്റ് നല്കിയിരിക്കുന്ന പരാതി. ബ്ലോക്ക് പഞ്ചായത്ത് സെക്രട്ടറി വികസന ക്ഷേമകാര്യ പ്രവര്ത്തനങ്ങള്ക്ക് തന്റെ ഡിജിറ്റല് സിഗ്നേച്ചര് ഉപയോഗിച്ച് താന് അറിയാതെ അനുമതി നല്കുകയും, ബില്ലുകള് പാസാക്കുകയും ചെയ്യുന്നതായി ഇദ്ദേഹം ആരോപിച്ചു. ദിവസവും നടക്കുന്ന കാര്യങ്ങള് പ്രസിഡന്റിനെ അറിയിക്കാറില്ല. ചെലവുകള് സംബന്ധിച്ച ബില്ലുകളും രേഖകളും പ്രസിഡന്റിന്റെ അനുമതിയില്ലാതെ സെക്രട്ടറി മാറുന്നു. ഇതുകൂടാതെ ടെന്ഡര് പരസ്യം രഹസ്യമാക്കി വയ്ക്കുകയും കരാറുകാരുമായി ധാരണയുണ്ടാക്കിയ ശേഷം രണ്ടു കരാറുകാര്ക്ക് ഒന്നേകാല് കോടി രൂപയുടെ പണികള് നല്കിയതായും പ്രസിഡന്റ് പരാതിയില് വ്യക്തമാക്കുന്നു.
പത്ത് കാര്യങ്ങളിലാണ് ഇദ്ദേഹം അന്വേഷണം ആവശ്യപ്പെട്ടിരിക്കുന്നത്. സംഭവത്തില് അന്വേഷണം നടത്തുന്നത് തദ്ദേശ സ്വയം ഭരണ വകുപ്പ് പ്രിന്സിപ്പല് ഡയറക്ടറുടെ ഓഫീസിലെ ജോയിന്റ് ഡയറക്ടര് ജി കൃഷ്ണകുമാര്, ഇടുക്കി ജില്ലയിലെ ഐവി മാരായ അബ്ദുല് സമദ്, എം എസ് സുരേഷ് എന്നിവരാണ്. എന്നാല് സംഭവം വിവാദമായതോടെ പ്രശ്നം പരിഹരിക്കാനുള്ള ശ്രമത്തിലാണ് സിപിഎം നേതൃത്വമിപ്പോള്.
