പെരുമ്പാവൂര് ഓടക്കാലിയിലെ പ്ലൈവുഡ് കമ്പനിയില് തീച്ചൂളയില് വീണു മരിച്ച ഇതര സംസ്ഥാന തൊഴിലാളിയുടെ കുടുംബത്തിന് സാധ്യമായ എല്ലാ സഹായവും നല്കുമെന്ന് തൊഴില് മന്ത്രി വി ശിവന്കുട്ടി. മരണപ്പെട്ട ബംഗാള് സ്വദേശി നസീര് ഹുസൈന്റെ മൃതദേഹം സ്വദേശത്ത് എത്തിക്കുന്നതിന് ജില്ലാ ലേബര് ഓഫീസര് തൊഴിലുടമയുമായി ആലോചിച്ച് വേണ്ട നടപടി സ്വീകരിക്കുമെന്നും മന്ത്രി വ്യക്തമാക്കി.
ജോലിക്കിടയില് സംഭവിച്ച അപകടമരണം ആയതിനാല് എംപ്ലോയീസ് കോമ്പന്സേഷന് ആക്ട് പ്രകാരമുള്ള തൊഴിലാളികളുടെ നിയമാനുസൃത ആശ്രിതര്ക്ക് നഷ്ടപരിഹാരം ലഭിക്കുന്നതിനും നടപടികള് സ്വീകരിച്ചുവരികയാണ്. കുടുംബത്തിന് 2 ലക്ഷം രൂപയുടെ ആനുകൂല്യം ലഭ്യമാക്കുമെന്ന് മന്ത്രി വ്യക്തമാക്കി. നസീര് ജോലിയില് പ്രവേശിച്ചിട്ട് നാല് ദിവസം മാത്രമേ ആയിരുന്നുളളൂ. സെക്യൂരിറ്റി ജോലിയാണ് നസീര് ചെയ്തിരുന്നത്.
വ്യാഴാഴ്ച രാവിലെ മാലിന്യ കൂമ്പാരത്തിന് തീപിടിച്ചത് കെടുത്താന് ശ്രമിക്കവെയാണ് നാസര് 15 അടി താഴ്ചയിലേക്ക് വീണത്. ആറ് ഫയര് എഞ്ചിനുകളാണ് രക്ഷാപ്രവര്ത്തനത്തിനായി സംഭവസ്ഥലത്തെത്തിയത്. എന്നാല് 10 മണിക്കൂര് രക്ഷാ പ്രവര്ത്തനത്തനം നടത്തിയെങ്കിലും നസീറിനെ കണ്ടെത്താന് സാധിച്ചിരുന്നില്ല. ഒരു ദിവസത്തെ തിരച്ചിലിന് ശേഷമാണ് ഇദ്ദേഹത്തിന്റെ മൃതദേഹാവശിഷ്ടം കണ്ടെത്താനായത്. പ്ലൈവുഡ് കമ്പനിയിലെ മാലിന്യം കൂട്ടിയിട്ടതിന് ശേഷം ഈ കുഴിയിലിട്ട് കത്തിച്ചു കളയുന്നതാണ് പതിവ്. ഈ കുഴിയില് നിന്ന് പുക ഉയരുന്നത് കണ്ട് നനക്കാന് എത്തിയപ്പോഴാണ് നസീര് ഇതില് അകപ്പെട്ടത്.
