മണിരത്നത്തിന്റെ ബ്രഹ്മാണ്ഡ ചിത്രമായ ‘പൊന്നിയിന് സെല്വന് 2’ മികച്ച അഭിപ്രായം നേടി തിയേറ്ററുകളില് തരംഗം സൃഷ്ടിക്കുകയാണ്. പ്രൊമോഷന്റെ ഭാഗമായി ഇതിലെ താരങ്ങളെല്ലാം ഒരുമിച്ചു കൂടി മാധ്യമങ്ങള്ക്ക് മുന്നില് പ്രത്യക്ഷപ്പെട്ടത് വാര്ത്തകളില് നിറഞ്ഞു നിന്നിരുന്നു. ഇപ്പോഴിതാ ‘പൊന്നിയിൻ സെൽവൻ 2’ തിയേറ്ററുകളിലെത്തിയതിന്റെ സന്തോഷം ഐശ്വര്യ റായ് ബച്ചൻ തന്റെ സഹതാരങ്ങൾക്കൊപ്പം രസകരമായ സെല്ഫിയെടുത്താണ് പ്രകടിപ്പിച്ചത്. ഇൻസ്റ്റാഗ്രാം പോസ്റ്റുകളുടെ ഒരു പരമ്പരയിൽ, നടി തൃഷ, ശോഭിത ധൂലിപാല, ജയം രവി, കാർത്തി, ഐശ്വര്യ ലക്ഷ്മി എന്നിവർക്കൊപ്പമുള്ള സെൽഫികൾ പോസ്റ്റ് ചെയ്തു. ചിത്രങ്ങളിലൊന്നിൽ, ഐശ്വര്യയും വിക്രമും ചേര്ന്ന് കൈകള് കൊണ്ട് ഒരു ഹൃദയം സൃഷ്ടിക്കുന്ന ചിത്രവുമുണ്ട്. കണ്ണില് കണ്ണില് നോക്കി നില്ക്കുന്ന വിക്രമും ഐശ്വര്യയും കൈകള് കൊണ്ട് ഹൃദയം സൃഷ്ടിക്കുകയാണ് ചിത്രത്തില്. സോഷ്യല് മീഡിയയില് ട്രെന്ഡിംഗായി മാറിയിരിക്കുകയാണ് ഈ ചിത്രം. ‘രണ്ടുപേരും ഒരുമിച്ചുള്ള സിനിമകള് ഇനിയും പ്രതീക്ഷിക്കുന്നു... ഇനിയും ഒരുപാട് സിനിമകള് ഒരുമിച്ച് ചെയ്യൂ...’ എന്നതടക്കം കമന്റുകള് കൊണ്ട് നിറയ്ക്കുകയാണ് ആരാധകര്. ഐശ്വര്യ പകര്ത്തിയ വിലമതിക്കാനാകാത്ത നിമിഷങ്ങൾ സോഷ്യല് മീഡിയയില് തരംഗമായി മാറുകയാണ്.
മണിരത്നം സംവിധാനം ചെയ്ത ‘പൊന്നിയിൻ സെൽവൻ 2’ കൽക്കി കൃഷ്ണമൂർത്തിയുടെ അതേ പേരിലുള്ള നോവലിനെ അടിസ്ഥാനമാക്കിയുള്ളതാണ്, ഹിന്ദി, കന്നഡ, തെലുങ്ക്, മലയാളം പതിപ്പുകൾക്കൊപ്പം വെള്ളിയാഴ്ച തമിഴിലും പുറത്തിറങ്ങി. ചിത്രം ബോക്സ് ഓഫീസിൽ വളരെ നല്ലയൊരു ഓപ്പണിങ്ങിന് സാക്ഷ്യം വഹിച്ചുവെന്നാണ് പ്രാഥമിക വിലയിരുത്തൽ.
