എടത്വാ: ശുചിത്വമിഷന്റെ പ്രവര്ത്തനം തകൃതിയില് നടക്കുന്ന പഞ്ചായത്തില് ലബോറട്ടറി മാലിന്യം റോഡരുകില് തള്ളിയ നിലയില്. എടത്വാ-തകഴി സംസ്ഥാന പാതയില് കേളമംഗലം ജങ്ഷന് സമീപത്താണ് ലാബോറട്ടറി മാലിന്യം തള്ളിയ നിലയില് കണ്ടത്.
സിറിഞ്ച്, സൂചി, പരിശോധന കിറ്റുകള് ഉള്പ്പെടെ പ്ലാസ്റ്റിക് മാലിന്യങ്ങളാണ് വഴിയരുകില് ഉപേക്ഷിച്ചത്. കോവിഡ് ഉള്പ്പെടെ സാംക്രമിക രോഗങ്ങള് പെരുകുന്ന സമയത്ത് ലാബോറട്ടറി മാലിന്യങ്ങള് പൊതുസ്ഥലത്ത് കെട്ടിക്കിടക്കുന്നതിനാല് ജനങ്ങള് ഭീതിയിലാണ്.
സമ്പൂര്ണ്ണ ശുചിത്വ ഗ്രാമമായി തകഴി പഞ്ചായത്തിനെ മാറ്റാനുള്ള കര്മ്മപദ്ധതിക്ക് ഇന്നലെ മുതല് തുടക്കമിട്ടപ്പോഴാണ് തകഴി പഞ്ചായത്ത് ഏഴാം വാര്ഡില് പെട്ട സ്ഥലത്ത് ലാബോറട്ടറിമാലിന്യം തള്ളിയത്. എടത്വാ-തകഴി സംസ്ഥാന പാതയോരത്ത് അറവ് മാലിന്യങ്ങളും വിസര്ജ്ജ മാലിന്യവും തള്ളുന്നത് പതിവാണ്.
ഹരിതകര്മ്മ സേനയുടെ നേതൃത്വത്തില് വീടുകളില് നിന്ന് മാലിന്യം ശേഖരിക്കുന്നതിനൊപ്പം സംസ്ഥാന പാതയോരങ്ങളിലേയും പൊതു സ്ഥലങ്ങളിലേയും മാലിന്യം ശേഖരിക്കാനുള്ള നടപടി പഞ്ചായത്ത് തലത്തില് നടപ്പാക്കുകയും സി.സി ടി.വി ക്യാമറ സ്ഥാപിക്കുകയും ചെയ്യണമെന്ന് പൊതുജനങ്ങള് ആവശ്യപ്പെടുന്നു.
