മാര്ക് ലിസ്റ്റ് വിവാദം റിപ്പോര്ട്ട് ചെയ്ത ന്യൂസ് റിപ്പോര്ട്ടര് അഖില നന്ദകുമാറിനെതിരെ പോലീസ് സ്വീകരിച്ച നടപടിയില് കനത്ത പ്രതിഷേധമുയരുമ്പോള് മുഖ്യമന്ത്രി പിണറായി വിജയന്റെ പഴയ ഫേസ്ബുക്ക് പോസ്റ്റ് കുത്തിപ്പൊക്കി വിമര്ശകര്. ഉമ്മന്ചാണ്ടി മുഖ്യമന്ത്രിയായിരുന്ന കാലത്ത് 2016 മെയ് നാലിന് സിപിഎം നേതാവായ പിണറായി വിജയന് ഫേസ്ബക്കിലൂടെ നടത്തിയ പ്രതികരണമാണ് ഇപ്പോള് ചര്ച്ചയാകുന്നത്.
ജിഷ കേസ് വലിയ ചര്ച്ചയായി നില്ക്കുന്ന സാഹചര്യത്തില് മുഖ്യമന്ത്രിയായിരുന്ന ഉമ്മന്ചാണ്ടി പെരുമ്പാവൂര് സന്ദര്ശിച്ച സമയത്തുണ്ടായ സംഭവങ്ങളെ തുടര്ന്ന് പിണറായി വിജയന് നടത്തിയ വിമര്ശനമാണ് ഇപ്പോള് പുറത്തുവരുന്നത്.സര്ക്കാരിന്റെ ദുര്നടപ്പും കെടുകാര്യസ്ഥതയും മാധ്യമ പ്രവര്ത്തകരെ തല്ലിയൊതുക്കി മറച്ചു പിടിക്കാം എന്നത് ഉമ്മന്ചാണ്ടിയുടെ വ്യാമോഹം മാത്രമാണ് എന്നാണ് പോസ്റ്റിന്റെ തുടക്കം. ''ഭരണ കക്ഷിക്കാര് മാധ്യമ പ്രവര്ത്തകരെ ആക്രമിക്കുമ്പോള് തടയാന് ബാധ്യതപ്പെട്ട പോലീസുകാര് അതിനു തയാറാകാതിരുന്നത്, മുഖ്യമന്ത്രിയുടെ ഇംഗിതം അതാണ് എന്നത് കൊണ്ടാണ്.
അനുകൂല മാധ്യമങ്ങളുടെ സഹായത്തോടെ ജനങ്ങളില് നിന്ന് സത്യം മൂടിവയ്ക്കാന് കഴിയാത്തതിന്റെ നൈരാശ്യമാണ് മാധ്യമ പ്രവര്ത്തകരെ ആക്രമിച്ചു നിശബ്ദരാക്കാം എന്ന ചിന്തയിലേക്കു നയിക്കുന്നത്'' - പിണറായി വിജയന് കുറിച്ചു.
അഖിലാ നന്ദകുമാറിനെതിരെ കേസെടുത്ത നടപടിയില് കടുത്ത വിമര്ശനമുയരുമ്പോഴും സിപിഎം സംസ്ഥാന സെക്രട്ടറി എം വി ഗോവിന്ദന് സര്ക്കാര് - എസ്എഫ്ഐ വിരുദ്ധ പ്രചാരണം നടത്തിയാല് ഇനിയും കേസെടുക്കുമെന്നാണ് മറുപടി നല്കിയത്. മാധ്യമങ്ങളെയാകെ കുറ്റപ്പെടുത്തിയ ഇദ്ദേഹം സര്ക്കാരിന്റെ മാധ്യമ പ്രവര്ത്തകര്ക്കെതിരായ നീക്കത്തെ കേന്ദ്രത്തിന്റെ മാധ്യമവേട്ടയുമായി താരതമ്യം ചെയ്യേണ്ടതില്ലെന്നും കൂട്ടിച്ചേര്ത്തു.
