ഇളയവനായ ക്രിസ്റ്റിനെ തോളിലേറ്റി ലെസ്ലി ഓടിയെത്തി. ''എനിക്ക് വിശക്കുന്നു, ഞങ്ങളുടെ അമ്മ മരിച്ചുപോയി''- ഒറ്റ ശ്വാസത്തില് അവള് പറഞ്ഞു നിര്ത്തി. 40 ദിവസം ആമസോണ് വനത്തില് കഴിഞ്ഞ നാലു കുട്ടികളെ രക്ഷപ്പെടുത്താനെത്തിയ ദൗത്യസംഘത്തിലെ നിക്കോളാസ് ഒര്ഡനസ് ഗോമസിന്റെ വാക്കുകള്. ലെസ്ലിയുടെ വാക്കുകള് സഹോദരന് സൊലൈനി (9)യും ആവര്ത്തിച്ചു.
ആശ്വാസത്തിനിടയിലും ആ കണ്ണുകളില് ആശങ്ക നിഴലിച്ചു. ആമസോണ് കാടുകളിലെ സായുധ സംഘങ്ങളെയാകും അവര് ഭയന്നത്. ''ഞങ്ങള് രക്ഷിക്കാനെത്തിയതാണ്. നിങ്ങളുടെ പിതാവും അമ്മാവനുമാണു ഞങ്ങളെ അയച്ചത്.'' - ഗോമസ് മറുപടി നല്കി. അതോടെയാണു ലെസ്ലിയുടെ മുഖത്തെ ഭയം മാറിത്തുടങ്ങിയത്. കുട്ടികള്ക്ക് ആശ്വാസമായി എന്നറിഞ്ഞതോടെ ഭക്ഷണം നല്കി. പിന്നീട് അവരെ കണ്ടെത്തിയതിന്റെ ആഘോഷമായിരുന്നു. ''ഞങ്ങള് പരസ്പരം കെട്ടിപ്പിടിച്ചു, പാട്ടുകള് പാടി'' - അദ്ദേഹം പറഞ്ഞു.
മേയ് ഒന്നിന് അമ്മ മഗ്ദലീനയ്ക്കൊപ്പമായിരുന്നു നാലു കുട്ടികളുടെയും വിമാനയാത്ര. തെക്കന് കൊളംബിയയിലെ അരരാക്കുവരയില്നിന്നു പറന്നുയര്ന്ന സെസ്ന 206 എന്ന ചെറുവിമാനം കാകെറ്റ പ്രവിശ്യയിലെ ഉള്ക്കാട്ടില് എന്ജിന് തകരാര് മൂലം തകര്ന്നു വീഴുകയായിരുന്നു. അമ്മ മഗ്ദലീന, പൈലറ്റ്, ഒപ്പമുണ്ടായിരുന്ന ഗോത്രനേതാവ് എന്നിവര് അപകടത്തില് മരിച്ചു.
അപകട ദിവസം തന്നെ മഗ്ദലീന മരിച്ചില്ലെന്ന് കുട്ടികളെ കണ്ടശേഷം രണ്ടാം ഭര്ത്താവ് മാനുവല് മില്ലര് റനോക്ക് പറഞ്ഞു. നോറിയന് (4), ക്രിസ്റ്റിന് (1) എന്നീ കുട്ടികളുടെ പിതാവാണു മാനുവല്. സൊലൈനി (9), ലെസ്ലി എന്നിവര് മഗ്ദലീനയ്ക്ക് ആദ്യ ഭര്ത്താവിലാണ് ഉണ്ടായത്.
കഠിനമായ വേദനയിലൂടെയാണു മഗ്ദലീന കടന്നുപോയതെന്നു ലെസ്ലി പറഞ്ഞതായി മാനുവല് അറിയിച്ചു. ക്ഷീണിതയായപ്പോള് അവര് കുട്ടികളെ അടുത്തുവിളിച്ചു. ''നിങ്ങള് ഇവിടെ നിന്ന് രക്ഷപ്പെടണം. അച്ഛനടുത്തെത്തണം, അദ്ദേഹം സംരക്ഷിക്കും''-എന്നായിരുന്നു മഗ്ദലീനയുടെ അവസാനവാക്കുകള്. ''ആശുപത്രിക്കുള്ളിലെ സാഹചര്യത്തെക്കുറിച്ച് എനിക്ക് സംസാരിക്കാന് അനുവാദമില്ല. പക്ഷേ, കുട്ടികള് മികച്ച നിലയിലാണ്.''- മാനുവേല് വയക്തമാക്കി.
കുട്ടികളുടെ ആരോഗ്യനില തൃപ്തികരമാണെന്നു െസെനിക ഡോക്ടര് അറിയിച്ചു. അവര് ഖര ഭക്ഷണം കഴിക്കാറായിട്ടില്ല. ആഴ്ചകള്ക്കുള്ളില് അവര്ക്ക് ആശുപത്രി വിടാനാകുമെന്നും ഡോക്ടര്മാര് അറിയിച്ചു.
ആമസോണ് കാടുകളില് കുടുങ്ങിയ കുട്ടികളെ കണ്ടെത്തിയത് വനത്തോട് ചേര്ന്നു ജീവിക്കുന്ന നാട്ടുകാരാണെന്നു തെരച്ചിലിന് നേതൃത്വം നല്കിയ കരസേനാ മേധാവി ഹെല്ഡര് ഗിറാള്ഡോ അറിയിച്ചു. 40 ദിവസം കൊണ്ട് 2655 കിലോമീറ്ററാണു അന്വേഷണ സംഘവും നാട്ടുകാരും കാട്ടിലൂടെ പിന്നിട്ടത്.
കുട്ടികളെ കാണാനെത്തിയ അച്ഛന്മാരെ ആശുപത്രി അധികൃതര് തടഞ്ഞത് വിവാദമായി. മഗ്ദലീനയുടെ ആദ്യ വിവാഹത്തിലെ ഭര്ത്താവും രണ്ടാം ഭര്ത്താവ് മാനുവല് മില്ലര് റനോക്ക് എന്നിവരെയാണു തടഞ്ഞത്. ''ഞങ്ങള് തെരുവില്നിന്നു വന്നവരാണെന്നായിരുന്നു ആശുപത്രി ജീവനക്കാരുടെ വിശ്വാസം. ബാറില്നിന്നാണോ എത്തിയതെന്നു പോലും ചോദിച്ചു''- മാനുവേല് പറഞ്ഞു.
