ബഗോട്ട: വിമാനം തകര്ന്ന് ആമസോണ് കാട്ടില് കാണാതായ കുട്ടികളെ കണ്ടെത്തിയതിന് പിന്നാലെ തെരച്ചില് ജോലിക്കിടയില് കാണാതായ ദൗത്യസംഘത്തിലെ നായയെ കണ്ടെത്താനും ദൗത്യം. രക്ഷാസംഘത്തില് ഉണ്ടായിരുന്ന വില്സണ് എന്ന നായയെയാണ് തെരച്ചിലിനിടയില് ആമസോണ് കാട്ടില് കാണാതായത്. വില്സണ് വേണ്ടി കൊളംബിയന് സൈന്യം തെരച്ചില് ആരംഭിച്ചു.
ആറു വയസ്സുള്ള ബല്ജിയന് ഷെപ്പേഡ് വിഭാഗത്തില് പെട്ട നായയെ രണ്ടാഴ്ച മുമ്പാണ് ഡ്യൂട്ടിക്കിടയില് കാണാതായത്. എന്നാല് കുട്ടികളെ കണ്ടെത്താന് സഹായിച്ച വില്സണെ ഉപേക്ഷിക്കില്ലെന്ന് സൈന്യം കഴിഞ്ഞ ദിവസം വ്യക്തമാക്കി. സാമൂഹ്യമാധ്യമങ്ങളില് വില്സനെ കണ്ടെത്തണം എന്നാവശ്യപ്പെട്ട് ഹാഷ്ടാഗുകള് പ്രത്യക്ഷപ്പെടാന് തുടങ്ങി. കൊളംബിയന് ജനതയില് നിന്നും ലെറ്റ്സ്ഗോ ഫോര് വില്സണ്, വണ് ഈസ് മിസ്സിംഗ്, വില്സണ് നാഷണല് ഹീറോ തുടങ്ങിയ പേരില്ലെല്ലാം വരുന്ന ഹാഷ്ടാഗുകള്ക്ക് വലിയ പിന്തുണയാണ് കിട്ടുന്നത്.
വില്സന്റെ തെരച്ചിലിനായി 70 സൈനികരെ മഴക്കാടുകളില് വിന്യസിപ്പിച്ചതായി കൊളംബിയന് സൈന്യവും പുറത്തുവിട്ട വാര്ത്താകുറിപ്പില് പറയുന്നു. വില്സണ് വേണ്ടിയും തെരച്ചില് തുടങ്ങുമെന്നും അവനെ തിരികെ കൊണ്ടുവരുമെന്നും കുട്ടികളുടെ തെരച്ചിലിന് നേതൃത്വം നല്കിയ ജനറല് പെഡ്രോ സാഞ്ചസും പറയുന്നു. കുട്ടിയായിരുന്നപ്പോള് മുതല് വില്സണെ പരിശീലിപ്പിക്കുകയും വളര്ത്തുകയും ചെയ്തിരുന്ന ക്രിസ്റ്റിയന് ഡേവിഡ് ലാറ ഉള്പ്പെടെ സംഘത്തിലുണ്ട്.
മെയ് 1 ന് വിമാനം തകര്ന്ന് കാണാതായ ശേഷം 40 ദിവസം കഴിഞ്ഞ് കഴിഞ്ഞ വെള്ളിയാഴ്ചയാണ് ലോകം മുഴുവന് ശ്രദ്ധയാകര്ഷിച്ച കൊളംബിയന് കുട്ടികളെ കണ്ടെത്തിയത്. കുട്ടികള് ജീവിച്ചിരിപ്പുണ്ടെന്ന് സൂചന നല്കി വിമാനം തകര്ന്ന സ്ഥലത്ത് നിന്നും നാലു കിലോമീറ്റര് അകലെ കാടിനുള്ളില് ഒരു വയസ്സുകാരി ക്രിസ്റ്റീന് ഉപേക്ഷിച്ച ബേബി ബോട്ടില് കണ്ടെത്തിയത് വില്സണായിരുന്നു. ആഴ്ചകള്ക്ക് ശേഷം വിദഗ്ദ്ധര് ഉള്പ്പെടെ 200 ലധികം സൈനികര് കൊടും കാട്ടില് നടത്തിയ തെരച്ചിലില് നായകള് മണം പിടിച്ച് കണ്ടെത്തിയ വിവരങ്ങളുടെ അടിസ്ഥാനത്തിലാണ് കുട്ടികള് ജീവിച്ചിരിപ്പുണ്ടെന്ന നിഗമനത്തില് എത്തിച്ചത്.
രണ്ടാഴ്ചയ്ക്ക് പുറകില് തെരച്ചിലിനിടയില് വഴിതെറ്റി വില്സണ് വേര്തിരിഞ്ഞു പോകുകയും പിന്നീട് കണ്ടെത്താന് കഴിയാതാകുകയുമായിരുന്നു. ജിപിഎസ് ട്രാക്കിംഗ് സംവിധാനവും വില്സന്റെ കാര്യത്തില് തുണയാകുകയില്ല. മയക്കുമരുന്ന് ഉള്പ്പെടെ അനധികൃത വ്യാപാരങ്ങള് നടക്കുന്ന ആമസോണില് സായുധസേനയുടെ എന്കൗണ്ടറിംഗ് ഗ്രൂപ്പില് വരുന്നതിനാല് അക്രമി ഗ്രൂപ്പില് പെടുന്ന മറ്റുള്ളവര് ട്രാക്ക് ചെയ്യാതിരിക്കാന് ജിപിഎസ് ട്രാക്കര് സംവിധാനം വില്സണില് ചെയ്തിട്ടില്ല.
