തിരുവല്ല: വള്ളംകുളം പാടത്തുംപാലത്ത് പ്രവര്ത്തിക്കുന്ന ബീവറേജസ് കോര്പറേഷന്റെ ഔട്ട്ലെറ്റ് കുത്തിത്തുറന്ന് മോഷണം നടത്തിയ സംഭവത്തില് രണ്ട് വെസ്റ്റ്ബംഗാള് സ്വദേശികളെ തിരുവല്ല പോലീസ് അറസ്റ്റ് ചെയ്തു.
വെസ്റ്റ് ബംഗാള് ഉത്തര് ദിനാജ്പൂര് ജില്ലയിലെ കമലാഗച്ച് വില്ലേജില് ഷംസുജഹ (32), വെസ്റ്റ്ബംഗാള് ഉത്തര് ദിനാജ്പൂര് ജില്ലയിലെ ജാനകിഗച്ച് വില്ലേജില് മുക്താര് ഉള്ഹഖ് (32) എന്നിവരാണ് അറസ്റ്റിലായിട്ടുള്ളത്. ഏപ്രില് 29 ന് രാത്രിയിലായിരുന്നു മോഷണം നടന്നത്.
ഔട്ട്ലെറ്റിന്റെ ഷട്ടറിന്റെ താഴ് തകര്ത്ത് അകത്ത് കടന്ന മോഷ്ടാക്കള് പണം സൂക്ഷിക്കുന്ന ലോക്കര് തുറക്കാനുള്ള ശ്രമം പരാജയപ്പെട്ടതോടെ വില കൂടിയ മദ്യക്കുപ്പികളുമായി കടക്കുകയായിരുന്നു.
ഔട്ട്ലെറ്റിന് ഉള്ളിലെ സിസിടിവിയില് നിന്നും ലഭിച്ച ദൃശ്യങ്ങളുടെ അടിസ്ഥാനത്തില് പ്രതികള്ക്കായുള്ള അന്വേഷണം പുരോഗമിക്കുന്നതിനിടെ കാലടിയിലെ സൂപ്പര് മാര്ക്കറ്റ് കുത്തിത്തുറന്ന് മോഷണം നടത്തിയ സംഭവത്തില് പ്രതികള് കഴിഞ്ഞദിവസം അവിടെ അകത്താകുകയായിരുന്നു.
തുടര്ന്ന് നടന്ന ചോദ്യം ചെയ്യലിലാണ് വള്ളംകുളത്തെ ബിവറേജസ് ഔട്ട്ലെറ്റിലും മോഷണം നടത്തിയത് തങ്ങളാണെന്ന് ഇവര് സമ്മതിച്ചത്. തുടര്ന്ന് റിമാന്റില് കഴിഞ്ഞിരുന്ന പ്രതികളെ തിരുവല്ല പോലീസ് ആലുവ സബ് ജയിലില്നിന്നും അറസ്റ്റ് രേഖപ്പെടുത്തി കസ്റ്റഡിയില് എടുത്തു.
കോടതിയില് ഹാജരാക്കിയ പ്രതികളെ റിമാന്ഡ് ചെയ്തിട്ടുണ്ട്. നിര്മ്മാണ തൊഴിലാളികള് എന്ന വ്യാജേനെ സംസ്ഥാനത്തിന്റെ വിവിധ ഭാഗങ്ങളിലായി മാറിമാറി താമസിച്ച് മോഷണം നടത്തുന്നതാണ് ഇവരുടെ രീതി.
