ജയ്പൂര്: രാജസ്ഥാനിലെ ശ്രീദുംഗാര്ഗറിലെ 17 കാരിയായ വിദ്യാര്ത്ഥിനി അവളുടെ 21 കാരിയായ അദ്ധ്യാപികയുമായി ഒളിച്ചോടി. ബിക്കനീര് പോലീസ് സ്റ്റേഷന് പരിധിയില് മൂന്ന് ദിവസം മുമ്പ് നടന്ന സംഭവത്തില് പെണ്കുട്ടിയെ കണ്ടെത്തി നല്കണമെന്ന് ആവശ്യപ്പെട്ട് നാട്ടുകാര് ഞായറാഴ്ച പോലീസ് സ്റ്റേഷനില് പ്രതിഷേധം നടത്തിയിരുന്നു.
ഇരുവരും തമ്മില് സ്വവര്ഗ്ഗ പ്രണയത്തിലായിരുന്നു എന്നാണ് വിവരം. സംഭവം ലവ് ജിഹാദ് ആണെന്ന് പ്രതിഷേധക്കാര് ആരോപണം ഉയര്ത്തുകയും ചെയ്തു. 12 ാം ക്ലാസ്സില് പഠിക്കുന്ന പെണ്കുട്ടിയേയും 21 കാരിയായ അദ്ധ്യാപികയേയും ജൂണ് 30 മുതലാണ് കാണാതായത്. പെണ്കുട്ടി പ്രായപൂര്ത്തിയാകാത്ത ആളായതിനാല് ടീച്ചറെ അറസ്റ്റ് ചെയ്ത് പെണ്കുട്ടിയെ മോചിപ്പിക്കണമെന്ന് ആവശ്യപ്പെട്ടാണ് പ്രതിഷേധക്കാര് സ്റ്റേഷനില് എത്തിയത്.
ജൂണ് 30 ന് സ്കൂളിലേക്ക് പോയ പെണ്കുട്ടി പിന്നീട് തിരിച്ചുവന്നിരുന്നില്ല. പെണ്കുട്ടിയെ തേടി സഹപാഠികളുടെയെല്ലാം വീടുകളില് അന്വേഷിച്ചിട്ടും കണ്ടെത്താന് കഴിഞ്ഞില്ല. ഇതോടെയാണ് ഇവര് പെണ്കുട്ടിയെ കാണാതായെന്ന് കാണിച്ച് പരാതി നല്കിയത്. അദ്ധ്യാപികയ്ക്ക് എതിരേ തട്ടിക്കൊണ്ടുപോകല് കുറ്റം ചുമത്തിയാണ് കേസെടുത്തിരിക്കുന്നത്.
പെണ്കുട്ടിയും അദ്ധ്യാപികയും തമ്മില് ദീര്ഘകാലമായി പ്രണയത്തില് ആയിരുന്നെന്നും പിന്നീട് ഇരുവരും ഒളിച്ചോടുകയായിരുന്നു എന്നുമാണ് പ്രാഥമികാന്വേഷണത്തിന് ശേഷം പോലീസ് പറഞ്ഞത്. അതേസമയം പെണ്കുട്ടിക്ക് 17 വയസ്സും അഞ്ചു മാസവുമാണ് പ്രായം എന്നതിനാല് പെണ്കുട്ടി സമ്മതത്തോടെയാണ് ഓടിപ്പോയതെങ്കിലും ടീച്ചര്ക്കെതിരേ കേസെടുക്കാനാകും. അദ്ധ്യാപികയുടെ പിതാവിനെയും കുടുംബാംഗങ്ങളെയും പോലീസ് ചോദ്യം ചെയ്തു.
