യുഎസിലെ ഹാര്വാര്ഡ് സര്വകലാശാലയിലെ ഗവേഷകര് പ്രായം കുറക്കാനുള്ള മരുന്ന് കണ്ടെത്തിയെന്ന അവകാശവാദവുമായി രംഗത്ത്. ഇവര് പ്രായം കുറക്കാനുള്ള മരുന്ന് തയ്യാറാക്കുന്നതിനാവശ്യമായ ആറുമരുന്നുകളുടെ മിശ്രിതം കണ്ടെത്തിയതായാണ് അവകാശപ്പെടുന്നത്. ഇതുസംബന്ധിച്ച് ലേഖനം ജൂലൈ 12ന് പുറത്തിറങ്ങിയ ഏജിങ് ജേര്ണലില് പ്രസിദ്ധീകരിച്ചിട്ടുണ്ട്.
ഗവേഷണ സംഘത്തിലെ പ്രധാനി ഡേവിഡ് സിന്ക്ലയര് ട്വീറ്ററിലൂടെ മരുന്ന് പരീക്ഷണം എലിയിലും കുരങ്ങിലും വിജയിച്ചതായും അടുത്ത വര്ഷത്തോടെ ഇവ മനുഷ്യരിലും പരീക്ഷിക്കുമെന്നും വ്യക്തമാക്കി. ഗവേഷകര് മൂന്ന് വര്ഷത്തെ ഗവേഷണത്തിനൊടുവിലെന്നാണ് മരുന്ന് വികസിപ്പിച്ചത്. മരുന്നില് പ്രധാനമായും മാനസികവും ശാരീരികവുമായ പ്രശ്നങ്ങള് പരിഹരിക്കാനുള്ള ഘടകങ്ങളാണ് അടങ്ങിയിരിക്കുന്നത്. മാനസികവും ശാരീരികവുമായ പ്രശ്നങ്ങള്ക്ക് പരിഹാരം കാണുന്നതോടെ വാര്ധക്യമാകുന്ന പ്രക്രിയ കുറച്ചുകൊണ്ടുവരാനാകുമെന്നാണ് നിഗമനം.
സംഘം ചര്മ്മകോശങ്ങളിലെ വാര്ധക്യ പ്രക്രിയയെ തടയാന് കഴിവുള്ള ആറ് രാസ സംയോജനങ്ങള് തിരിച്ചറിഞ്ഞെന്നും കണ്ടെത്തല് മനുഷ്യ വംശത്തിന്റെ ചുവടുവെപ്പാണെന്നും ഡോ. സിന്ക്ലയര് പറഞ്ഞു. ഈ വാര്ത്തയോട് എലോണ് മസക് ഉള്പ്പെടെയുളളവര് പ്രതീക്ഷയോടെയാണ് പ്രതികരിച്ചത്. മരുന്നുകള് എലികളിലും കുരങ്ങുകളിലും പരീക്ഷിച്ചപ്പോള് വാര്ധക്യം കുറയുമെന്ന് ഫലങ്ങള് സൂചിപ്പിച്ചു. ഒറ്റ മരുന്നു കൊണ്ട് വാര്ധക്യം മാറ്റാനുള്ള കഴിവ് പ്രതീക്ഷിക്കുന്നു. കാഴ്ചശക്തി മെച്ചപ്പെടുത്തുന്നത് മുതല് വാര്ധക്യസഹജമായ രോഗങ്ങള് ഫലപ്രദമായി ചികിത്സിക്കാന് വരെ ഇതുകൊണ്ട് സാധിക്കുമെന്നും ഡോ. സിന്ക്ലെയര് പറഞ്ഞു.
എന്നാല് കണ്ടെത്തലുകളെ ജാഗ്രതയോടെ കൈകാര്യം ചെയ്യണമെന്ന് ബയോജറന്റോളജിസ്റ്റായ മാറ്റ് കെബര്ലിന് മുന്നറിയിപ്പ് നല്കി. പഠനത്തിലെ മൂന്ന് സംയുക്തങ്ങളെക്കുറിച്ച് മെറ്റബോളിസം ഗവേഷകനായ ഡോ. ചാള്സ് ബ്രെന്നര് ആശങ്ക ഉന്നയിച്ചു. പഠനത്തില് ചില സംയുക്തങ്ങള് കരളിനെ ബാധിക്കുമെന്നും അപകട സാധ്യതകളെക്കുറിച്ച് പരാമര്ശിച്ചിട്ടില്ലെന്നും അദ്ദേഹം വിമര്ശിച്ചു.
