തിരുവനന്തപുരം: പാറിപ്പറന്ന മുടി, കീറിയ ഷര്ട്ട്... സമയത്തിന് ഭക്ഷണമില്ല, എപ്പോഴും ജനക്കൂട്ടത്തിനുള്ളില് അതായിരുന്നു ഉമ്മന് ചാണ്ടി. പുലര്ച്ചെ ഒരുമണിയായാലും രണ്ടുമണിയായാലും ജനകീയ പ്രശ്നങ്ങളില് ഇടപെടാന് അദ്ദേഹത്തിന് ഒരു മടിയുമുണ്ടായിരുന്നില്ല. കേരളത്തിനെ പിടിച്ചുകുലുക്കിയ സുനാമി ദുരന്ത സമയത്ത് പുലര്ച്ചെ ഒരു മണിക്ക് വരെ മന്ത്രിസഭായോഗവും ചേര്ന്നിട്ടുണ്ട്.
ഒരുകാലത്ത് ഉമ്മന് ചാണ്ടിയുടെ പാറിപ്പറന്ന മുടിയും കീറിയ ഷര്ട്ടും കോണ്ഗ്രസിലെ യുവതലമുറയുടെ ഫാഷനായിരുന്നു. അത്രയ്ക്കായിരുന്നു യുവാക്കളെ അദ്ദേഹം സ്വാധീനിച്ചത്. വസ്ത്രധാരണത്തിലോ അല്ലെങ്കില് തലമുടി ചീകുന്നതിലോ ഒന്നും ശ്രദ്ധിക്കാന് പോലും സമയമില്ലാത്ത വ്യക്തിയായിരുന്നു ഉമ്മന് ചാണ്ടി.
രാത്രികാലങ്ങളില് യാത്രചെയ്തിരുന്ന അദ്ദേഹം തലസ്ഥാനത്ത് നേരേ എത്തി സെക്രട്ടേറിയറ്റിലേക്ക് എത്തിയ സന്ദര്ഭങ്ങളും ഉണ്ടായിട്ടുണ്ടെന്ന് അദ്ദേഹത്തിനൊപ്പമുണ്ടായിരുന്നവര്തന്നെ പറയുന്നു.
2004-ല് മുഖ്യമന്ത്രിയായി ചുമതല ഏറ്റെടുത്തശേഷം ഒരു മുഖാമുഖം പരിപാടിയില് പങ്കെടുത്ത ഉമ്മന് ചാണ്ടി പറഞ്ഞത്, തനിക്ക് ശിപാര്ശകള് നല്കാതിരിക്കാന് കഴിയില്ലെന്നതാണ്. മുഖ്യമന്ത്രി എങ്ങനെ ശിപാര്ശ ചെയ്യുമെന്ന് ചോദിച്ചപ്പോള്, താന് എം.എല്.എ. എന്ന ലെറ്റര്ഹെഡ്ഡില് ശിപാര്ശ നല്കുമെന്നായിരുന്നു അദ്ദേഹം തമാശയായി പ്രതികരിച്ചത്- അതാണ് ഉമ്മന് ചാണ്ടി. ആ തമാശയുടെ മറ്റൊരുരൂപമാണ് പിന്നീട് അദ്ദേഹം ജനസമ്പര്ക്ക പരിപാടിയിലൂടെ അവതരിപ്പിച്ചത്.
എം.എല്.എ. ഹോസ്റ്റലിലെ ഉമ്മന് ചാണ്ടിയുടെ മുറിയായിരുന്നു ഇന്ന് ഉന്നതപദവികളലങ്കരിക്കുന്ന പല പ്രമുഖ നേതാക്കളുടെയും തലസ്ഥാനത്തെ ആശ്രയകേന്ദ്രം. എവിടെനിന്ന് വരുന്നവരാണെങ്കിലും ഉമ്മന് ചാണ്ടിയുടെ മുറിയിലെത്തിയാല് അവിടെ താമസിക്കുന്നതിന് ഒരു തടസവുമുണ്ടാകില്ല. സഹപ്രവര്ത്തകരോടുള്ള അദ്ദേഹത്തിന്റെ സ്നേഹവും അടുപ്പവും അത്രയേറെ വലുതായിരുന്നു.
മുഖ്യമന്ത്രി എന്ന നിലയില് ഒരു വിശ്രമവുമില്ലാത്ത പ്രവര്ത്തനമായിരുന്നു ഉമ്മന് ചാണ്ടിയുടേത്. ഉമ്മന്ചാണ്ടി ആദ്യമായി മുഖ്യമന്ത്രിയാകുന്ന സമയത്തായിരുന്നു കേരളത്തെ നടുക്കിയ സുനാമി ദുരന്തമുണ്ടായത്.
ദുരന്തസ്ഥലത്തേക്കും അതുമായി ബന്ധപ്പെട്ട മറ്റുകാര്യങ്ങള്ക്കുമായി പകല് പലയിടത്തും പോകുന്ന ഉമ്മന് ചാണ്ടി ചിലപ്പോള് രാത്രി വളരെ െവെകിയായിരിക്കും സെക്രട്ടേറിയറ്റില് എത്തുക. എപ്പോള് എത്തിയാലും അപ്പോള് മന്ത്രിസഭായോഗം ചേര്ന്ന് അടുത്തതായി സ്വീകരിക്കേണ്ട നടപടികള് തീരുമാനിക്കുകയായിരുന്നു രീതിയെന്നും പഴയസഹപ്രവര്ത്തകര് ഓര്മിക്കുന്നു.
