ആലപ്പുഴ: രണ്ടാം കുട്ടനാട് പാക്കേജില് ഉള്പ്പെട്ട 41 പദ്ധതികള്ക്ക് 37 കോടി രൂപയുടെ ഭരണാനുമതി. ആലപ്പുഴ, അമ്പലപ്പുഴ, കുട്ടനാട്, ചെങ്ങന്നൂര്, മാവേലിക്കര, ഹരിപ്പാട്, ചങ്ങനാശേരി, ഏറ്റുമാനൂര്, കോട്ടയം കടുത്തുരുത്തി, ചേര്ത്തല, വൈക്കം മണ്ഡലങ്ങ ളിലെ വിവിധ പദ്ധതികള്ക്കായാണ് പണം അനുവദിച്ചത്. ഇതിന്റെ തുടര്നടപടികള് എത്രയും വേഗം ആരംഭിക്കണമെന്നും ജലവിഭവ മന്ത്രി റോഷി അഗസ്റ്റിന് നിര്ദേശം നല്കിയിട്ടുണ്ട്. 2020 സെപ്റ്റംബറിലാണ് മുഖ്യമന്ത്രി പിണറായി വിജയന് രണ്ടാം കുട്ടനാട് പാക്കേജ് പ്രഖ്യാപിച്ചത്.
കുട്ടനാടുമായി ബന്ധപ്പെട്ട് പ്രവര്ത്തിക്കുന്ന ജലവിഭവം, കൃഷി, ഫിഷറീസ്, ടൂറിസം അടക്കം ഒമ്പത് വകുപ്പുകളുടെ പദ്ധതിയില്പ്പെടുത്തിയാണ് പാക്കേജ് പ്രഖ്യാപിച്ചിട്ടുള്ളത്. കുട്ടനാട്ടിലെ കാര്ഷികമേഖലയുടെ വളര്ച്ചയും കര്ഷകവരുമാനത്തിന്റെ തോതും വര്ധിപ്പിക്കുക, വേമ്പനാട് കായല്വ്യവസ്ഥയെ പാരിസ്ഥിതിക ആഘാതങ്ങള് താങ്ങാന് കഴിയുന്ന സ്ഥിതിയിലാക്കുക, പ്രദേശവാസികളെ സുരക്ഷിതമായി ജീവിക്കാന് പ്രാപ്തരാക്കുക തുടങ്ങിയ ലക്ഷ്യങ്ങളാണ് പദ്ധതി മുന്നോട്ടുവെയ്ക്കുന്നത്.
പ്രഖ്യാപിച്ചിട്ട് മൂന്നുവര്ഷം; എങ്ങുമെത്താതെ 2447 കോടി പാക്കേജ്
കുട്ടനാട് പാക്കേജിന്റെ രണ്ടാംഘട്ടത്തില് വിവിധ പദ്ധതികള്ക്കായി 2447 കോടി രൂപ നീക്കി വച്ചതായി മുഖ്യമന്ത്രി പിണറായി വിജയന് പ്രഖ്യാപിച്ചിട്ട് വരുന്ന സെപ്റ്റംബര് 17ന് മൂന്ന് വര്ഷമാകും. പ്രളയത്തില് നിന്ന് കുട്ടനാടിനെ രക്ഷിക്കുകയെന്ന ലക്ഷ്യത്തോടെ ആവിഷ്കരിച്ച വിവിധ പദ്ധതികള് ഉള്പ്പെടുന്ന പാക്കേജ് ഇപ്പോഴും ഫയലുകളില് ഒതുങ്ങുകയാണ്.
2019 മാര്ച്ച് വരെയുള്ള ആദ്യഘട്ടത്തില് 1013.35 കോടി രൂപ കുട്ടനാട്ടിലെ വിവിധ പദ്ധതികള്ക്കായി വിനിയോഗിച്ചതായാണ് സര്ക്കാര് കണക്ക്. സംസ്ഥാന ആസൂത്രണ ബോര്ഡും കിഫ്ബിയും ബന്ധപ്പെട്ട വകുപ്പുകളും റീബില്ഡ് കേരള ഇന്ഷ്യേറ്റീവും ഏകോപിച്ച് രണ്ടാം കുട്ടനാട് പാക്കേജ് നടപ്പാക്കുമെന്നും ചില പദ്ധതികള്ക്ക് നൂറ് ദിനത്തിനുള്ളില് ഫലം കണ്ടുതുടങ്ങുമെന്നുമായിരുന്നു മുഖ്യമന്ത്രി വീഡിയോ കോണ്ഫറന്സിലൂടെ പ്രഖ്യാപിച്ചത്.
കുട്ടനാട് ബ്രാന്റ് അരി ഉത്പാദിപ്പിക്കാന് ആലപ്പുഴയില് സംയോജിത െറെസ് പാര്ക്ക് ഒരു വര്ഷത്തിനകം ആരംഭിക്കും, ഒരു നെല് ഒരു മീന് പദ്ധതി വരുന്ന സീസണ് മുതല് നടപ്പാക്കും, മത്സ്യബന്ധന തൊഴിലാളി കുടുംബങ്ങളിലെ സ്ത്രീകള്ക്കിടയില് സ്വയംസഹായസംഘങ്ങള് മെച്ചപ്പെടുത്തുന്നതിന്റെ ഭാഗമായി 89 സംഘങ്ങള്ക്ക് 1.79 കോടി രൂപ വായ്പയായി നല്കും. 13 പഞ്ചായത്തുകളിലെ കുടിവെള്ള പ്രശ്നം പരിഹരിക്കാന് 291 കോടി രൂപ ചെലവഴിച്ച് വാട്ടര് ട്രീറ്റ്മെന്റ് പ്ലാന്റ് സ്ഥാപിക്കാന് നടപടി സ്വീകരിക്കും തുടങ്ങിയ സുപ്രധാന പ്രഖ്യാപനങ്ങള് പോലും ഇതുവരെയും എങ്ങുമെത്തിയില്ല. വാട്ടര് ട്രീറ്റ്മെന്റ് പ്ലാന്റ് പദ്ധതി കിഫ്ബി സഹായത്തോടെയാണ് നടപ്പാക്കാന് തീരുമാനിച്ചിരുന്നത്.
കുട്ടനാട്ടില് തടസരഹിത െവെദ്യുതി ഉറപ്പാക്കുന്നതിന് റീബില്ഡ് കേരളയില് ഉള്പ്പെടുത്തി മൂന്ന് കെ. എസ്. ഇ. ബി സബ് സ്റ്റേഷനുകള് നിര്മിക്കുമെന്നും 110 കെ. വി സബ് സറ്റേഷന്റെ നിര്മാണം പതിനെട്ട് മാസത്തിനുള്ളില് കാവാലത്ത് പൂര്ത്തിയാകുമെന്നും 33 കെ. വി സബ്സ്റ്റേഷന് കിടങ്ങറയില് ഒരു വര്ഷത്തില് പൂര്ത്തിയാകുമെന്നും പ്രഖ്യാപിച്ചു.
അതും നടപ്പായില്ല. രണ്ട് സബ്സ്റ്റേഷനുകള്ക്കുമുള്ള ഭൂമി ലഭ്യമായിരുന്നെങ്കിലും അത് ഏറ്റെടുക്കുന്നതിനുള്ള നടപടികള് ഇതുവരെയും പൂര്ത്തിയായിട്ടില്ല. 66 കെ. വി സബ്സ്റ്റേഷന് 110 കെ. വിയായി ഒരു വര്ഷത്തില് പൂര്ത്തിയാകുമെന്നതും നടപ്പായില്ല. തോട്ടപ്പള്ളി സ്പില്വേയുടെ പ്രവര്ത്തനം കാര്യക്ഷമമാക്കുന്നതിനായി അടിഞ്ഞു കൂടിയ മണല് നീക്കം ചെയ്യുന്ന പ്രവര്ത്തി നടന്നിട്ടുണ്ട്. എന്നാല് ലീഡിങ് ചാനല് ആഴംകൂട്ടല് ഉള്പ്പടെ അനുബന്ധമായി ചെയ്ത് തീര്ക്കേണ്ടിയിരുന്ന പ്രവര്ത്തനങ്ങള് നിലച്ചുകിടക്കുകയാണ്.
