ആലുവ: കൊല്ലപ്പെട്ട അഞ്ചുവയസ്സുകാരിയുടെ അന്ത്യകര്മ്മങ്ങള് ചെയ്യാന് പൂജാരിമാര് വിസമ്മതിച്ചെന്ന പരാമര്ശത്തില് മാപ്പു ചോദിച്ച് ചാലക്കുടി സ്വദേശി രേവദ് ബാബു. തന്നില് നിന്നുണ്ടായ തെറ്റായ പരാമര്ശത്തില് സാമൂഹ്യമാധ്യമത്തിലൂടെയാണ് രേവദ് മാപ്പു ചോദിച്ചത്.
വായീന്ന് അറിയാതെ വീണുപോയ വാക്കാണെന്നും പൂജാരി സമൂഹത്തിന് മുഴുവന് വേദന ഉണ്ടാക്കിയതില് ആ സമൂഹത്തോട് മാപ്പു ചോദിക്കുന്നതായി ഫേസ്ബുക്ക് ലൈവിലെ വീഡിയോയില് പറഞ്ഞു. താന് എറണാകുളത്തെ പ്രസ്ക്ലബ്ബിന് മുന്നില് നിന്നുമാണ് വീഡിയോ ചെയ്യുന്നതെന്നും പറഞ്ഞു.
രേവദിനെതിരേ ആലുവ സ്വദേശി അഡ്വക്കേറ്റ് ജിയാസ് ജമാല് ആലുവ റൂറല് എസ്പിയ്ക്ക് പരാതി നല്കിയിരുന്നു. മാധ്യമ ശ്രദ്ധ നേടാനുള്ള വ്യാജ ആരോപണമാണ് നടത്തിയിരിക്കുന്നതെന്നും മതസ്പര്ദ്ദ ഉണ്ടാക്കാനും കലാപം ഉണ്ടാക്കാനും ശ്രമിച്ചുവെന്നുമായിരുന്നു പരാതിയില് ആരോപിച്ചിരുന്നത്.
ആരോപണം തെറ്റാണെന്ന് രേവദ് പിന്നീട് തുറന്നു പറഞ്ഞുവെന്നും മതസ്പര്ദ്ധ ഉണ്ടാക്കാന് ശ്രമിച്ചതിന് ചാലക്കുടി സ്വദേശിക്കെതിരെ കേസെടുക്കണമെന്നും പരാതിയില് അഡ്വ ജിയാസ് ജമാല് ആരോപിച്ചിരുന്നു.
ക്രൂരപീഡനത്തിന് ഇരയായി കൊല്ലപ്പെട്ട അഞ്ചു വയസുകാരിയുടെ അന്ത്യകര്മങ്ങള് നടത്താന് പൂജാരിമാര് വിസമ്മതിച്ചെന്നാണ് രേവദ് നേരത്തേ നടത്തിയ ആരോപണം. കുഞ്ഞിന്റെ മൃതദേഹം കീഴ്മാട് പൊതുശ്മശാനത്തില് സംസ്കരിച്ച ശേഷം വികാരാധീനനായിട്ടായിരുന്നു രേവദ് ഇക്കാര്യം പറഞ്ഞത്.
