ന്യൂയോര്ക്ക്: അമേരിക്കന് മേജര് ലീഗ് സോക്കറിലേക്ക് കൂടുമാറിയ ഇതിഹാസ ഫുട്ബോളര് ലിയോണേല് മെസ്സി അവിടേയും ഗോളടിച്ചു കൂട്ടുന്നു. ലീഗ്സ് കപ്പിലെ രണ്ടാം മത്സരത്തിന് ഇറങ്ങിയ മെസ്സി ഇന്റര്മിയാമിയെ ഇരട്ടഗോളടിച്ച് രണ്ടാം വിജയത്തിലേക്ക് നയിച്ചു. ഒര്ലാന്റോ സിറ്റിയ്ക്ക് എതിരേ നടന്ന മത്സരത്തില് 3-1 നായിരുന്നു മിയാമിയുടെ വിജയം.
കളിയുടെ മൂന്നാമത്തെയും 72 ാമത്തെയും മിനിറ്റുകളിലായിരുന്നു മെസ്സി സ്കോര് ചെയ്തത്. പെനാല്റ്റിയില് നിന്നും ജോസഫ് മാര്ട്ടിനെസ് ടീമിന്റെ ഒരു ഗോള് നേടി. മെസ്സിക്കൊപ്പം പഴയ ബാഴ്സിലോണയിലെ ടീം മേറ്റ് ജോര്ഡി ആല്ബയുടെ അരങ്ങേറ്റവും ഇന്റര്മിയാമി നടത്തി. ലീഗ് കപ്പിന്റെ പ്രീക്വാര്ട്ടര് മത്സരത്തിനായി മെസ്സിയും സംഘവും അടുത്തതായി പോകുന്നത് ടെക്സാസിലേക്കാണ്. അവിടെ എഫ്സി ഡള്ളാസുമായി മിയാമി ഏറ്റുമുട്ടും.
കളിയുടെ ഏഴാം മിനിറ്റില് തന്നെ മെസ്സി മിയാമിയെ മുന്നിലെത്തിച്ചു. ഒര്ലാന്റോ ബോക്സിലേക്ക് ടെയ്ലര് നല്കിയ പന്തിലേക്ക് ഓടിക്കയറിയ മെസ്സി പന്ത് ചെസ്റ്റിലെടുത്ത് വലയിലേക്ക് മറിച്ചു. പത്തുമിനിറ്റ് കഴിഞ്ഞപ്പോള് ഒര്ലാന്റോ ഒപ്പമെത്തി. സീസര് അരൗജോ ആയിരുന്നു സ്കോറര്. കോര്ണറില് നിന്നുമായിരുന്നു ഗോള് വന്നത്. 51 ാം മിനിറ്റില് മിയാമി വീണ്ടും മുന്നിലെത്തി. മാര്ട്ടീനസിനെ കാര്ലോസ് ഫൗള് ചെയ്തതില് കിട്ടിയ പെനാല്റ്റി അദ്ദേഹം തന്നെ വലയില് എത്തിച്ചു. 72 ാം മിനിറ്റില് മെസി ഗോള്നേട്ടം രണ്ടാക്കി. ഒരു കൗണ്ടര് അറ്റാക്കിന്റെ ഭാമായി ടെയ്ലറും മാര്ട്ടീനസും വഴി കിട്ടിയ പന്ത് മെസ്സി വലയില് എത്തിച്ചു.
21 ാം മിനിറ്റില് സൂപ്പര്താരം മഞ്ഞക്കാര്ഡും കണ്ടു. ഒര്ലാന്റോ സിറ്റി താരം വില്ഡര് കാര്ട്ടാജനയെ ഫൗള് ചെയ്തതിനാണ് കാര്ഡ് വാങ്ങിയത്. കളിയിലുടനീളം മെസ്സിയെ മാര്ക്ക് ചെയ്യാന് നിയോഗിക്കപ്പെട്ടത് ഈ പെറുവിയന് താരമായിരുന്നു. കളിയില് രണ്ടുഗോളുകള് കൂടി നേടിയതോടെ മെസ്സിയുടെ മിയാമിക്ക് വേണ്ടിയുള്ള ഗോള്നേട്ടം മൂന്ന് കളിയില് നിന്നും അഞ്ചായി ഉയര്ന്നിരിക്കുകയാണ്. 72 ാം മിനിറ്റിലായിരുന്നു മെസ്സിയുടെ പഴയ സഹതാരം ജോര്ഡി ആല്ബയെ മിയാമി കളത്തിലേക്ക് വിട്ടത്.
