ലോകത്തിലെ ഏറ്റവും തണുപ്പുള്ള മേഖലയാണ് അന്റാര്ട്ടിക്ക. മനുഷ്യ വാസംപോലും അസാധ്യമായ ഇവിടെ ചെടികള് വളരുന്നതുപോലും വിരളമാണ്. അതുകൊണ്ട് തന്നെ ശാസ്ത്ര പഠനങ്ങള്ക്ക് മാത്രമായിരിക്കും ആളുകള് ഇവിടം സന്ദര്ശിക്കാന് എത്തുന്നത്. എന്നാല് ഇപ്പോഴിതാ അന്റാര്ട്ടിക്കയില് നിന്ന് ഏറെ പ്രതീക്ഷ നല്കുന്ന ഒരു വാര്ത്തയാണ് പുറത്തുവരുന്നത്. അന്റാര്ട്ടിക്കയില് തണ്ണിമത്തങ്ങ വളര്ത്തി എടുത്തിരിക്കുകയാണ് ഒരു കൂട്ടം ശാസ്ത്രജ്ഞര്.
സാധാരണയായി അല്പം ചൂടൊക്കെയുള്ള സ്ഥലങ്ങളില് സമൃദ്ധമായി വളര്ന്ന് പുഷ്പിച്ച് ഫലം നല്കുന്ന ഫലമാണ് തണ്ണിമത്തങ്ങ അഥവാ വാട്ടര്മെലോണ്. എന്നാല് ഈ ഫലമാണ് ഇപ്പോള് ശാസ്ത്രജ്ഞര് കൊടുംതണുപ്പില് നട്ടുവളര്ത്തിയെടുത്തിരിക്കുന്നത്. അന്റാര്ട്ടിക്കയിലെ തന്നെ ഏറ്റവും തണുപ്പുള്ള മേഖലകളിലൊന്നില് സ്ഥിതി ചെയ്യുന്ന റഷ്യന് സ്റ്റേഷനായ വോസ്റ്റോക് സ്റ്റേഷനിലെ ശാസ്ത്രജ്ഞരാണ് നേട്ടം സ്വന്തമാക്കിയത്. മൈനസ് 89.2 ഡിഗ്രി സെല്ഷ്യസ് ആണ് ഇവിടത്തെ താപനില.
4300 വര്ഷം മുന്പാണ് ആഫ്രിക്കന് രാജ്യമായ സുഡാനില് തണ്ണിമത്തനുകള് പ്രത്യക്ഷപ്പെട്ടത്. സുഡാനിലും ഈജിപ്തിലുമുള്ള പ്രാചീന കലാനിര്മിതികളും ചിത്രങ്ങളിലുമൊക്കെ ഇവ കാണാം. അന്റാര്ട്ടിക്കയുമായി യാതൊരു സാമ്യവുമില്ലാത്ത ഇടമാണ് തണ്ണിമത്തന്റെ സ്വാഭാവിക പ്രജനന ഇടമെന്ന് ഇതില് നിന്നു വ്യക്തമാണ്.വോസ്റ്റോക് സ്റ്റേഷന്റെ ഹരിതഗൃഹത്തിലാണ് റഷ്യന് അന്റാര്ട്ടിക് എക്സ്പഡിഷനിലെ ശാസ്ത്രജ്ഞര് നേട്ടം കൈവരിച്ചത്. ഇതിനായി ഇവര് ഹരിതഗൃഹത്തിലെ താപനില കൂട്ടുകയും അന്തരീക്ഷ ഈര്പം വര്ധിപ്പിക്കുകയും ചെയ്യുകയായിരുന്നു.
ഹരിതഗൃഹത്തിലെ ചെറിയ അന്തരീക്ഷമര്ദം, ഓക്സിജന്റെ അഭാവം എന്നിവയുമായി പൊരുത്തപ്പെടുന്ന തണ്ണിമത്തന് വകഭേദങ്ങളാണ് ശാസ്ത്രജ്ഞര് വളര്ത്തിയത്. സൂര്യപ്രകാശത്തെ അനുകരിക്കുന്ന പ്രത്യേക പ്രകാശവും ഇതിനുള്ളില് സജ്ജമാക്കി. കീടങ്ങളില്ലാത്തതിനാല് പരാഗണം കൈകൊണ്ടാണ് നടത്തിയത്.103 ദിവസങ്ങള് പിന്നിട്ടതോടെ ശാസ്ത്രജ്ഞരുടെ ശ്രമങ്ങള് ഫലം കണ്ടു. 6 സസ്യങ്ങളിലായി 8 തണ്ണിമത്തന് പഴങ്ങളാണ് ഉണ്ടായത്. ഓരോ കിലോഗ്രാം തൂക്കം വയ്ക്കുന്ന നിലയിലേക്ക് ഈ തണ്ണിമത്തനുകള് വളര്ന്നെന്ന് റഷ്യന് അധികൃതര് വ്യക്തമാക്കി.
