നാഗ്പൂര്: ജൂഡീഷ്യറിയെയും നിയമവ്യവസ്ഥയെയൂം ഞെട്ടിച്ചുകൊണ്ട് കോടതിമുറിയില് ബോംബെ ഹൈക്കോടതി ജഡ്ജിയുടെ രാജി. വെള്ളയാഴ്ച തുറന്ന കോടതിയില് അപ്രതീക്ഷിതമായി അമ്പരപ്പിച്ചുകൊണ്ട് രാജി പ്രഖ്യാപനം നടത്തിയത് ബോംബെ ഹൈക്കോടതി ജഡ്ജി രോഹിത് ഡിയോ ആണ്. തന്നോട് ക്ഷമിക്കണമെന്നു കോടതിയിലുള്ളവരോട് പറഞ്ഞ അദ്ദേഹം ആത്മാഭിമാനം വിട്ട് പ്രവര്ത്തിക്കാനാകില്ലെന്നും വ്യക്തമാക്കി.
വ്യക്തിപരമായ കാര്യങ്ങളെന്നാണ് കാരണം പറഞ്ഞിരിക്കുന്നതെങ്കിലും അലഹബാദ് ഹൈക്കോടതിയിലേക്കുള്ള സ്ഥലംമാറ്റം ഉത്തരവാണ് അപ്രതീക്ഷിത രാജിക്ക് പിന്നിലെന്നാണ് അഭിഭാഷകര് സംശയിക്കുന്നത്. സുപ്രീംകോടതി കൊളീജിയത്തിന്റെ നിര്ദേശാനുസരണം ഹൈക്കോടതി റജിസ്ട്രി വ്യാഴാഴ്ച അലഹബാദ് ഹൈക്കോടതിയിലേക്ക് മാറാനുള്ള നിര്ദേശം നല്കിയിരുന്നു.
മഹാരാഷ്ട്ര മൂന് അഡ്വക്കേറ്റ് ജനറല് കുടിയായിരുന്ന ഡിയോ വെള്ളിയാഴ്ച തുറന്ന കോടതിയില് നടത്തിയ രാജി പ്രഖ്യാപനം അഭിഭാഷകരെയും അദ്ദേഹത്തിന്റെ കോടതിയില് നിയമവ്യവഹാരം നടത്തിയിരുന്നവരെയും ഞെട്ടിച്ചു. തുറന്ന കോടതിയില് പൊതുജനങ്ങളുടെ സാന്നിദ്ധ്യത്തില് ഒരു ഹൈക്കോടതി ജഡ്ജി പദവി രാജി വെയ്ക്കുന്നത് ഇന്ത്യന് ചരിത്രത്തില് തന്നെ ഒരു പക്ഷേ ആദ്യമായിരിക്കാമെന്നാണ് അഭിഭാഷകര് പറഞ്ഞത്.
രണ്ടു വര്ഷം കൂടി കാലാവധി ബാറ്റി നില്ക്കേയാണ് ഇന്ത്യയുടെ മുന് അസിസ്റ്റന്റ് സോളിസിറ്റര് ജനറല് കൂടിയായി സേവനം ചെയ്തിട്ടുള്ള ഡിയോയുടെ രാജി. 2025 ഡിസംബര് 4 നായിരുന്നു അദ്ദേഹത്തിന്റെ വിരമിക്കല് കാലാവധി. അതേസമയം ജോലി രാജി വെയ്ക്കുന്ന രണ്ടാമത്തെ ന്യായാധിപനാണ് ഡിയോ. 2022 ഫെബ്രുവരി 11 ന് ജസ്റ്റീസ് പുഷ്പ ഗാനേഡിവാല രാജിവെച്ചിരുന്നു.
തന്റെ രാജിക്കത്ത് രാഷ്ട്രപതിക്ക് അയച്ചിട്ടുണ്ടെന്ന് ഡിയോ പിന്നീട് മാധ്യമങ്ങളോട് പ്രതികരിക്കുകയും ചെയ്തു. എന്നാല് പെട്ടെന്ന് ഇത്തരമൊരു നീക്കം നടത്തുന്നതിന് പിന്നിലെ കാരണം അദ്ദേഹം വെളിപ്പെടുത്തിയില്ല. തന്റെ വ്യക്തിപരമായ തീരുമാനമാണെന്ന് മാത്രമായിരുന്നു പ്രതികരണം.
ഇക്കാര്യത്തില് ഇ മെയില് ഇന്ത്യയുടെ ചീഫ് ജസ്റ്റീസ് ധനജ്ഞയ് ചന്ദ്രചൂഡിനും ബോംബെ ഹൈക്കോടതി ചീഫ് ജസ്റ്റീസ് ദേവേന്ദ്ര ഉപാദ്ധ്യായയ്ക്കും സന്ദേശം അയച്ചിരുന്നതാണെന്നും ഹാര്ഡ്കോപ്പി ഇന്ന് രാവിലെ അയച്ചെന്നേയുള്ളെന്നും പറഞ്ഞു. 2017 ല് ഹൈക്കോടതിയില് ജസ്റ്റീസായി എത്തിയ ഡിയോ തന്റെ സഹപ്രവര്ത്തകരായ ജഡ്ജിമാരോട് ഇക്കാര്യം നേരത്തേ പറഞ്ഞിരുന്നു. അതിന് ശേഷമാണ് കോടതിയില് പൊതുജനങ്ങളെ അറിയിച്ചത്.
ഇന്ന് രാവിലെ ജസ്റ്റീസ് അനില് പന്സാരേയെ ഹൈക്കോടതി ജഡ്ജിയായി സ്ഥിര നിയമനം നല്കിയതിന്റെ ചടങ്ങുകളില് നിന്നും വിട്ടു നിന്ന് ഡിയോ എല്ലാവരെയും ഞെട്ടിച്ചിരുന്നു. ജഡ്ജിമാര് ചായയ്ക്ക് ഇരിക്കുമ്പോള് എത്തിയ ഡിയോ എന്താണ് താമസിച്ചതെന്ന് ചോദിച്ചപ്പോള് തന്റെ തീരുമാനം പെട്ടെന്ന് അറിയിക്കുകയായിരുന്നു. ഞെട്ടിപ്പോയ പലരും കാരണം ചോദിക്കുകയും തീരുമാനം പുന:പരിശോധിക്കാന് ആവശ്യപ്പെടുകയും ചെയ്തെങ്കിലും താന് അക്കാര്യത്തില് തീരുമാനം എടുത്തു കഴിഞ്ഞതായിട്ടായിരുന്നു മറുപടി. പിന്നീട് കോടതിയില് എത്തിയും അദ്ദേഹം തനിക്കു മുന്നിലുള്ള കേസുകള് കേള്ക്കും മുമ്പ് തന്നെ പ്രഖ്യാപനവും നടത്തുകയായിരുന്നു എന്നാണ് റിപ്പോര്ട്ടുകള്.
കോടതിയില് എത്തി വൈകാരികമായി അഭിഭാഷകരോടും കേസ് നടത്തുന്നവരോടും ക്ഷമ ചോദിച്ചു. വാദം കേള്ക്കുന്ന സമയത്ത് താന് ആരെയെങ്കിലും എപ്പോഴെങ്കിലും വേദനിപ്പിച്ചിട്ടുണ്ടെങ്കില് ക്ഷമിക്കണമെന്നും പറഞ്ഞു. ഏതെങ്കിലും തരത്തിലുള്ള പരാമര്ശങ്ങളും മറ്റും നടത്തിയിട്ടുണ്ടെങ്കില് അത് മെച്ചപ്പെടല് കൊണ്ടുവരുന്നതിന് വേണ്ടി നല്ല ഉദ്ദേശത്തോട് കൂടിയുള്ളതായിരുന്നെന്നും പറഞ്ഞു.
