ഇന്ത്യന് ടീമില് സൗഹൃദങ്ങള് ഇല്ലെന്നും ഒരിമിച്ച് കളിക്കുന്നവരേയുള്ളെന്നും ഓഫ് സ്പിന്നര് ആര് അശ്വിന്റെ വെളിപ്പെടുത്തല് ക്രിക്കറ്റ് ആരാധകരെ ഞെട്ടിച്ചത് ചെറുതായിട്ടൊന്നുമല്ല. ഇതിന് കാരണം ക്രിക്കറ്റിലെ പണക്കൊഴുപ്പ് മേളയായ ടി20 ലീഗ് ഐപിഎല് ആണെന്നും താരം പറയുന്നു.
ഇക്കാര്യത്തില് താന് പറഞ്ഞതും ആള്ക്കാര് മനസ്സിലാക്കിയതും വ്യത്യസ്തമാണ്. ഒടു ടൂറോ മറ്റോ ആണെങ്കില് സൗഹൃദത്തിന് ഏറെ സാധ്യതകള് ഉണ്ടെന്നും എന്നാല് ഇപ്പോള് ഇന്ത്യന് ടീമിലെ കളിക്കാര് വിവിധ ഫോര്മാറ്റുകളിലായി തുടര്ച്ചയായി കളിച്ചുകൊണ്ടിരിക്കുകയാണെന്നും താരം പറഞ്ഞു. വിവിധ ടീമുകള്ക്ക് വേണ്ടിയാണ് ഇവര് കളിക്കുന്നത്. ഇങ്ങിനെ കളിക്കുമ്പോള് സുഹൃത്തുക്കള് ഉണ്ടാകുക ഏറെ ബുദ്ധിമുട്ടാണ്.
ഇതിന് കാരണം ഇന്ത്യന് പ്രീമിയര് ലീഗാണ്. ടീമില് സൗഹൃദം ഇല്ലാതെ പോകുന്നതിന് ഒരു വലിയ ഘടകം ഐപിഎല്ലാണ്. ട്വന്റി20 ലീഗില് ഇന്ത്യന് ടീമിലെ കളിക്കാര് തന്നെ വിവിധ ടീമുകള്ക്കായി പരസ്പരം എതിരേ കളിക്കും. എല്ലാവരും ജയിക്കാന് വേണ്ടിയാണ് കളിക്കുന്നത്.
ഐപിഎല്ലില് കളിക്കുന്ന മൂന്ന് മാസം അന്താരാഷ്ട്ര തലത്തില് ഒരുമിച്ച് കളിച്ചിരുന്നവര് എതിരാളികളാകും. ഇങ്ങിനെ രണ്ടു ടീമുകളില് കളിക്കുമ്പോള് ഇവര് തമ്മില് സൗഹൃദം ഉണ്ടാകാനുള്ള സാധ്യത കുറയും. എന്നാല് വീണ്ടും ഇവര് ഒരുമിച്ചു വരികയും ചെയ്യും. അങ്ങിനെ നോക്കുമ്പോള് എല്ലാം മാറി മറിയും. അതുകൊണ്ടു തന്നെ താന് പറഞ്ഞതില് എന്തെങ്കിലും നെഗറ്റീവ് ഉണ്ടെന്ന് കരുതുന്നില്ലെന്നും താരം വ്യക്തമാക്കി.
