ന്യൂഡല്ഹി: യൂകെയില് ഏഴിലധികം ശിശുക്കളെ കൊലപ്പെടുത്തിയ നഴ്സിനെതിരേ മുന്നറിയിപ്പ് നല്കിയവരില് ഇന്ത്യന് ഡോക്ടറും. മുന് നഴ്സ് ലൂസി ലെറ്റ്ബിയ്ക്ക് എതിരേ താന് പങ്കുവെച്ച ആശങ്ക ഗൗരവമായി പരിഗണിച്ച് പോലസിനെ ഉടന് അറിയിച്ചിരുന്നെങ്കില് കുറേയെങ്കിലും ജീവന് രക്ഷിക്കാന് കഴിയുമായിരുന്നെന്ന് കൗണ്ടസ് ഓഫ് ചെസ്റ്റര് ഹോസ്പിറ്റിലെ കണ്സള്ട്ടന്റ് പീഡിയാട്രീഷ്യന് ഡോ. രവിജയറാം പറയുന്നു.
2015 നും 2016 നും ഇടയില് നടന്ന സംഭവത്തില് നഴ്സിനെ കുറ്റക്കാരിയായ മാഞ്ചസ്റ്റര് ക്രൗണ് കോടതി ജൂറി കണ്ടെത്തി. 33 കാരിയായ നഴ്സ് മറ്റ് ആറു കുട്ടികളെയും കൊല്ലാന് നോക്കിയതായും കണ്ടെത്തി. ലെറ്റ്ബി ഏറ്റവും ഗുരുതരമായ കാര്യങ്ങളാണ് ചെയ്തിരുന്നതെന്ന് കോടതിയില് ജയറാം പറഞ്ഞു. മനപ്പൂര്വ്വം എന്തെങ്കിലൂം ചെയ്തതായി തോന്നാത്ത രീതിയില് താന് പിടിക്കപ്പെടാത്ത രീതിയിലുള്ള കാര്യങ്ങളായിരുന്നു നഴ്സ് ലൂസി ലെറ്റ്ബി ചെയ്തിരുന്നത്. കുട്ടികളുടെ ഓക്സിജന് ലെവല് താഴ്ത്തിയിടുന്നത് ഉള്പ്പെടെ ഒന്നും സംഭവിക്കാത്തത് പോലെയുള്ള കാര്യങ്ങളാണ് ലെറ്റ്ബി ചെയ്തിരുന്നതെന്നും പറഞ്ഞു.
2015 ജൂണില് മൂന്ന് കുട്ടികള് മരിച്ചപ്പോഴായിരുന്നു ഡോ. ജയറാം ആദ്യം ആശങ്ക പങ്കുവെച്ചത്. പിന്നീട് കൂടുതല് കുട്ടികള് കുഴഞ്ഞുവീണു മിരിച്ചു. തന്നെപ്പോലെയുള്ള സീനിയര് ഡോക്ടര്മാര് ഹോസ്പിറ്റല് എക്സിക്യൂട്ടീവുകളുടെ പല യോഗത്തിലും ലെറ്റ്ബിയെക്കുറിച്ചുളള ആശങ്ക പങ്കുവെച്ചതാണെന്നും അന്ന് നടപടി എടുത്തിരുന്നെങ്കില് കുറച്ചു കുട്ടികളുടെയെങ്കിലും ജീവന് രക്ഷിക്കാന് കഴിയുമായിരുന്നെന്നും പറഞ്ഞു.
2017 ഏപ്രിലില് നാഷണല് ഹെല്ത്ത് സര്വീസ് പോലീസ് ഉദ്യോഗസ്ഥരും ഡോക്ടര്മാരും തമ്മിലുള്ള കൂടിക്കാഴ്ചയ്ക്ക് അനുമതി നല്കുകയും ചെയ്തിരുന്നു. എന്നാല് പത്തുമിനിറ്റില് താഴെ മാത്രമായിരുന്നു പോലീസുകാര് കേട്ടതെന്നും ഡോക്ടര് പറഞ്ഞു.
വിചാരണവേളയില് ഡോക്ടര് കുട്ടികളെ കൊലപ്പെടുത്തിയ രീതിയും തെളിവുകളും കോടതിയില് ഹാജരാക്കിയിരുന്നു. സ്വാഭാവിക മരണമെന്ന രീതിയില് സഹപ്രവര്ത്തകരെ വഞ്ചിച്ചായിരുന്നു ഇവര് കൊല നടത്തിയിരുന്നത്. സിറിഞ്ചില് വായു നിറച്ച് കുത്തിവെയ്ക്കുക, രക്തത്തിലേക്ക് അമിതമായി ഇന്സുലിന് കടത്തിവിടുക, ദഹനനാളത്തിലേക്ക് വായു കടത്തിവിടുക. ശ്വാസം മുട്ടിക്കുന്ന രീതിയില് ആവശ്യത്തില് കൂടുതല് പാല് കുടിപ്പിക്കുക എന്നിവയെല്ലാമായിരുന്നു കൊലപാതകത്തിന് ഉപയോഗിച്ച രീതി.
2018 ലാണ് ലെറ്റ്ബി ആദ്യമായി അറസ്റ്റ് ചെയ്യപ്പെട്ടത്. 2020 ല് ഇവര് കുറ്റക്കാരിയാണെന്നും കണ്ടെത്തി. വിചാരണവേളയില് കൊലപാതകത്തെക്കുറിച്ച് ഇവര് എഴുതിയ കയ്യെഴുത്തുപ്രതി ഉള്പ്പെടെ ഒരു കുന്നോളം തെളിവാണ് പോലീസ് ഹാജരാക്കിയത്.
''ഞാന് അവരെ മനഃപൂര്വം കൊന്നു, കാരണം അവരെ പരിപാലിക്കാന് ഞാന് യോഗ്യനല്ല''; 'ഞാന് ദുഷ്ടയാണ് ഞാന് ഇത് ചെയ്തു'; 'ഇന്ന് നിങ്ങളുടെ ജന്മദിനമാണ്, എന്നാല് നിങ്ങള് ഇവിടെ ഇല്ല, അതിന് ഞാന് ഖേദിക്കുന്നു'. എന്നിങ്ങനെയെല്ലാമുള്ള കുറിപ്പുകള് ലെറ്റ്ബിയുടെ മാനസീകനിലയെക്കുറിച്ച് ഉള്ക്കാഴ്ച നല്കുന്നതായിരുന്നു. എന്നാല് ആത്മവിശ്വാസം നഷ്ടമായ ഒരു സ്ത്രീയുടെ ആത്മഗതമെന്നായിരുന്നു വിചാരണവേളയില് ലെറ്റ്ബിയുടെ അഭിഭാഷകന് വാദിച്ചത്.
