തൃശൂര്: സംസ്ഥാനത്ത് റോഡരികില് സ്ഥാപിച്ച നിര്മിത ബുദ്ധി(എ.ഐ)യില് പ്രവര്ത്തിക്കുന്ന ക്യാമറയില് വലിയ വാഹനങ്ങളുടെ നിയമ ലംഘനങ്ങള് പകര്ത്താത്തതിനാല് സര്ക്കാരിന് കോടികളുടെ നഷ്ടം. ഇതുമൂലം ഖജനാവിന് പ്രതിദിനം 14 കോടിയോളം രൂപയുടെ നഷ്ടമുണ്ടാക്കുന്നതായാണ് കണക്ക്.
മാസത്തില് കണക്കാക്കിയാല് 420 കോടി രൂപയും വര്ഷത്തില് 51,110 കോടി രൂപയുമാണ് നഷ്ടം. വലിയ വാഹനങ്ങളുടെ നിയമലംഘനങ്ങള് എ.ഐ. ക്യാമറയില് നിലവില് പകര്ത്തുന്നില്ലെന്ന് സംസ്ഥാന ഇലക്ട്രോണിക് ഡെവലപ്മെന്റ് കോര്പ്പറേഷന് ലിമിറ്റഡ് കെല്ട്രോണ് ആണ് അറിയിച്ചത്. തൃശൂര് ആസ്ഥാനമായി പ്രവര്ത്തിക്കുന്ന സംഘടന 'നേര്ക്കാഴ്ച' അസോസിയേഷന് ഡയറക്ടര് പി.ബി. സതീഷിന് കെല്ട്രോണില്നിന്ന് ലഭിച്ച വിവരാവകാശ മറുപടിയിലാണ് ഇക്കാര്യം വ്യക്തമാക്കുന്നത്.
ദേശീയപാതയില് സഞ്ചരിക്കുന്ന ടോറസ് വാഹനങ്ങങ്ങള്ക്ക് താങ്ങാവുന്നതിനും ഇരട്ടിയിലധികം ഭാരമാണ് കൊണ്ടുപോകുന്നത്. യഥാര്ഥ ഭാരത്തേക്കാള് ഇരട്ടിയിലധികം പാറ ഉല്പ്പന്നങ്ങള് കയറ്റി പോകുന്നതിനാല് ദേശീയപാതയില് ടോറസ് വാഹനങ്ങള് നിയന്ത്രണം നഷ്ടപ്പെട്ട് നിരവധി അപകടങ്ങള് ഉണ്ടാകുന്നുണ്ട്.
നേര്ക്കാഴ്ചയുടെ നേതൃത്വത്തില് ഇതുസംബന്ധിച്ച് ഏകദിന സര്വേ നടത്തിയിരുന്നു. സര്വേയില് 443 ടോറസ് വാഹനങ്ങളാണ് നിയമം ലംഘിച്ച് ദേശീയപാതയിലൂടെ സഞ്ചരിക്കുന്നതായി കണ്ടെത്തിയത്.
ഈ വാഹനങ്ങള് പിടികൂടിയിരുന്നുവെങ്കില് അമിതഭാരത്തിനും നികുതി വെട്ടിപ്പിനും ദിവസം 14 കോടി രൂപയാണ് സര്ക്കാരിന് ലഭിക്കേണ്ടത്. ഇത്രയും വാഹനങ്ങളുടെ നിയമലംഘനത്തിലൂടെ ലഭിക്കേണ്ട പിഴസംഖ്യ െകെക്കൂലിയായി 'ഉത്തരവാദപ്പെട്ട'വരുടെ പോക്കറ്റിലേക്ക് പോകുകയാണെന്ന് സംഘടന ആരോപിച്ചു.
അഴിമതിയില് പെടാത്ത ഉദ്യോഗസ്ഥര് ഇത്തരം വാഹനങ്ങള് പിടികൂടാന് ഇറങ്ങിയാല് മാഫിയകളുടെ ആക്രമണവും നേരിടേണ്ടിവരും. കഴിഞ്ഞ ദിവസം ആലത്തൂരില് പരിശോധനയ്ക്കിടെ മോട്ടോര് വെഹിക്കിള് എന്ഫോഴ്സ്മെന്റ് ഉദ്യോഗസ്ഥനെ ആക്രമിച്ചിരുന്നു.
ഇത്തരം വാഹനങ്ങള് നിഷ്പ്രയാസം പിടികൂടാമെന്നാണ് എ.ഐ. ക്യാമറകളുടെ സജ്ജീകരണ സംവിധാനങ്ങളെ കുറിച്ച് ഉദ്യോഗസ്ഥര് അവകാശപ്പെട്ടിരുന്നത്.
ദേശീയപാതയില് നടക്കുന്ന കുറ്റകൃത്യങ്ങള്ക്ക് സുപ്രധാന തെളിവ് ലഭിക്കേണ്ടത് ക്യാമറ ദൃശ്യങ്ങളില്നിന്നാണ്. സംസ്ഥാനത്ത് 232 കോടി ചെലവില് 726 എ.ഐ. ക്യാമറകളു സ്ഥാപിച്ചിരിക്കുന്നത്. നിലവില് ക്യാമറയില് പകര്ത്തുന്നത് ഹെല്മെറ്റ് ധരിക്കാതെയുള്ള യാത്ര, രണ്ടുപേരില് കൂടുതല് ഇരുചക്ര വാഹനങ്ങളില് പോകുന്നത്, സീറ്റ് ബെല്റ്റ് ധരിക്കാതെയുള്ള യാത്ര തുടങ്ങിയ നിയമലംഘനങ്ങളാണ്.
ഇപ്പോള് വാഹനങ്ങളുടെ ദൃശ്യങ്ങള് മാത്രമാണ് എ.ഐ. ക്യാമറ ക്യാപ്ചര് ചെയ്ത് കണ്ട്രോള് റൂമിലേക്ക് അയക്കുന്നത്. വീഡിയോ ദൃശ്യങ്ങള് അയയ്ക്കുന്നില്ല. അതിനാല് ഹെവി വെഹിക്കിള്സിന്റെ നിയമലംഘനങ്ങള് ഇപ്പോള് പകര്ത്തുന്നില്ലെന്നാണ് വിവരാവകാശ രേഖ പ്രകാരമുള്ള മറുപടിയില് പറയുന്നത്.
