കോട്ടയം: പ്രവര്ത്തക സമിതി പുനഃസംഘടനയ്ക്കു പിന്നാലെ കേരളത്തിലെ പാര്ട്ടിയില് പരിഭവങ്ങള് പുകഞ്ഞു തുടങ്ങി. രമേശ് ചെന്നിത്തലയ്ക്കു പ്രവര്ത്തക സമിതി അംഗത്വം ലഭിക്കാത്തതിന്റെ പേരില് പരിഭവമുണ്ടെന്നു സൂചന. ഇപ്പോള് കിട്ടിയത് 19 വര്ഷം മുന്പുള്ള സ്ഥാനമാണെന്നും യാതൊരു ചര്ച്ചയും നടത്താതെയാണ് പ്രവര്ത്തക സമിതിയെ പ്രഖ്യാപിച്ചതെന്നും ചെന്നിത്തല പക്ഷം പ്രതികരിച്ചു.
നിലപാട് പാര്ട്ടിയെ അറിയിക്കുമെന്നും പരസ്യ പ്രതികരണത്തിനില്ലെന്നുമാണു രമേശ് ചെന്നിത്തലയുടെ നിലപാട്. എന്നാല്, രമേശിനു പ്രതിഷേധമില്ലെന്നു പ്രതിപക്ഷ നേതാവ് വി.ഡി. സതീശന് അറിയിച്ചു.
തനിക്കെതിരേ മത്സരിച്ച ശശി തരൂരിനെയും രാജസ്ഥാനിലെ വിമത നേതാവ് സച്ചിന് െപെലറ്റിനെയും ജി-23 നേതാക്കളെയും ഉള്പ്പെടുത്തി മല്ലികാര്ജുന് ഖാര്ഗെ കോണ്ഗ്രസ് പ്രവര്ത്തക സമിതി പുനഃസംഘടിപ്പിച്ചു. അദ്ദേഹം പാര്ട്ടി അധ്യക്ഷനായി ചുമതലയേറ്റ് 10 മാസത്തിനുശേഷമാണു പുനഃസംഘടന.
കേരളത്തില്നിന്നു കെ.സി. വേണുഗോപാലും മുതിര്ന്ന അംഗം എ.കെ. ആന്റണിയും പ്രവര്ത്തക സമിതിയില് തുടരും. യുവ നേതാവ് കനയ്യ കുമാറിനൊപ്പം രമേശ് ചെന്നിത്തല സ്ഥിരം ക്ഷണിതാക്കളുടെ പട്ടികയില് ഇടംപിടിച്ചു. കൊടിക്കുന്നില് സുരേഷിനെ പ്രത്യേക ക്ഷണിതാവായും ഉള്പ്പെടുത്തി.
ലോക്സഭാ തെരഞ്ഞെടുപ്പിനു എട്ടു മാസം ശേഷിക്കെയാണു കോണ്ഗ്രസിന്റെ ഉയര്ന്ന വേദിയായ പ്രവര്ത്തക സമിതി പുനഃസംഘടിപ്പിച്ച് തെരഞ്ഞെടുപ്പിനു പാര്ട്ടി ഒരുങ്ങുന്നത്.
39 അംഗ പ്രവര്ത്തക സമിതിയാണു പ്രസിഡന്റ് മല്ലികാര്ജുന് ഖാര്ഗെ പ്രഖ്യാപിച്ചത്. ഇതിനു പുറമേ 32 സ്ഥിരം ക്ഷണിതാക്കളെയും ഒമ്പതു പ്രത്യേക ക്ഷണിതാക്കളെയും നിയമിച്ചു. തരൂര്, സച്ചിന് െപെലറ്റ്, മനീഷ് തിവാരി, കനയ്യ കുമാര്, കൊടിക്കുന്നില് സുരേഷ് തുടങ്ങിയവരടക്കം 15 പുതുമുഖങ്ങള്.
പാര്ട്ടി അധ്യക്ഷയായിരുന്ന സോണിയാ ഗാന്ധിക്ക് കത്തെഴുതുകയും പാര്ട്ടി നേതൃത്വത്തിനെതിരേ രംഗത്തെത്തുകയും ചെയ്ത ''തിരുത്തല് വാദികളായ'' ജി-23 നേതാക്കളില് മുകുള് വാസ്നിക്, ആനന്ദ് ശര്മ എന്നിവര്ക്ക് പ്രവര്ത്തക സമിതിയില് സ്ഥാനം ലഭിച്ചു.
ജി-23യില് അംഗമായിരുന്ന മനീഷ് തിവാരിയും വീരപ്പ മൊയ്ലിയും സ്ഥിരം ക്ഷണിതാക്കളുടെ പട്ടികയില് ഇടംപിടിച്ചു. പഞ്ചാബില്നിന്നുള്ള പ്രമുഖ ഹിന്ദു മുഖമാണു തിവാരി. പഞ്ചാബ് പി.സി.സി. അധ്യക്ഷനായിരുന്ന സുനില് ഝാക്കര് ബി.ജെ.പിയില് ചേര്ന്ന സാഹചര്യത്തിലാണു തിവാരിക്കു പരിഗണന ലഭിച്ചത്.
സി.പി.ഐ. വിട്ട് കോണ്ഗ്രസില് ചേര്ന്ന നേതാവാണു കനയ്യ കുമാര്. ബിഹാറില് നിന്നുള്ള കനയ്യ കുമാറിനെ കഴിഞ്ഞ മാസം നാഷണല് സ്റ്റുഡന്റ്സ് യൂണിയന് ഓഫ് ഇന്ത്യ(എന്.എസ്.യു.ഐ)യുടെ എ.ഐ.സി.സി. ഇന് ചാര്ജായി നിയമിച്ചിരുന്നു. 2020 ല് രാജസ്ഥാനില് വിമത നീക്കം നടത്തിയ നേതാവാണു സച്ചിന് െപെലറ്റ്.
തിരുവനന്തപുരത്തുനിന്നു മൂന്നു തവണ ലോക്സഭാംഗമായ ശശി തരൂര്, കോണ്ഗ്രസ് പ്രസിഡന്റ് തെരഞ്ഞെടുപ്പില് ഔദ്യോഗിക സ്ഥാനാര്ഥിയായ രംഗത്തുണ്ടായിരുന്ന മല്ലികാര്ജുന് ഖാര്ഗെയ്ക്കെതിരേ മത്സരിച്ചു പരാജയപ്പെട്ടിരുന്നു. അന്നു കാര്യമായ പിന്തുണ ലഭിച്ചില്ലെങ്കിലും തരൂരിന്റെ മികവ് ദേശീയതലത്തില് ഉപയോഗിക്കുക എന്ന ലക്ഷ്യത്തോടെയാണ് നേതൃത്വം അദ്ദേഹത്തെ പ്രവര്ത്തക സമിതിയിലേക്കു പരിഗണിച്ചത്.
മുതിര്ന്ന നേതാക്കളായ സോണിയ ഗാന്ധി, മന്മോഹന് സിങ്, രാഹുല് ഗാന്ധി, പ്രിയങ്ക ഗാന്ധി തുടങ്ങിയവരുടെ പിന്തുണയോടെയാണ് അദ്ദേഹം പ്രവര്ത്തക സമിതിയിലേക്ക് എത്തുന്നത് എന്നാണു സൂചന.
പ്രവര്ത്തക സമിതിയില് സച്ചിന് െപെലറ്റ്, ഗൗരവ് ഗൊഗോയ്, കമലേശ്വര് പട്ടേല് എന്നിവര് മാത്രമാണ് 50 വയസില് താഴെയുള്ളവര്. നിയമസഭാ തെരഞ്ഞെടുപ്പിലേക്കു നീങ്ങുന്ന രാജസ്ഥാനില്നിന്നു നാലു പേരാണ് പ്രവര്ത്തകസമിതിയലുള്ളത്.
