ബംഗലുരു: ക്വീന്സ് റോഡിലെ കെപിസിസി ഓഫീസില് അനധികൃത ഫ്ളെക്സ് ബാനര് വെച്ചതിന് കര്ണാട ഉപമുഖ്യമന്ത്രിയും കോണ്ഗ്രസ് അദ്ധ്യക്ഷനുമായ ഡി.കെ. ശിവകുമാറിന് 50,000 രൂപ പിഴയടിച്ച് ബംഗലുരുവിലെ മഹാനഗര പാലിക. രണ്ടാഴ്ചയ്ക്കുള്ളില് പണമടയ്ക്കാനാണ് നിര്ദേശം.
നഗരത്തില് ഫ്ളക്സ് ബോര്ഡുകള് സ്ഥാപിക്കരുതെന്ന് എല്ലാ രാഷ്ട്രീയക്കാരോടും നേരത്തേ ബംഗലുരുവിന്റെ വികസനമന്ത്രിയും ഉപ മുഖ്യമന്ത്രിയുമായ ഡി.കെ. ശിവകുമാര് അഭ്യര്ത്ഥിച്ചിരുന്നു. ഇത്തരം നിയമലംഘനങ്ങള്ക്ക് 50,000 രൂപ പിഴയിട്ടോളാന് ബ്രുഹത്ത് ബംഗലുരു മഹാനഗര പാലിക (ബിബിഎംപി)യ്ക്ക് ശിവകുമാര് നിര്ദേശവും നല്കിയിട്ടുണ്ടായിരുന്നു.
അസിസ്റ്റന്റ് റവന്യൂ ഓഫീസറിന്റെ നേതൃത്വത്തില് എത്തിയ ബിബിഎംപി ഉദ്യോഗസ്ഥര് അനധികൃത ഫ്ളക്സ് ബാനര് നീക്കം ചെയ്ത ശേഷമാണ് ശിവകുമാറിന് പിഴ അടിച്ചത്. നേരത്തേ അനധികൃത ഫ്ളക്സ് ബാനറുകള് നീക്കം ചെയ്യുന്നതിന് പൗരന്മാരോടും രാഷ്ട്രീയ പാര്ട്ടികളോടും ശിവകുമാര് സഹകരണം ആവശ്യപ്പെട്ടിരുന്നു. കെപിസിസിയുടെ പിന്നാക്ക വിഭാഗമാണ് ബാനര് വെച്ചത്.
രാജീവ് ഗാന്ധിയുടേയും കര്ണാടക മുന് മുഖ്യമന്ത്രി ഡി. ദേവരാജയുടെയും ജന്മ വാര്ഷികത്തിലായിരുന്നു ബോര്ഡ് വെച്ചത്. അതാകട്ടെ ഔദ്യോഗികമായ യാതൊരു അനുമതിയും വാങ്ങാതെയായിരുന്നു താനും.
ബോര്ഡിന്റെ ഉത്തരവാദിത്വം വെച്ച് കര്ണാടക കോണ്ഗ്രസ് പ്രദേശ് കമ്മറ്റിയുടെ തലവന് എന്ന നിലയിലാണ് ഡി ശിവകുമാറിന് ഫൈന് അടിച്ചുകൊടുത്തത്. ബാങ്ക് അക്കൗണ്ടു വഴി പിഴ അടയ്ക്കാനാകുമെന്ന് കെപിസിസി പ്രസിഡന്റിന് അയച്ച നോട്ടീസില് ബിബിഎംപി പറഞ്ഞിട്ടുണ്ട്.
