ബോളിവുഡിന്റെ പ്രിയ താരദമ്പതിമാരായ രണ്ബീര് കപൂറിന്റെയും ആലിയ ഭട്ടിന്റെയും വിശേഷങ്ങളറിയാന് എന്നും എപ്പോഴും ആരാധകര് ആവേശത്തോടെ കാത്തിരിക്കാറുണ്ട്. അഞ്ച് വര്ഷം നീണ്ട പ്രണയത്തിനൊടുവില് നടന്ന ഇവരുടെ വിവാഹവും കുഞ്ഞ് ജനിച്ചതുമൊക്കെ ആരാധകര് ആഘോഷങ്ങളാക്കിയതാണ്. ഇവരുടെ കുഞ്ഞിന്റെ വിശേഷങ്ങള് പങ്കുവയ്ക്കുമ്പോള് ആരാധകരത് സന്തോഷത്തോടെ ഏറ്റെടുക്കാറുണ്ട്. ഇപ്പോഴിതാ മകള് റാഹ ജനിച്ചപ്പോള് അവളുടെ കണ്പീലികളാണ് താന് ആദ്യം ശ്രദ്ധിച്ചതെന്ന് വെളിപ്പെടുത്തിയിരിക്കുകയാണ് ആലിയ.
‘‘രണ്ബീറിന്റെ നീളമുള്ള മനോഹരമായ കണ്പീലികള് എനിക്ക് ഒരുപാട് ഇഷ്ടമാണ്. എനിക്ക് അതുപോലെയുള്ള കണ്പീലികള് ഇല്ല. രണ്ബീറിനെപ്പോലെയുള്ള കണ്പീലികള് മകള്ക്കുണ്ടാകണമെന്നായിരുന്നു ആഗ്രഹം. റാഹ ജനിച്ചപ്പോൾ അവള്ക്ക് നീളമുള്ള കണ്പീലികള് ഉണ്ടോയെന്ന് പരിശോധിക്കാൻ ഞാന് രൺബീറിനോട് ആവശ്യപ്പെട്ടു. ഭാഗ്യത്തിന് അതുപോലെ മനോഹരമായ കണ്പീലികള് തന്നെ അവള്ക്ക് ലഭിച്ചു...’’ ആലിയ പറയുന്നു.
അടുത്തിടെ ലിപ്സ്റ്റിക് ഉപയോഗത്തെ പറ്റിയുള്ള ആലിയയുടെ ഒരു വീഡിയോ അടുത്തിടെയാണ് സോഷ്യല് മീഡിയയില് വൈറലായിരുന്നു. എപ്പോഴും ലിപ്സ്റ്റിക് ഇട്ടതിന് ശേഷം ഡാര്ക്ക് കളര് മാറാനായി ചെറുതായൊന്ന് മായ്ക്കാറുണ്ടെന്ന് ആലിയ വീഡിയോയില് പറഞ്ഞു. ഭര്ത്താവ് രണ്ബീറിന് താൻ ലിപ്സ്റ്റിക് ഉപയോഗിക്കുന്നത് ഇഷ്ടമല്ലെന്നും, എപ്പോഴും ലിപ്സ്റ്റിക് മായ്ക്കാന് ആവശ്യപ്പെടാറുണ്ടെന്നും ആലിയ പറഞ്ഞിരുന്നു. നാച്ചുറല് നിറത്തില് ചുണ്ടുകള് കാണാനാണ് ഭര്ത്താവിന് ഇഷ്ടമെന്നും കാമുകനായിരിക്കോഴും രണ്ബീര് തന്റെ ലിപ്സ്റ്റിക് നീക്കം ചെയ്യാന് പറയാറുണ്ടായിരുന്നു എന്നുമാണ് താരം പറഞ്ഞത്. ഈ വീഡിയോ വന്നതോടെ ഒരുപാട് വിമര്ശനങ്ങളും തുടങ്ങി.
‘നിങ്ങളുടെ ഭര്ത്താവ് ടോക്സിക്കാണെന്നും ഇത്തരത്തിലുള്ള റിലേഷൻഷിപ്പാണ് അല്ലാതെ ലിപ്സ്റ്റിക്കല്ല മായ്ച്ച് കളയേണ്ടത്, ഇന്ത്യയിലെ ഒരു പ്രശസ്തയായ നടി ഇതിലൂടെ കടന്നുപോകുന്നുണ്ടെന്ന് വിശ്വസിക്കാൻ കഴിയുന്നില്ല’ എന്നതടക്കം കമന്റുകള് ഉയര്ന്നു. തന്റെ ശബ്ദം ഉയരുന്നതു പോലും ഭര്ത്താവിന് ഇഷ്ടമല്ലെന്നും ആലിയ മുമ്പ് ഒരു അഭിമുഖത്തില് പറഞ്ഞതും വലിയ വിമര്ശനങ്ങള്ക്ക് കാരണമായിരുന്നു.
