ഗുര്ഗോണ്: വിഎച്ച്പിയുടെ ബ്രിജ് മണ്ഡല് ജലാഭിഷേക് യാത്രയില് പങ്കെടുക്കരുതെന്ന് നാട്ടുകാരോട് അഭ്യര്ത്ഥിച്ച് ഹരിയാന മുഖ്യമന്ത്രി മനോഹര് ലാല് ഖട്ടാര്. സര്ക്കാര് അനുവാദം നിഷേധിക്കപ്പെട്ട പരിപാടിയില് പങ്കെടുക്കുന്നതിന് പകരം ക്ഷേത്രദര്ശനം നടത്തുകയോ ബന്ധുവീടുകളില് പോകുകയോ ചെയ്യാനാണ് മുഖ്യമന്ത്രി ആവശ്യപ്പെട്ടിരിക്കുന്നത്.
എന്നാല് പരിപാടി പറഞ്ഞ സമയത്ത് തന്നെ നടത്തുമെന്നാണ് വിഎച്ച്പി അംഗങ്ങള് പറയുന്നത്. ഗുര്ഗോണില് നിന്നും നൂഹിലേക്ക് പതിവായി നടത്തപ്പെടുന്ന പാതയിലൂടെ തന്നെ നടക്കുമെന്നും പറയുന്നു. വലിയജനക്കൂട്ടം ഉണ്ടാകുന്നത് സംഘര്ഷത്തിനുള്ള സാധ്യതയുണ്ടാക്കുമെന്നും നൂഹിലെ ക്രമസമാധാന പാലനത്തിന് ഭംഗം വരുമെന്നും ഞായറാഴ്ച പഞ്ചകുലയില് നടന്ന പരിപാടിയില് ഖട്ടാര് പറഞ്ഞു.
സര്ക്കാരിനോട് സഹകരിച്ച് പരിപാടിയില് പങ്കെടുക്കാതിരിക്കാന് ശ്രദ്ധിക്കണം. ഈ സമയത്ത് തൊട്ടടുത്തുള്ള ശിവ ക്ഷേത്രത്തില് പോയി പ്രാര്ത്ഥന നടത്തണം. ഇത് ശ്രാവണ മാസത്തിലെ അവസാന തിങ്കളാഴ്ചയാണെന്നും അതുമായി നിങ്ങള് എത്ര ആഴത്തില് ബന്ധമുണ്ടെത്ത് തനിക്കറിയാം. എങ്കിലും ജൂലൈ 31 ന് നൂഹില് ഉണ്ടായ സംഭവം വെച്ച് പ്രദേശത്തെ ക്രമസമാധാനപാലനം അതിനേക്കാള് പ്രധാനമാണെന്നും പറഞ്ഞു.
നിരോധനാജ്ഞ പ്രഖ്യാപിച്ച ജില്ലയില് ഒരു സ്ഥാപനങ്ങളും തുറന്നില്ല. വിദ്യാഭ്യാസ സ്ഥാപനങ്ങള്ക്കും, സര്ക്കാര് ഓഫീസുകള്ക്കും മുന് കരുതലായി അവധി പ്രഖ്യാപിച്ചിട്ടുണ്ട്. നൂഹില് പോലീസ് ജാഗ്രത കടുപ്പിച്ചിട്ടുണ്ട്. അതിര്ത്തിയില് കര്ശന പരിശോധനയാണ്. തിരിച്ചറിയല് കാര്ഡ് ഇല്ലാത്തവരെ ആരെയും കടത്തി വിടുന്നില്ല. മറ്റു ജില്ലകളില് നിന്നുള്ളവര് പങ്കെടുത്താല് നടപടി എന്ന് പൊലീസ് അറിയിച്ചു. സ്ഥലത്തെ പൊലീസ് വിന്യാസവും കൂട്ടിയിട്ടുണ്ട്. ആവശ്യം വന്നാല് സൈന്യത്തിന്റെ സഹായവും തേടും.
