കൊച്ചി: സംസ്ഥാനത്തെ ഹാര്ബറുകളിലെ കണ്സ്യൂമര് ഇന്ധനപമ്പുകളില് നികുതിവെട്ടിച്ചു മംഗലാപുരം, മാഹി ഡീസല് എത്തുന്നതായി കണ്ടെത്തല്. സ്വകാര്യ കണ്സ്യൂമര് ഡീസല് ഔട്ട്ലെറ്റുകളില് പൊതു (ജനറല്) പമ്പുകളിലെ സബ്സിഡി ഇന്ധനമെത്തിച്ചാണു വ്യാപകമായി തട്ടിപ്പു നടക്കുന്നത്. സര്ക്കാരിനു ഭീമമായ നഷ്ടമുണ്ടാക്കുന്ന വെട്ടിപ്പിനു നേരേ ഒരുവിഭാഗം ഉദ്യോഗസ്ഥര് കണ്ണടയ്ക്കുന്നതു വലിയ നികുതി നഷ്ടമാണുണ്ടാക്കുന്നത്.
കുറഞ്ഞ വിലയ്ക്കാണു മംഗലാപുരം ഡീസല് കേരളത്തിലെത്തുന്നത്. പരിശോധനയില്ലാത്തതിനാല്, പ്രതിദിനം നിരവധി വണ്ടികള് തീരദേശത്തെ പമ്പുകളില് എത്തുന്നു. മാഹി, പോണ്ടിച്ചേരി എന്നിവിടങ്ങളില് നിന്നും ഡീസല് വണ്ടികള് എത്തുന്നുണ്ട്. പഞ്ചാബ്, ഹരിയാന, രാജസ്ഥാന് രജിസ്ട്രേഷനുള്ള ടാങ്കര് ലോറികളില് അന്യസംസ്ഥാനങ്ങളിലേക്കുള്ള ലോഡ് എന്ന വ്യാജേനയാണു സംസ്ഥാനത്തിനകത്തു ഡീസല് എത്തിക്കുന്നത്.
അന്യസംസ്ഥാന ടാങ്കറുകള്ക്കു കേരളത്തില് വിതരണം നടത്താന് അനുവാദമില്ല. കഴിഞ്ഞദിവസം മാഹിയില്നിന്നു വന്ന ടാങ്കര് കഴിഞ്ഞദിവസം വില്പന നികുതി ഉദ്യോഗസ്ഥര് പിടികൂടിയിരുന്നു. ഡീസല് ലിറ്ററിനു 6-7 രൂപ വ്യത്യാസമാണു മാഹിയുമായുള്ളത്. അയല് സംസ്ഥാനങ്ങളിലെ പമ്പുകള്ക്കുള്ള ബില് ഉപയോഗിച്ചാണു കേരളത്തിലെ കണ്സ്യൂമര് പമ്പുകളില് ഇന്ധനമെത്തിക്കുന്നത്.
ഐസ് ഫാക്ടറികളും മത്സ്യബന്ധന ബോട്ടുകള് ഉള്പ്പെടെയുള്ള ജലയാനങ്ങളുമാണു കണ്സ്യൂമര് പമ്പുകളുടെ പ്രധാന ഉപഭോക്താക്കള്. സ്വന്തം വ്യവസായാവശ്യത്തിനാണു സ്വകാര്യ കണ്സ്യൂമര് പമ്പുകള് സംരംഭകര്ക്ക് അനുവദിക്കുന്നത്. സ്വകാര്യ കണ്സ്യൂമര് പമ്പുകളേക്കാള് സ്ബിസിഡി നിരക്കിലാണു ഇന്ധന കമ്പനികള് പൊതു പമ്പുകള്ക്കു ഡീസല് നല്കുന്നത്. കണ്സ്യുമര് പമ്പുകളില് വിലകൂടുതലായതിനാല്, ബോട്ടുകാര് സാധാരണ പമ്പുകളില് നിന്നു ഡീസല് വാങ്ങുന്നതു തടയാനാണു നികുതി വെട്ടിച്ചു അയല് സംസ്ഥാനങ്ങളില്നിന്നു ഡീസല് കൊണ്ടുവരുന്നത്. പൊതു ഔട്ട്ലെറ്റുകള്ക്കു സബ്സിഡി നിരക്കില് ഇന്ധനം കിട്ടുമെന്നതിനാല്, ആ വിലയ്ക്കുതന്നെ സ്വകാര്യ പമ്പുകളില് വില്പന നടത്തേണ്ടി വരുന്നു.
സബ്സിഡി ഇല്ലാതെ, സാധാരണ പമ്പുകളിലെ വിലയ്ക്കു ഡീസല് വില്ക്കുന്നതു വലിയ നഷ്ടമാണ്. കണ്സ്യൂമര് പമ്പുകളില് സാധാരണ പമ്പുകള്ക്കുള്ള ഇന്ധനമെത്തിച്ചു വില്പന നടത്തുന്നതു സര്ക്കാരിനു ലക്ഷങ്ങളുടെ നികുതി നഷ്ടം ഉണ്ടാക്കുന്നതായി വില്പന നികുതി ഉദ്യോഗസ്ഥര് പറയുന്നു. തീരദേശത്തെ കണ്സ്യൂമര് പമ്പുകളില് തിരക്കേറുന്ന സാഹചര്യത്തില് പരിശോധന ശക്തമാക്കാനാണു നീക്കം.
പൊതുമേഖല എണ്ണക്കമ്പനികളുടെ ഔട്ട്ലെറ്റുകള്ക്കുള്ള സബ്സിഡി ഡീസലാണു എണ്ണക്കമ്പനി ഉദ്യോഗസ്ഥരുമായി ഒത്തുകളിച്ചു കണ്സ്യൂമര് പമ്പുകാര് കൊണ്ടുവരുന്നത്. കണ്സ്യൂമര് പമ്പുകളില് സബ്സിഡി നിരക്കില് ഇന്ധനം വില്ക്കാന് പാടില്ല. സ്വന്തം ആവശ്യത്തിനാണു മാത്രമേ ഉപയോഗിക്കാവൂ. മറിച്ചുവില്ക്കാനാവില്ല എന്നിരിക്കേയാണു വ്യാപകമായ നികുതിവെട്ടിപ്പു നടക്കുന്നത്.
