ട്രക്കില് കൊണ്ടുവന്ന തേനീച്ച കൂടുകള് തെറിച്ചു വീണതിനെ തുടര്ന്ന് പ്രദേശത്ത് വ്യാപിച്ചത് അക്രമാസക്തരായ തേനീച്ചകള്. വിവിധ പെട്ടികളില് നിന്നായി ഏകദേശം അഞ്ച് ലക്ഷത്തോളം തേനീച്ചകളാണ് റോഡിലും സമീപ സ്ഥലങ്ങളിലുമായി വ്യാപിച്ചത്. കാനഡയിലെ ഒന്റോറിയയിലാണ് ഞെട്ടിക്കുന്ന സംഭവം. ഒന്റോറയോയിലെ ബര്ലിംഗ്ടണില് ഹൈവേയില് വച്ചാണ് ട്രക്കില് നിന്നും തേനീച്ച പെട്ടികള് തെറിച്ചുവീണത്. ഇതോടെ തേനീച്ചകള് സമീപപ്രദേശങ്ങളില് എങ്ങും വ്യാപിക്കുകയായിരുന്നു. തുടര്ന്ന് ഒന്റാറിയോയിലും പരിസരപ്രദേശങ്ങളിലുമുള്ള തേനീച്ച പിടുത്തക്കാരുടെ സഹായത്തോടെ പോലീസ് സ്ഥിതിഗതികള് ശാന്തമാക്കുകയായിരുന്നു.
ബുധനാഴ്ച പുലര്ച്ചെ 6.15 ഓടെയാണ് തേനീച്ചകള് നിറച്ച പെട്ടികള് റോഡിലേക്ക് തെറിച്ചു വീണതായി ഹാള്ട്ടണ് റീജിയണല് പോലീസിന് വിവരം ലഭിച്ചത്. തുടര്ന്ന് പോലീസ് സ്ഥലത്തെത്തിയപ്പോഴേക്കും പരിസരപ്രദേശങ്ങളില് എങ്ങും തേനീച്ചകള് വ്യാപിച്ചിരുന്നു. ഉടന് തന്നെ പരിസരവാസികള്ക്ക് ജാഗ്രതാ മുന്നറിയിപ്പ് നല്കുകയും തേനീച്ച കൂട്ടത്തെ പിടികൂടാനുള്ള ശ്രമങ്ങള് ആരംഭിക്കുകയും ചെയ്തു. ഇത്രമാത്രം തേനീച്ച പെട്ടികള് എങ്ങനെയാണ് ട്രക്കില് നിന്നും തെറിച്ചു വീണത് എന്നതിനെക്കുറിച്ച് ഇതുവരെയും കണ്ടെത്തിയിട്ടില്ല. ട്രക്കിന്റെ ഡോര് തുറന്നു പോയത് ഡ്രൈവര് അറിയാതിരുന്നതാകാം ഇത്തരത്തില് ഒരു സാഹചര്യമുണ്ടാകാന് കാരണമായത് എന്നാണ് പോലീസിന്റെ പ്രാഥമിക നിഗമനം.
ട്രക്കില് നിന്നും തെറിച്ച് വീണ 5 ദശലക്ഷത്തോളം തേനീച്ചകളെ തേനീച്ച പിടുത്തക്കാരുടെ സഹായത്തോടെ പിടികൂടുകയും സ്ഥിതിഗതികള് ശാന്തമാക്കിയെന്നും ഹാള്ട്ടണ് പോലീസ് പിന്നീട് ട്വിറ്റര് പോസ്റ്റിലൂടെ വ്യക്തമാക്കി. ഇപ്പോള് സ്ഥലത്ത് ഭയപ്പെടേണ്ട സാഹചര്യമില്ലെങ്കിലും പരിസരവാസികളും യാത്രക്കാരും വീടിന്റെയും വാഹനങ്ങളുടെയും ജനാലകള് അടച്ച് ഏതാനും ദിവസങ്ങള് കൂടി ജാഗ്രത പാലിക്കണമെന്ന് പോലീസ് ജാഗ്രതാ മുന്നറിയിപ്പ് നല്കി.
