ബോളിവുഡ് സിനിമാപ്രേമികള് മാത്രമല്ല തമിഴകത്തിന്റെ ആരാധകരും ഏറെ ആവേശത്തോടെ കാത്തിരിക്കുന്ന സിനിമയാണ് ഷാരൂഖ് ഖാനും നയന്താരയും ഒരുമിച്ചെത്തുന്ന ‘ജവാന്’. തമിഴകത്തിന്റെ പ്രിയ സംവിധായകന് അറ്റ്ലിയുടെ ആദ്യ ഹിന്ദി സിനിമ കൂടിയാണിത്. ഈ ചലച്ചിത്രകാരന് തന്റെ വ്യക്തിപരവും തൊഴിൽപരവുമായ കരിയറിലെ വലിയൊരു ഘട്ടത്തിലാണ്. കഴിഞ്ഞ ദിവസം നടന്ന ‘ജവാന്റെ’ ഓഡിയോ ലോഞ്ചില് താരങ്ങളെല്ലാം തങ്ങളുടെ അനുഭവങ്ങളും ഓര്മ്മകളുമൊക്കെ പങ്കിട്ടിരുന്നു. ഇപ്പോഴിതാ തന്റെ ആദ്യ കുഞ്ഞിനെ പ്രതീക്ഷിച്ചിരിക്കുമ്പോൾ ഷാരൂഖ് ഖാന് എങ്ങനെയാണ് പ്രതികരിച്ചതെന്ന് പറയുകയാണ് അറ്റ്ലി. താന് ഒരു പിതാവായതിനെ കുറിച്ചും ഗർഭവാർത്ത വെളിപ്പെടുത്തിയതിനെ കുറിച്ചും പറഞ്ഞപ്പോള് എസ്ആര്കെയുടെ മനസ്സ് കാണാന് കഴിഞ്ഞു എന്നാണ് താരം പറയുന്നത്. ‘‘ജവാന്റെ ഷൂട്ടിംഗിനിടെയാണ് ഭാര്യ ഗർഭിണിയാണെന്ന് അറിയുന്നത്. സെറ്റിൽ വെച്ച് ജവാന്റെ നായകനായ ഷാരൂഖ് ഖാനോട് ഗർഭധാരണ വാർത്ത വെളിപ്പെടുത്തി. ആ സമയത്ത് ഭാര്യ പ്രിയയ്ക്കൊപ്പം ഉണ്ടായിരിക്കേണ്ടത് പ്രധാനമായതിനാൽ ഷൂട്ട് മാറ്റിവയ്ക്കാമെന്നാണ് ഷാരൂഖ് എന്നോട് പറഞ്ഞത്...പക്ഷേ ജവാന്റെ ഷൂട്ടിംഗ് തുടരാനും പൂർത്തിയാക്കാനാണ് പ്രിയ എന്നോട് പറഞ്ഞത്...’’ അറ്റ്ലി പറയുന്നു. കുറച്ചുസമയം സിനിമയെക്കുറിച്ച് ചിന്തിക്കേണ്ട എന്നും വിഷമിക്കരുതെന്നും കുടുംബ സമയം ആസ്വദിക്കാനും ഷാരൂഖ് പറഞ്ഞു എന്നത് വികാരാധീനനായിട്ടാണ് അറ്റ്ലി വേദിയില് വച്ച് പറഞ്ഞത്. ജവാന്റെ പ്രീറിലീസ് ഇവന്റിൽ നടത്തിയ പ്രസംഗത്തിനിടെ അറ്റ്ലി ഈ സംഭവം പങ്കുവെച്ചപ്പോൾ അറ്റ്ലിയും പ്രിയയും വികാരാധീനരായി. ഈ വീഡിയോ സോഷ്യല് മീഡിയയില് വൈറലാകുകയാണ്. ഈ വീഡിയോയ്ക്ക് താഴെ ഇത്രയും നല്ല മനസ്സുള്ളതു കൊണ്ടാണ് ഷാരൂഖിനെ കിംഗ് ഖാനെന്ന് വിളിക്കുന്നതെന്നാണ് ആരാധകര് കമന്റുകളിടുന്നത്. ഷാരൂഖ് ഖാനും അറ്റ്ലിയും തമ്മിൽ വലിയ ബന്ധമുണ്ടെന്നാണ് അറ്റ്ലിയുടെ വാക്കുകൾ വ്യക്തമാക്കുന്നത്. ഈ വർഷം ജനുവരിയിലാണ് ആറ്റ്ലിയുടെ ഭാര്യ പ്രിയ ഒരു ആൺകുഞ്ഞിന് ജന്മം നൽകിയത്.
